କଟକ: ମାଧ୍ୟମିକ ଶିକ୍ଷା ପରିଷଦ ପକ୍ଷରୁ ବୋର୍ଡ ପରୀକ୍ଷାରେ ସଂସ୍କାର ବ୍ୟବସ୍ଥା ଏକତରଫା ନିଷ୍ପତ୍ତି । ଏନେଇ ଛାତ୍ର, ଶିକ୍ଷକ, ଅଭିଭାବକ ମିଳିତ ମଞ୍ଚ ପକ୍ଷରୁ ଏକ ସାମ୍ବାଦିକ ସମ୍ମିଳନୀରେ କୁହାଯାଇଛି । ମାଧ୍ୟମିକ ଶିକ୍ଷା ପରିଷଦ ଗୋଟିଏ ପରୀକ୍ଷା ପରିବର୍ତ୍ତେ ନବମ, ଦଶମ ଶ୍ରେଣୀରେ ୪ଟି ପରୀକ୍ଷା ଲାଗୁ କରିଛି । ଏହି ବ୍ୟବସ୍ଥା ଦ୍ୱାରା ଛାତ୍ରଛାତ୍ରୀ ବହୁ ସମସ୍ୟାର ସମ୍ମୁଖୀନ ହେବେ ବୋଲି ଛାତ୍ର, ଶିକ୍ଷକ, ଅଭିଭାବକ ମିଳିତ ମଞ୍ଚ ପକ୍ଷରୁ କୁହାଯାଇଛି ।
ଡିସେମ୍ବର ୮ରେ ବୋର୍ଡର କଟକସ୍ଥିତ ମୁଖ୍ୟ କାର୍ଯ୍ୟାଳୟ ସମେତ ୪ଟି ଜୋନ କାର୍ଯ୍ୟାଳୟ ଘେରାଉ କରିବ ମଞ୍ଚ। ବୋର୍ଡ କିମ୍ବା ରାଜ୍ୟ ସରକାର କୌଣସି ନିଷ୍ପତ୍ତି ନେବା ପୂର୍ବରୁ ଏଥି ସହିତ ଜଡିତ ଶିକ୍ଷକ ସଂଗଠନ, ଛାତ୍ର ସଂଗଠନ ଓ ଅଭିଭାବକ ସଂଘ ସହ ଆଲୋଚନା କରିବା ଉଚିତ। ନୂଆ ପଦ୍ଧତି ଅନୁଯାୟୀ ନବମ ଓ ଦଶମ ଶ୍ରେଣୀରେ ୪ଟି ଫରମେଟିଭ ଆସେସମେଣ୍ଟ ଓ ୨ଟି ସମେଟିଭ ଆସେସମେଣ୍ଟ ବ୍ୟବସ୍ଥା କରାଯାଇଛି ।
ଗୋଟିଏ ଶିକ୍ଷା ବର୍ଷରେ ଦୁଇଟି ବୋର୍ଡ ପରୀକ୍ଷା ଯଥାର୍ଥ ନୁହେଁ ବୋଲି ମଞ୍ଚ ପକ୍ଷରୁ କୁହାଯାଇଛି । ଏହାସହ ଦ୍ୱିତୀୟ ବୋର୍ଡ ପରୀକ୍ଷାରେ ସମ୍ପୂର୍ଣ୍ଣ ପାଠ୍ୟଖସଡ଼ାରୁ ପ୍ରଶ୍ନ ଆସିବା ଛାତ୍ରଛାତ୍ରୀଙ୍କ ପାଇଁ ବୋଝ ପାଲଟିବ। ମୁଖ୍ୟମନ୍ତ୍ରୀ ଓ ଗଣଶିକ୍ଷା ମନ୍ତ୍ରୀ ତୁରନ୍ତ ହସ୍ତକ୍ଷେପ କରି ପରିବର୍ତ୍ତିତ ପରୀକ୍ଷା ଢାଞ୍ଚାରେ ପ୍ରତ୍ୟାହାର କରନ୍ତୁ ବୋଲି ମଞ୍ଚ ପକ୍ଷରୁ ଦାବି ହୋଇଛି।
କଟକରୁ ପ୍ରଭୁ କଲ୍ୟାଣ ପାଲ,ଇଟିଭି ଭାରତ
