Mumbai News : 5.56 किलोमीटर लांबीचा पूल मुंबईकरांसाठी बांधला जाणार, जाणून घ्या वैशिष्ट्ये

आता मुंबईकरांची ट्राफिकची समस्या काहीशा प्रमाणात दूर होणार आहे. ग्रँडरोड ते फ्री वे दरम्यान तब्बल ५.५६ किलोमीटर लांबीचा पूल मुंबईकरांसाठी बांधला जाणार आहे. ५५६० मीटर लांबीचा हा पूल प्रत्यक्षात आणण्यासाठी निविदा नुकतीच प्रकाशित झाली आहे.

मुंबई : मुंबईमध्ये ट्राफिकची समस्या नेहमीच असते. यामुळे नागरिकांना एखाद्या नियोजित स्थळी जाण्यासाठी हमखास उशीर होतो. यावर उपाय म्हणून मुंबई महापालिकेने दक्षिण मुंबईतील ग्रँडरोड ते फ्री वे यादरम्यान ६४८ कोटी रुपये खर्च करून ५.६ किलोमीटरचा पूल उभारण्याचा निर्णय घेतला आहे. त्यासाठी निविदा काढल्या आहेत. यामुळे ग्रँड रोड ते फ्री वे दरम्यानचे अंतर अवघ्या सहा ते सात मिनिटात पार करता येणार असल्याचा दावा महानगरपालिकेने केला आहे.

४२ महिन्यात पूल पूर्ण होणार : मुंबईकरांचा प्रवास अधिक सुखकर आणि सुरळीत व्हावा, यासाठी महानगरपालिका प्रशासन सातत्याने विविध प्रयत्न करत असते. याच प्रयत्नांचा एक भाग म्हणून लवकरच तब्बल ५.५६ किलोमीटर लांबीचा पूल मुंबईकरांसाठी बांधला जाणार आहे. ५५६० मीटर लांबीचा हा पूल प्रत्यक्षात आणण्यासाठी निविदा नुकतीच प्रकाशित झाली आहे. निविदा प्रक्रियेनंतर प्रत्यक्ष बांधकामास सुरुवात झाल्यापासून बांधकाम पूर्ण होण्यासाठी साधारणपणे ४२ महिन्यांचा कालावधी अंदाजित आहे, अशी माहिती बृहन्मुंबई महानगरपालिकेच्या पूल विभागाकडून देण्यात आली आहे.