ଭଦ୍ରକ: ଶନିବାର ବିଜେଡି ପକ୍ଷରୁ ନାମାଙ୍କନ ପତ୍ର ଦାଖଲ କରିଛନ୍ତି ରାଜେନ୍ଦ୍ର ଦାସ । ଭଦ୍ରକ ଜିଲ୍ଲା ଧାମନଗର ବିଧାନସଭା ନିର୍ବାଚନ ମଣ୍ଡଳୀ ପାଇଁ ସେ ନାମାଙ୍କନ ପତ୍ର ଦାଖଲ କରିଛନ୍ତି । ରାଜ୍ୟର 46 ନମ୍ବର ବିଧାନସଭା ନିର୍ବାଚନମଣ୍ଡଳୀ ଧାମନଗରରୁ ବିଜୁଜନତା ଦଳ ପକ୍ଷରୁ ଦ୍ଵିତୀୟ ଥର ପାଇଁ ପୁଣି ନିର୍ବାଚନ ଲଢିବେ ରାଜେନ୍ଦ୍ର ଦାସ ।
ରାଜେନ୍ଦ୍ର 2009 ରେ ଏହି ଆସନରୁ ବିଧାୟକ ଭାବେ ନିର୍ବାଚିତ ହୋଇଥିଲେ । ହେଲେ 2014 ରେ ଦଳ ତାଙ୍କ ବଦଳରେ ମୁକ୍ତିକାନ୍ତ ମଣ୍ଡଳଙ୍କୁ ପ୍ରାର୍ଥୀ କରିଥିଲା । ମୁକ୍ତିକାନ୍ତ ମଧ୍ୟ ନିର୍ବାଚନରେ ଜୟଯୁକ୍ତ ହୋଇଥିଲେ । ତେବେ ଚଳିତ ଥର ଦଳ ପୁଣି ରାଜେନ୍ଦ୍ରଙ୍କ ଉପରେ ଆସ୍ଥା ପ୍ରକଟ କରିଛି । ତେଣୁ ତାଙ୍କୁ ପୁନର୍ବାର ଏହି ସୁଯୋଗ ଦେଇଥିବାରୁ ଦଳର ସଭାପତି ନବୀନ ପଟ୍ଟନାୟକଙ୍କୁ ସେ ଧନ୍ୟବାଦ ଜଣାଇଛନ୍ତି ।
ଏହି ବିଧାନସଭା ନିର୍ବାଚନ ମଣ୍ଡଳୀର ରିଟର୍ଣ୍ଣ ଅଧିକାରୀ ଅତିରିକ୍ତ ଉପ ଜିଲ୍ଲାପାଳ ହେମନ୍ତ କୁମାର ବିହାରୀଙ୍କ କାର୍ଯ୍ୟାଳୟରେ ରାଜେନ୍ଦ୍ର ଦାସ ନିଜର ନାମାଙ୍କନ ପତ୍ର ଦାଖଲ କରିଛନ୍ତି ।
ଏନେଇ ସେ ଶନିବାର ଧାମନଗର ବିଧାନସଭା ନିର୍ବାଚନମଣ୍ଡଳୀରୁ ହଜାର ହଜାର ସମର୍ଥକଙ୍କ ସହ ଶୋଭାଯାତ୍ରାରେ ଆସି ଅତିରିକ୍ତ ଉପ ଜିଲ୍ଲାପାଳଙ୍କ କାର୍ଯ୍ୟାଳୟ ପରିସରରେ ପହଞ୍ଚିଥିଲେ । ରାଜେନ୍ଦ୍ର ଚଳିତଥର ନିଶ୍ଚୟ ଜୟଯୁକ୍ତ ହେବେ ବୋଲି କହିବା ସହ ଧାମନଗର ବିଧାନସଭା ନିର୍ବାଚନ ମଣ୍ଡଳୀର ଭୋଟରଙ୍କ ଆଶୀର୍ବାଦ ତାଙ୍କ ସହିତ ଥିବା ମଧ୍ୟ କହିଥିଲେ ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
