मुंबई - अभिनेत्री कॅटरिना कैफ पुन्हा एकदा सलमानसोबत स्क्रीन शेअर करताना दिसणार आहे. 'भारत' चित्रपटातून सिनेमागृहं गाजवण्यासाठी ही जोडी सज्ज झाली आहे. हा चित्रपट येत्या ५ जूनला म्हणजेच ईदच्या दिवशी प्रदर्शित होणार असून चित्रपटानं कॅटरिनाची झोप उडवली आहे.
कॅटरिनाने शनिवारी मुंबईतील एका अॅवॉर्ड शोमध्ये हजेरी लावली होती, यावेळी तिने मीडियासोबत संवाद साधला. या चित्रपटाच्या प्रदर्शनासाठी आपण खूप उत्सुक असून प्रदर्शनाची तारीख जसजशी जवळ येत आहे, तशी आपली झोप उडाली असल्याचे कॅटरिनाने म्हटले आहे. यासोबतच चित्रपटाला प्रेक्षकांचा कसा प्रतिसाद मिळतो याबद्दलही उत्सुकता असल्याचे तिने सांगितले.
चित्रपटाच्या बॉक्स ऑफिस कलेक्शबद्दलच्या अपेक्षा विचारल्या असता हे सांगणं फार कठीण असल्याचं तिनं म्हटलं आहे. प्रेक्षकांचं प्रेम आणि प्रतिसाद मिळाल्यास चित्रपट नक्कीच चांगली कमाई करेल, असा विश्वास तिने व्यक्त केला. या चित्रपटात दरम्यान सलमान आणि कॅटरिनाशिवाय जॅकी श्रॉफ आणि दिशा पटानी यांच्याही महत्त्वाच्या भूमिका आहेत. सलमान आणि कॅटरिनाच्या जोडीला पुन्हा एकत्र पाहण्यासाठी प्रेक्षकही आतुर आहेत.
