ରାଇରଙ୍ଗପୁର: ଘରେ ଶୋଇଥିବା ଅବସ୍ଥାରେ ସ୍ବାମୀ-ସ୍ତ୍ରୀଙ୍କ ଉପରକୁ ଦୁର୍ବୃତ୍ତଙ୍କ ଆକ୍ରମଣ । ଆକ୍ରମଣରେ ସ୍ବାମୀର ମୃତ୍ୟୁ ହୋଇଥିବା ବେଳେ ସ୍ତ୍ରୀ ଗୁରୁତର ହୋଇଛି । ଏଭଳି ଏକ ଲୋମହର୍ଷଣକାରୀ ଘଟଣା ମୟୂରଭଞ୍ଜ ଜିଲ୍ଲା ମହୁଲଡିହା ଥାନା ଅନ୍ତର୍ଗତ ଜରକ ଗ୍ରାମରେ ଘଟିଛି ।
ସୂଚନାନୁଯୋଗ୍ୟ, ହାଟ ସାହିରେ ରହୁଥିବା ବରଜ ସୋୟ ଏବଂ ତାଙ୍କ ସ୍ତ୍ରୀ ସାଗି ସୋୟଙ୍କୁ ଗୁରୁବାର ବିଳମ୍ବିତ ରାତିରେ ୩ ଜଣ ଦୁର୍ବୃତ୍ତ ଆକ୍ରମଣ କରିଥିଲେ । କୌଣସି ଏକ ଧାରୁଆ ଅସ୍ତ୍ରରେ ଦୁର୍ବୃତ୍ତ ଅତି ନିର୍ମମ ଭାବେ ବରଜଙ୍କୁ ହାଣି ହତ୍ୟା କରିଥିବା ବେଳେ ତାଙ୍କ ସ୍ତ୍ରୀଙ୍କ ବେକ ଓ ହାତ ପାପୁଲି କାଟି ଦେଇଛନ୍ତି । ତେବେ ସାଗିକୁ ଗୁରୁତର ଅବସ୍ଥାରେ ଠାକୁରମୁଣ୍ଡା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା । କିନ୍ତୁ ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ କଟକ ବଡ ମେଡିକାଲକୁ ସ୍ଥାନାନ୍ତରଣ କରାଯାଇଛି ।
ଘଟଣାର ଖବର ପାଇ ପୋଲିସ ଛାନଭିନ୍ ଆରମ୍ଭ କରିଛି । ସେପଟେ ବାରିପଦାରୁ ସାଇଣ୍ଟିଫିକ୍ ଟିମ୍ ଆସି ଘଟଣାର ତଦନ୍ତ ଜାରି ରଖିଛନ୍ତି । ଜିଲ୍ଲାରେ ବାରମ୍ବାର ଏପରି ଘଟଣା ଘଟୁଛି । ଯାହାକୁ ନେଇ ଭୟରେ ସହରବାସୀ । ତେବେ ଉକ୍ତ ମାମଲାର ଅଭିଯୁକ୍ତ ଧରାପଡୁଛନ୍ତି ନା ଅନ୍ୟ ଘଟଣା ପରି ଏହା କେବଳ ତଦନ୍ତରେ ସୀମିତ ରହିବ ତାହା ସମୟ କହିବ ।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
