जमील कॉलनी परिसरात विद्यार्थ्यांच्या अपहरणाचा प्रयत्न, प्रकार सीसीटीव्हीत कैद

मदरशाकडे जाणाऱ्या विद्यार्थ्याचे एका दुचाकीस्वाराकडून अपहरण करुन पळवण्याचा प्रकार सीसीटीव्हीमध्ये कैद झाला असून मुलाने अपहरणकर्त्याच्या तावडीतून स्वत:ला सोडवित तेथून पळ काढला.

अमरावती - बुधवारी सायंकाळी जमील कॉलनी परिसरात मदरशामध्ये जाणाऱ्या विद्यार्थ्याचा एका दुचाकीस्वाराने अपहरण करण्याचा प्रयत्न केला. हा संपूर्ण थरार सीसीटीव्ही मध्ये कैद झाला असून या घटनेमुळे जमील कॉलनी, बिस्मिल्ला नगर परिसरात खळबळ उडाली आहे.

मोहम्मद जावेद मोहम्मद शकील हा ज्ञानमाता हायस्कूलमध्ये पाचव्या इयत्तेत शिकणारा विद्यार्थी बुधवारी सायंकाळी 7.30 वाजता जमील कॉलनी येथील मदरशात जात होता. यावेळी एका अनोळखी दुचाकीस्वाराने त्याला पेट्रोलपंप कुठे आहे असे विचारले. मोहम्मदने पेट्रोलपंप समोर असल्याचे सांगितल्यावर दुचाकीस्वाराने त्याला दुचाकीवर बसायला सांगितले. नंतर मदरसा आल्यानंतर मुलाने मला उतरायचे आहे असे सांगितले. तरीही दुचाकीस्वाराने दुचाकी थांबवली नसल्याने त्याने दुचाकीवरून उडी मारत पळण्याचा प्रयत्न केला. यावेळी दुचाकीस्वाराने त्याला पकडले व मारहाण करायला सुरुवात केली. मुलाने कसेबसे स्वत:ला सोडवत तेथून पळ काढला. हा संपूर्ण प्रकार सीसीटीव्हीमध्ये कैद झाला.

मोहम्मद जावेदचे वडील मोहम्मद शकील यांनी या प्रकरणाची तक्रार नागपुरी गेट पोलीस ठाण्याला दिली. पोलिसांनी अपहरणाच्या प्रयत्नाचा गुन्हा दाखल केला असून त्या अनोळखी दुचाकीस्वाराचा शोध घेणे सुरु आहे.