ଯାଜପୁର: ବ୍ୟାସନଗର ପୌରାଞ୍ଚଳର ମୁଖ୍ୟ ରାସ୍ତାରେ ଲାଗିଛି ମାଳ ମାଳ ବିଜ୍ଞାପନ ହୋର୍ଡିଂ । ଯେଉଁଠି ବିନା ଟେଣ୍ଡର ଏବଂ ବିନା ଅନୁମତିରେ ରାସ୍ତାରେ ମନଇଚ୍ଛା ଲଗାଯାଇଛି ହୋର୍ଡିଂ । କେଉଁଠି ଇଲେକ୍ଟ୍ରି ଖୁଣ୍ଟ ତ ଆଉ କେଉଁଠି ବଡ଼ବଡ଼ ଷ୍ଟ୍ରକଚର ତିଆରି କରି ହୋଡ଼ିଂ ସବୁ ଲଗାଯାଇଛି । ଯାହା ଅନେକ ସମୟରେ ସହରବାସୀଙ୍କ ପାଇଁ ବିପଦ ସୃଷ୍ଟି କରୁଛି । ଆଉ ଏଥିପାଇଁ ପୌର ପ୍ରଶାସନ ବିପୁଳ ପରିମାଣର ରାଜସ୍ବ ହରାଉଛି । ସ୍ଥାନୀୟ ଲୋକେ ଏନେଇ ବାରମ୍ବାର ଅଭିଯୋଗ କରୁଥିଲେ ମଧ୍ୟ ପ୍ରଶାସନର ଏଥିପ୍ରତି ନିଘା ନାହିଁ ।
ସେପଟେ ପ୍ରଶାସନ ଓ ଜିଲ୍ଲା ପ୍ରଶାସନର ଅବହେଳାର ଫାଇଦା ଉଠାଉଛନ୍ତି ପୌର ପ୍ରଶାସନର କିଛି ଅସାଧୁ କର୍ମଚାରୀ । ଗତ ଫନି ବାତ୍ୟାରେ ସହରରେ ଲାଗିଥିବା ଏହି ବଡ ବଡ ହୋର୍ଡିଂ ସବୁ ଖସି ପଡି ରାସ୍ତା ଅବରୋଧ କରିଥିଲା । ଆଉ ପୌର ପ୍ରଶାସନ ତାହା ସବୁ ନିଜେ ସଫା କରିଛି । ଏନେଇ ପୂର୍ବତନ ପୌରାଧ୍ୟକ୍ଷଙ୍କ କହିବାନୁଯାୟୀ, ତାଙ୍କ କାର୍ଯ୍ୟକାଳ ସମୟରେ ଏଥିପାଇଁ ଟେଣ୍ଡର ପ୍ରକ୍ରିୟା ଆରମ୍ଭ ହୋଇଥିଲା । ହେଲେ ତାହା ବର୍ତ୍ତମାନ ସୁଦ୍ଧା କାର୍ଯ୍ୟକାରୀ ହୋଇପାରିନଥିବା ସୂଚନା ମିଳିଛି ।
ତେବେ ଏଭଳି ବେଆଇନ ଭାବେ ହୋର୍ଡିଂ ଲଗାଇବା ଦ୍ବାରା ଗୋଟିଏ ପଟେ ପୌର କର୍ତ୍ତୃପକ୍ଷ ବିପୁଳ ରାଜସ୍ବ ହରାଉଥିବା ବେଳେ ଅନ୍ୟପଟରେ ବିଭାଗୀୟ ଅଧିକାରୀ କାହିଁକି ନୀରବଦ୍ରଷ୍ଟା ସାଜିଛନ୍ତି ତାହା ସାଧାରଣରେ ପ୍ରଶ୍ନ ସୃଷ୍ଟି କରିଛି । ପୌର ପ୍ରଶାସନର କିଛି ଆସାଧୁ କର୍ମଚାରୀ ବା ପଦାଧିକାରୀଙ୍କୁ ହାତଗୁଞ୍ଜା ଦେଇ ବିଭିନ୍ନ ବିଜ୍ଞାପନ ସଂସ୍ଥା ବା ଏଜେଣ୍ଟ ଏପରି ବେଆଇନ କାର୍ଯ୍ୟ କରି ଆସୁଥିବା ଅଭିଯୋଗ ହୋଇଛି। ଏ ସମ୍ପର୍କରେ ଆମେ ପୌର ପରିଷଦର କାର୍ଯ୍ୟନିର୍ବାହୀ ଅଧିକାରୀଙ୍କୁ ଭେଟିଥିଲୁ । ଖୁବଶୀଘ୍ର ଟେଣ୍ଡର ଡକାଯାଇ ଏହାକୁ କାର୍ଯ୍ୟକାରୀ କରାଯିବା ସହ ଯେଉଁମାନେ ବିଭିନ୍ନ ସ୍ଥାନରେ ବେଆଇନ ଭାବେ ହୋର୍ଡିଂ ଲଗାଉଛନ୍ତି ସେମାନଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ହେବ ବୋଲି ସେ କହିଛନ୍ତି ।
ବେଆଇନ ହୋର୍ଡିଂ ଲଗାଇ ନିୟମ ଭାଙ୍ଗୁଥିବା ଅପରାଧୀଙ୍କ ବିରୁଦ୍ଧରେ କେବେ କଡା କାର୍ଯ୍ୟାନୁଷ୍ଠାନ ହେବ ଆଉ କେବେ ଟେଣ୍ଡର ପ୍ରକ୍ରିୟା ସରିବ ଏବେ ତାକୁ ଅପେକ୍ଷା ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
