यवतमाळ - एसटीचा प्रवास सुरक्षित प्रवास असा प्रचार महाराष्ट्र राज्य मार्ग परिवहन महामंडळाकडून केला जातो. मात्र, एसटी महामंडळ चालवत असलेल्या शिवशाहीचा प्रवास धोकादायक ठरतो आहे. शिवशाही बसेसमध्ये 'फायर सेफ्टी किट' बसवण्याबाबत करार करण्यात आला असतानाही ७० बसेसमध्ये ही किट लावली गेली नसल्याचा धक्कादायक प्रकार उघडकीस आला आहे. याबाबत महामंडळाचे व्यवस्थापकीय संचालकांकडे तक्रार झाल्यानंतरही संबंधित कंत्राटदारावर कारवाई करण्यास चालढकल केली जात असल्याचे दिसत आहे.
युती सरकार मध्ये राज्य मार्ग परिवहन महामंडळाने भाडे तत्वावर सुरु केलेल्या शिवशाही बस मध्ये प्रवाश्यांच्या सुरक्षिततेबाबत असुविधा असल्याचे तपासणीत निदर्शनास आले आहे. शिवशाही बसमध्ये अत्यावश्यक असलेली फायर डिटेक्शन व संप्रेषण सिस्टीम म्हणजेच एफडीएसएस प्रणाली लावण्यात संबंधित कंत्राटदाराने बनवाबनवी केली. मे. जय एजन्सीज व महामंडळात शिवशाही बस भाडेतत्वावर चालवण्याबाबत १७ फेब्रुवारी २०१८ रोजी करार झाला. करारानुसार महामंडळाला १०८ शिवशाही बस देण्याचा व त्यात एफडीएसएस बसविण्याचे ठरले. मात्र, जय एजन्सी ने ९० बसेस उपलब्ध करून दिल्या व २०१८ पासून ते आतापर्यंत केवळ २० शिवशाही बसेस मध्येच फायर सेफ्टी किट बसवण्यात आला. याबाबत शशांक बोरेले यांनी राज्य मार्ग परिवहन महामंडळाचे व्यवस्थापकीय संचालकांकडे तक्रार दाखल केली. त्यानुसार तपासणी केली असता बस असुरक्षित पद्धतीने धावत असल्याचे निदर्शनास आले.
