ନୂଆଦିଲ୍ଲୀ: ଏପ୍ରିଲ ଓ ମେ ମାସର କିସ୍ତି ବାବଦରେ କେନ୍ଦ୍ର କରରୁ ରାଜ୍ୟର ଅଂଶ ରୂପେ ମୋଟ 92,077 କୋଟି ଜାରି କରିଛନ୍ତି ସରକାର । ଅର୍ଥମନ୍ତ୍ରୀ ନିର୍ମଳା ସୀତାରମଣ କାର୍ଯ୍ୟାଳୟ ପକ୍ଷରୁ ଏ ନେଇ ଟ୍ବିଟ କରି ସୂଚନା ଦିଆଯାଇଛି ।
ଏଥିମଧ୍ୟରେ ଏପ୍ରିଲ ମାସର 46,038.10 କୋଟି ଟଙ୍କା ଓ ମେ ମାସ ପାଇଁ 46,038.70 କୋଟି ଜାରି ହୋଇଛି ବୋଲି ମନ୍ତ୍ରାଣଳୟ ପକ୍ଷରୁ ସୂଚନା ଦିଆଯାଇଛି । ଟ୍ବିଟରେ କୁହାଯାଇଛି ଯେ, ଜାରି ହୋଇଥିବା ରାଶି ବଜେଟ 2020-21ର ପ୍ରାପ୍ତି ଅନୁମାନ ଉପରେ ଆଧାରିତ । ଏହି ଟଙ୍କା ବାସ୍ତବ କର ଆଦାୟ ଅନୁରୂପ ଦିଆଯାଇନାହିଁ ।
ସଙ୍କଟର ଏଭଳି ଘଡିସନ୍ଧି ମୂହୂର୍ତ୍ତରେ ରାଜ୍ୟର ନଗଦ ପ୍ରବାହ ଜାରି ରଖିବା ପାଇଁ ଏଭଳି ପଦକ୍ଷେପ ଗ୍ରହଣ କରାଯାଇଛି । 2020-21 ବଜେଟରେ କେନ୍ଦ୍ର କର ମଧ୍ୟରୁ ରାଜ୍ୟର ଅଂଶ 7.8 ଲକ୍ଷ କୋଟି ଟଙ୍କା ରହିବା ନେଇ ଆକଳନ କରାଯାଇଥିଲା ।
ପଞ୍ଚଦଶ ଅର୍ଥଆୟୋଗ ରାଜ୍ୟ ପାଇଁ 41 ପ୍ରତିଶତ ଓ ନୂଆରେ ଗଠିତ କେନ୍ଦ୍ର ଶାସିତ ଅଞ୍ଚଳ ଜାମ୍ମୁକାଶ୍ମୀର ଓ ଲଦାଖ ପାଇଁ 1 ପ୍ରତିଶତ ପାଇଁ ସୁପାରିଶ କରିଛି । ସେପଟେ ଚତୁର୍ଦ୍ଦଶ ଅର୍ଥ ଆୟୋଗ କର ମଧ୍ୟରୁ ରାଜ୍ୟକୁ 42 ପ୍ରତିଶତ ଦେବା ପାଇଁ ପରାମର୍ଶ ଦେଇଥିଲା ।
