ମୁମ୍ବାଇ: ଅନ୍ତରାଷ୍ଟ୍ରୀୟ ବଜାରରେ ଦେଖାଦେଇଥିବା ଜୋରଦାର ଅଭିବୃଦ୍ଧି ଯୋଗୁଁ ମଙ୍ଗଳବାର ଭାରତୀୟ ଫ୍ୟୁଚର ବଜାରରେ ରୂପା କିଲୋଗ୍ରାମ ପିଛା 55 ହଜାର ଟଙ୍କା ଟପିଛି । ତେବେ ସୁନା ଦାମରେ ସେଭଳି କୌଣସି ବିଶେଷ ପରିବର୍ତ୍ତନ ହୋଇନାହିଁ ।
କମୋଡିଟି ବଜାରର ବିଶେଷଜ୍ଞ କହିଛନ୍ତି କି, ରୂପାର ଔଦୌଗିକ ଚାହିଦା ବଢିବା ଆଶା ମଧ୍ୟରେ କ୍ରମାଗତ ଦାମ ବୃଦ୍ଧି ପାଇଚାଲିଛି । ମଲ୍ଟି କମୋଡିଟି ଏକ୍ସଚେଞ୍ଜ (MCX) ରେ ରୂପା 1275 ଟଙ୍କା ବା 2.36 ପ୍ରତିଶତ ବୃଦ୍ଧି ପାଇ କିଲୋଗ୍ରାମ ପିଛା 55,280 ଟଙ୍କା ରହିଛି ।
ଯେତେବେଳେ କି ଏହା ପୂର୍ବ କାରବାର ମଧ୍ୟରେ ରୂପା ଦାମ MCX ରେ ରୂପା ଦାମ କିଲୋ ପିଛା 55,465 ଟଙ୍କାକୁ ଉଛୁଳିଥିଲା । ଯାହାକି 2013 ପରଠାରୁ ସର୍ବୋଚ୍ଚ ସ୍ତର ଅଟେ । MCX ରେ ସୁନାର ଅଗଷ୍ଟ ଫ୍ୟୁଚର ଅନୁବନ୍ଧରେ ଗତ କାରବାର ତୁଳନାରେ 113 ଟଙ୍କା ବଢିବା ସହ 10 ଗ୍ରାମ ପିଛା 49,140 ଟଙ୍କାରେ କାରବାର କରୁଛି ।
ସେପଟେ ଅନ୍ତରାଷ୍ଟ୍ରୀୟ ବଜାରରେ ରୂପା ଦାମ 2.68 ପ୍ରତିଶତ ବୃଦ୍ଧି ସହ ଆଉନ୍ସ ପ୍ରତି 20.733 ଡଲାରରେ କାରବାର କରୁଛି । ତେବେ କାରବାର ସମୟରେ ରୂପା ଆଉନ୍ସ ପ୍ରତି 20.848 ଡଲାର ସହ 2016 ପରର ରେକର୍ଡ ଭାଙ୍ଗିଥିଲା ।
ରୂପା କେବଳ ମହଙ୍ଗା ଧାତୁ ନୁହେଁ ବରଂ ଏହା ଏକ ଔଦୌଗିକ ଧାତୁ । ଏହାର ବ୍ୟବହାର ଗହଣା ସହ ଉଦ୍ୟୋଗରେ ମଧ୍ୟ କରାଯାଇଥାଏ । ଏହାର ବ୍ୟବହାର ଇଲୋକ୍ଟ୍ରନିକ୍ସ ଓ ଫୋଟୋଗ୍ରାଫି ବ୍ୟତିତ ଅନ୍ୟ ସେକ୍ଟରରେ ମଧ୍ୟ ହୋଇଥାଏ ।
