ନୂଆଦିଲ୍ଲୀ: ଲୋକସଭା ନିର୍ବାଚନ ପାଇଁ ପ୍ରାର୍ଥୀଙ୍କ ଆରମ୍ଭ ହୋଇଯାଇଛି ନାମାଙ୍କନ ପତ୍ର ଦାଖଲ ପର୍ବ । ଗତକାଲି(ଗୁରୁବାର) କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ କେରଳର ୱାୟନାଡ ଲୋକସଭା ଆସନରୁ ଦାଖଲ କରିଥିଲେ ନାମାଙ୍କନ । ଆସନ୍ତା ୧୦ ତାରିଖରେ ଆମେଠୀରୁ ଦ୍ବିତୀୟ ଆସନ ପାଇଁ ସେ ପୁଣି କରିବେ ନାମାଙ୍କନ ଦାଖଲ । ସେହିପରି ତାଙ୍କ ମା ୟୁପିଏ ଅଧ୍ୟକ୍ଷା ସୋନିଆ ଗାନ୍ଧୀ ଏପ୍ରିଲ ୧୧ରେ ରାୟବରେଲୀରୁ ନାମାଙ୍କନ ଦାଖଲ କରିବାର କାର୍ଯ୍ୟକ୍ରମ ରଖିଛନ୍ତି ।
ଦୁହେଁ ନାମାଙ୍କନ ଦାଖଲ ବେଳେ କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀ ଭଦ୍ରା ଓ ଦଳର ଅନ୍ୟ ବରିଷ୍ଠ ନେତାଗଣ ଉପସ୍ଥିତ ରହିବେ । କଂଗ୍ରେସ ଅଧ୍ୟକ୍ଷ କେରଳର ୱାୟନାଡ ସହ ଆମେଠୀରୁ ନିର୍ବାଚନ ଲଢୁଛନ୍ତି ।
ରାଇବରେଲୀ ଓ ଆମେଠୀ ଆସନ ପାଇଁ ଲୋକସଭାର ପଞ୍ଚମ ପର୍ଯ୍ୟାୟରେ ମେ ୬ରେ ମତଦାନ ହେବ । ଆମେଠୀରୁ ରାହୁଲଙ୍କ ବିରୋଧରେ କେନ୍ଦ୍ରମନ୍ତ୍ରୀ ସ୍ମୃତି ଇରାନୀ ପ୍ରତିଦ୍ବନ୍ଦିତା କରୁଛନ୍ତି । ବିଗତ ଲୋକସଭା ନିର୍ବାଚନରେ ଏହି ଆସନରୁ ସ୍ମୃତିଙ୍କୁ ପରାଜୟର ସାମ୍ନା କରିବାକୁ ପଡିଥିଲା ।
