ଭୁବନେଶ୍ବର: ରାଜଧାନୀରେ ରାହାଜାନୀ । ପୋଲିସକୁ ଖୋଲା ଚ୍ୟାଲେଞ୍ଜ । ଦିନ-ରାତି ସବୁବେଳେ ଲୁଟ୍ର ଶିକାର ହେଉଛନ୍ତି ଲୋକେ । ଖାଲି ହାତରେ କମିଶନରେଟ ପୋଲିସ ।
ମଞ୍ଚେଶ୍ବର ଥାନା ଅଧୀନରେ ଦିନ ସମୟରେ ସିରିଜ୍ ଲୁଟ୍ ହୋଇଥିବାବେଳେ ସନ୍ଧ୍ୟାରେ ଆଉ ଏକ ଲୁଟ୍ ହୋଇଛି । ଜଗନ୍ନାଥ ସଡକର ହାଇଟେକ୍ ନିକଟରେ ଲୁଟ୍ର ଶିକାର ହୋଇଛନ୍ତି ମହିମା ମୋଟର୍ସ ଗାଡି ସୋରୁମକୁ ଗାଡି କିଣିବାକୁ ଆସିଥିବା ଗ୍ରାହକ ପ୍ରିୟ ପ୍ରିତମ ଶର୍ମା। ଗାଡି କିଣିବାକୁ ଆସିଥିବା ପ୍ରିୟ ପ୍ରିତମ ଓ ତାଙ୍କ ସାଙ୍ଗରେ ଥିବା ଭିକି ଶର୍ମାଙ୍କୁ ଆକ୍ରମଣ କରିବା ସହ ବନ୍ଧୁକ ଦେଖାଇ 2 ଲକ୍ଷରୁ ଅଧିକ ଟଙ୍କା ଲୁଟି ନେଇଛନ୍ତି 5 ଦୁର୍ବୃତ୍ତ ।
ତେବେ ଲୁଟ୍ ସମୟରେ ଆକ୍ରମଣର ଶିକାର ହୋଇଥିବା ପ୍ରିୟ ପ୍ରିତମଙ୍କୁ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଥିଲା । ପରେ ସେ ମଞ୍ଚେଶ୍ବର ଥାନାରେ ଏନେଇ ଏକ ଏତଲା ଦେଇଛନ୍ତି ।
ସୂଚନା ଥାଉକି, ସକାଳ ସମୟରେ ମଞ୍ଚେଶ୍ଵର ଥାନା ଅଧୀନରେ ସିରିଜ ଲୁଟ ହୋଇଥିଲା। ଦମ୍ପତିଙ୍କ ଠାରୁ ପ୍ରାୟ 75 ଗ୍ରାମର ସୁନା ଅଳଙ୍କାର ଲୁଟି ନେଇଥିଲେ ତିନି ଜଣ ଯୁବକ। ଏହା ସହ ଜଣେ ବରିଷ୍ଠ ନାଗରିକଙ୍କ ଠାରୁ ମଧ୍ୟ ଲୁଟ କରି ଟଙ୍କା ନେଇଯାଇଥିବା ଅଭିଯୋଗ ହୋଇଥିଲା । ତେବେ ଏପରି ଲୁଟ୍ ପରେ ରାଜଧାନୀ ରେ ଏକ ନୂଆ ଲୁଟେରା ଗ୍ୟାଙ୍ଗ କାମ କରୁଥିବା ସନ୍ଦେହ କରାଯାଉଛି । ଯାହାକୁ ନେଇ ପୋଲିସ ତନାଘନା ଆରମ୍ଭ କରିଛି।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
