नांदेडमध्ये ६५ टक्के मतदान; भोकरमध्ये सर्वाधिक, तर नांदेड उत्तरमध्ये सर्वात कमी मतदान

सोमवारी सकाळी ७ वाजताच जिल्ह्यातील एकूण २ हजार ९५५ मतदानकेंद्रांवर मतदानाला सुरुवात झाली होती. मात्र, पहाटेपासूनच सर्वत्र पाऊस सुरू असल्यामुळे मतदानासाठी मतदार घराबाहेर पडले नव्हते. त्यामुळे मतदान केंद्रांवर मतदारांची संख्या कमी असल्याचे दिसून आले. त्यानंतर काही वेळ पाऊस थांबल्यामुळे सांयकाळच्या सुमारास मतदानाची टक्केवारी वाढण्यास मदत झाली.

नांदेड - विधानसभा निवडणुकीसाठीची मतदान प्रक्रिया सोमवारी पार पडली. त्यामध्ये जिल्ह्यातील ९ विधानसभा मतदारसंघात सोमवारी एकूण सरासरी ६५ टक्के मतदान झाले. सर्वाधिक मतदान भोकर मतदारसंघात ७८. ११ टक्के झाले. त्यापाठोपाठ हदगावमध्ये ७०.६८ टक्के, नायगावमध्ये ७०. ०३ टक्के एवढे मतदान झाले.