ବିଜେଡି ବିଧାୟକ ପ୍ରାର୍ଥୀ ସୁଧିର ସାମଲ ଓ ପୁତୁରା ଅବିନାଶ ଭରିଲେ ନାମାଙ୍କନ - Nomination By Sudhir And Abinash

Nomination By Sudhir And Abinash: ଢେଙ୍କାନାଳ: ବିଜେଡିର ସାଂସଦ ପ୍ରାର୍ଥୀ ଡକ୍ଟର ଅବିନାଶ ସାମଲ ଓ ତାଙ୍କ ଦାଦା ସୁଧିର ସାମଲ ନିଜ ନିଜର ନାମାଙ୍କନ ପତ୍ର ଦାଖଲ କରିଛନ୍ତି । ମୁଖ୍ୟ ନିର୍ବାଚନ ଅଧିକାରୀଙ୍କ ପାଖରେ ପ୍ରାର୍ଥୀପତ୍ର ଦାଖଲ କରିଛନ୍ତି ଢେଙ୍କାନାଳ ବିଧାୟକ ସୁଧୀର ସାମଲଙ୍କ ପୁତୁରା ଅବିନାଶ । ଆଉ ନିଜେ ବିଧାୟକ ସୁଧୀର ସାମଲ ଉପଜିଲ୍ଲାପାଳଙ୍କ ପାଖରେ ନାମାଙ୍କନ ପତ୍ର ଦାଖଲ କରିଛନ୍ତି । ଏହି ଅବସରରେ ଢେଙ୍କାନାଳ ସହରର ବାଜିଚୌକ ଛକରୁ ବିଜେଡି କର୍ମୀ, ସମର୍ଥକ ଓ ଶୁଭେଚ୍ଛୁଙ୍କ ଏକ ବିଶାଳ ଶୋଭାଯାତ୍ରା ବାହାରିଥିଲା । ଏଥିରେ ସାମିଲ ହୋଇଥିଲେ ଉଭୟ ଦାଦା-ପୁତୁରା । ପାରମ୍ପରିକ ଓ ଅତ୍ୟାଧୁନିକ ବାଜା, ନାଚ ଗୀତର ବିରାଟ ପଟୁଆରରେ ସହର ପରିକ୍ରମା କରି ଶକ୍ତି ପ୍ରଦର୍ଶନ କରିଛନ୍ତି ଦାଦା-ପୁତୁରା । 

ଏହି ଅବସରରେ ଅବିନାଶଙ୍କ ପ୍ରାର୍ଥୀପତ୍ର ଦାଖଲ ବେଳେ ପୂର୍ବତନ ଉପବାଚସ୍ପତି ତଥା ଅନୁଗୋଳ ବିଧାୟକ, ଢେଙ୍କାନାଳ ବିଧାୟକ ତଥା ବିଜେଡି ବିଧାୟକ ପ୍ରାର୍ଥୀ ତାଙ୍କ ଦାଦା ସୁଧିର ସାମଲ ଓ ତାଙ୍କ ବାପା ଶିଳ୍ପପତି ଗଙ୍ଗାଧର ସାମଲ ପ୍ରମୁଖ ଉପସ୍ଥିତ ଥିଲେ । ସେପଟେ ପ୍ରାର୍ଥୀପତ୍ର ଦାଖଲ ପରେ ସୁଧୀର ସାମଲ କହିଛନ୍ତି, "ରାଜ୍ୟରେ ଲୋକପ୍ରିୟ ମୁଖ୍ୟମନ୍ତ୍ରୀଙ୍କ ନିର୍ମଳ ଭାବମୂର୍ତ୍ତି ଓ ଜନ୍ମରୁ ମୃତ୍ୟୁ ଯାଏଁ ଲୋକାଭିମୁଖୀ ଯୋଜନା ହିଁ ଢେଙ୍କାନାଳରେ ବିଜେଡିର ବିଜୟ କରାଇବ ।"

ଇଟିଭି ଭାରତ, ଢେଙ୍କାନାଳ