କଟକରୁ 5 ଜଣିଆ ଡକାୟତି ଗ୍ୟାଙ୍ଗ ଗିରଫ, ମାରଣାସ୍ତ୍ର ସହ ବାଇକ ଜବତ - Robbers Gang arrested

କଟକ: ପୋଲିସକୁ ମିଳିଲା ବଡ଼ ସଫଳତା । ଡ଼କାୟତ ଗ୍ୟାଙ୍ଗକୁ କାବୁ କଲା କଟକ କମିଶନରେଟ ପୋଲିସ । ଡକାୟତି ଉଦ୍ୟମ ପାଇଁ ଯୋଜନା କରୁଥିବା ବେଳେ ଚୌଦ୍ବାର ଥାନା ପୋଲିସ ପାଞ୍ଚ ଜଣିଆ ଡକାୟତି ଗ୍ୟାଙ୍ଗର ସଦସ୍ୟଙ୍କୁ ଗିରଫ କରିଛି ।  ସେମାନଙ୍କ ଠାରୁ ତିନୋଟି ଖଣ୍ଡା, ଦୁଇଟି ଲୁହା ରଡ ଓ ଏକ ମଟର ସାଇକେଲ ଜବତ କରାଯାଇଛି । ଏହି ଗ୍ୟାଙ୍ଗର ମାଷ୍ଟରମାଇଣ୍ଡ ସୁକାନ୍ତ ସ୍ୱାଇଁ ଓ ଅନ୍ୟ ଅଭିଯୁକ୍ତ କେବଳ ଚୌଦ୍ବାର ନୁହେଁ କଟକର ବିଭିନ୍ନ ସ୍ଥାନରେ ରେକି କରି ଡକାୟତି କରୁଥିଲେ । ସମସ୍ତ ଅଭିଯୁକ୍ତଙ୍କ ନାଁରେ ଷାଠିଏରୁ ଊର୍ଦ୍ଧ୍ବ ମାମଲା ରହିଛି । 

ଅନ୍ୟପଟେ କଟକ ସହରରୁ ବିଭିନ୍ନ ବ୍ୟବସାୟୀଙ୍କୁ ନିଶା ଦେଇ ଲୁଟ କରୁଥିବା ଦୁଇ ଜଣ ନିଶା ଦିଆ ଲୁଟେରାଙ୍କୁ ଗିରଫ କରିଛି ସଦର ଥାନା ପୋଲିସ । ଗିରଫ ଅଭିଯୁକ୍ତ ଦୁଇ ଜଣ ହେଲେ ଅଜୟ କୁମାର ବେହେରା ଓ ବିକ୍ରମ ବିଶ୍ୱାଳ। ଦୁଇ ଅଭିଯୁକ୍ତ ସହରର ବିଭିନ୍ନ ଅଞ୍ଚଳ ବୁଲି ପ୍ରଥମେ ବ୍ୟବସାୟୀମାନଙ୍କ ସହ ବନ୍ଧୁତା ସ୍ଥାପନ କରିବା ସହ ଚା’ ଓ ଥଣ୍ଡାରେ ନିଶା ଦେଇ ବ୍ୟବସାୟୀଙ୍କୁ ଅଚେତ କରି ଲୁଟ୍ କରୁଥିଲେ ।

ଇଟିଭି ଭାରତ, କଟକ