वेलिंग्टन - कोरोना विषाणूच्या वाढत्या धोक्यामुळे ऑस्ट्रेलिया- न्यूझीलंड यांच्यातील चॅपेल-हॅडली एकदिवसीय मालिका रद्द करण्यात आली. यानंतर न्यूझीलंडचा संघ मायदेशी परतला आहे. पण, न्यूझीलंड क्रिकेट बोर्डाने संघातील सर्व खेळाडूंना १४ दिवस एकांतवासात राहण्याचे निर्देश दिले आहेत.
न्यूझीलंड बोर्डाने एक निवेदन जाहीर केलं आहे. त्यानुसार, सिडनीहून परत आलेल्या सर्व १५ खेळाडू आणि सहाय्यक कर्मचार्यांना त्यांच्या घरीच रहावे लागेल. न्यूझीलंडची पंतप्रधान जॅकिंडा आर्डर्न यांनी १८ मार्च रोजी दिलेल्या सूचनांच्या आधारे हा निर्णय घेण्यात आला आहे.
याविषयी न्यूझीलंड क्रिकेटचे पब्लिक अफेयर्स मॅनेजर रिचर्ड ब्रूक यांनी सांगितलं की, 'ऑस्ट्रेलिया दौऱ्यातील न्यूझीलंडचा संघ आणि सहाय्यक कर्मचाऱ्यांना एकांतवासात राहण्याचे निर्देश देण्यात आले आहेत. ते या नियमांचे काटेकोरपणे पालन करत आहेत.'