सोलापूर - सोलापूर महानगरपालिकेच्या वतीने महापौर व पालिका आयुक्त यांच्या निर्देशानुसार कोरोनाची तीसरी लाट रोखण्यासाठी आणि लहान मुलांना कोरोनाची लागण होऊ नये यासंदर्भात आराखडा तयार करण्यात येत आहे. आज सोलापूर शहरातील सर्व बाल रोग तज्ञ यांची एकत्रित बैठक महापालिकेत घेण्यात आली. यात सोलापूर शहरातील बालरोग तज्ञ उपस्थित होते.
हेही वाचा - सोलापुरात सामाजिक कार्यकर्त्याच्या अंत्ययात्रेला हजारोंची गर्दी
शहरातील 15 नागरी आरोग्य केंद्रात फिवर ओपीडी सुरू करणार
सोलापूर महानगरपालिकेच्या वतीने आतापासूनच नियोजन करण्यात येत आहे. लहान मुलांचे फिव्हर ओपीडी शहरात असलेल्या सर्व 15 नागरिक आरोग्य केंद्रात सुरू करण्यात येणार आहे. त्या अनुषंगाने डॉक्टरांना ट्रेनिंग देण्यात येणार आहे. कोविडची सौम्य लक्षणे असलेल्या मुलांची तपासणी करण्याबाबत महापालिकेच्या वतीने लवकरच यादी प्रसिद्ध करण्यात येईल. शहरातील लहान मुलांसाठी महापालिकेच्या माध्यमातून आयसोलेशन सेंटर सुरू करण्यात येणार आहे. त्यामध्ये वाडिया हॉस्पिटल येथे 50 बाल कोविड बेड, तसेच डफरीन हॉस्पिटल येथे 20 बाल कोविड बेड तयार करण्यात येत आहेत. कोरोनाच्या या दोन्ही लाटेमध्ये लहान मुलांमध्ये जास्त प्रभाव जाणवला नाही. त्यात सोलापूर शहरात आता पर्यंत मृत्यूचे प्रमाण कमी आहे. पण, तीसऱ्या लाटेत लहान मुलांना अधिक धोका असल्याचा अंदाज वैद्यकीय तज्ञांनी वर्तवला आहे, त्यामुळे कोरोनाच्या तीसऱ्या लाटेला रोखण्यासाठी विविध उपाययोजना किंवा पूर्वनियोजन केले जात आहे.
