मुंबई - 'दबंग' आणि 'दबंग २' या चित्रपटांना मिळालेल्या तुफान यशानंतर आता या चित्रपटाचा तिसरा भाग प्रेक्षकांच्या भेटीला येणार आहे. 'दबंग ३' असं शीर्षक असलेल्या या चित्रपटात इतर दोन्ही भागांप्रमाणेच सलमान आणि सोनाक्षीची जोडी झळकणार आहे.
काही दिवसांपूर्वीच सोनाक्षीचा या चित्रपटातील एक फोटो शेअर करण्यात आला होता. चित्रपटात ती सलमानच्या पत्नीची म्हणजेच रज्जो ही भूमिका साकारणार आहे. आता सोनाक्षीने चित्रपटाच्या सेटवरील आणखी एक फोटो आपल्या इन्स्टाग्रामवरून शेअर केला आहे.
या फोटोत सोनाक्षी काळ्या रंगाच्या आऊटफिटमध्ये दिसत आहे. तर तिच्या केसांची वेणी आणि मेकअप प्रेक्षकांची मनं जिंकत आहे. इतर दोन्ही भागांप्रमाणेच यावेळीही प्रेक्षकांची मने जिंकण्यात सोनाक्षी यशस्वी ठरेल, असं म्हणणं वावगं ठरणार नाही. या चित्रपटाचं दिग्दर्शन प्रभूदेवा करत आहे. तर सलमान खान आणि अरबाज खान यांच्या प्रोडक्शन हाऊसद्वारे चित्रपटाची निर्मिती करण्यात येणार आहे. यंदाच्या डिसेंबरमध्ये २० तारखेला हा सिनेमा प्रेक्षकांच्या भेटीला येणार आहे.
