अहमदनगर- "आमदार स्नेहलता कोल्हे ही माझी भाची आहे. त्यामुळे तीच्या मागे मला उभे राहवेच लागेल. कोल्हे मोठ्या मताधिक्याने निवडूण येतील", असा निर्धार राधाकृष्ण विखे पाटील यांनी व्यक्त केला. कोपरगावात आज मुख्यमंत्री देवेंद्र फडणवीस यांनी भाजपच्या उमेदवार स्नेहलता कोल्हे यांच्या प्रचारासाठी जाहीर सभा घेतली. यावेळी विखे बोलत होते. मात्र, दुसरीकडे विखेंचे मेव्हणे राजेश परजणे कोल्हेंच्या विरोधात अपक्ष उभे असल्याने कोपरगावात कोणत्या नात्या-गोत्याचा फॅक्टर चालणार यावर आता चर्चा रंगणार आहेत.
राधाकृष्ण विखे-पाटील भाची मागे उभे राहणार, मग मेव्हण्यांच्या मागे कोण ? हेही वाचा- वूहान परिषद ते महाबलीपूरम बैठक, भारत चीनमधील ज्वलंत प्रश्न 'जैसे थे'
कोपरगाव विधानसभा मतदार संघात नेहमीच काळे आणि कोल्हे या दोन घराण्यात राजकीय लढाई राहीली आहे. मात्र, या मतदार संघातील विखे गट कोणाच्या मागे उभा राहातो, हे नेहमी महत्वाच राहीलं आहे. कोपरगाव तालुक्यातील संवत्सर ही विखे पाटलांची सासुरवाडी आहे. त्यामुळे कोपरगावच्या राजकारणात परजणे गट आपले राजकीय अस्तीत्व दाखवत राहीला आहे. राधाकृष्ण विखे पाटलांनी भाजपात प्रवेश केला. त्यानंतर आता विखे आणि परजणे गट भाजपाच्या उमेदवार स्नेहलता कोल्हे यांच्या मागे उभे राहील, असे वाटत असतानाच राधाकृष्ण विखेंचे मेव्हणे राजेश परजणे यांनी या मतदार संघातून अपक्ष उमेदवारी कायम ठेवली आहे. दुसरीकडे मात्र आज विखेंनी भाजपाच्या उमेदवार स्नेहलता कोल्हे ही माझी भाची आहे. त्यामुळे मला तीच्या मागे उभच रहाव लागेल, असं वक्तव्य केल आहे.
मुख्यमंत्र्यांनीही आपल्या भाषणात 'स्नेहलता कोल्हे यांना 2014 साली 30 हजार मते मिळाली होती. आता विखे पाटील मामा कोल्हे बरोबर आहेत. त्यामुळे त्यापेक्षा अधिक मतांनी त्या निवडणून येतील', असा विश्वास व्यक्त केला आहे. कोपरगावात यंदा चौरंगी लढत होत आहे. त्यात कोल्हेच्या विरोधात भाजपचे दोन बंडखोर उभे आहेत. यातील परजणे आणि वहाडणे हेही मतदार संघात चांगली फाईट देत आहेत. त्यामुळे आजच विखेंच वक्तव्य महत्वाचं असणार आहे.
