मध्यंतरीच्या काळात हॉलीवूडप्रमाणेच बॉलिवूडमध्येसुद्धा चित्रपट 3D मध्ये प्रदर्शित करण्याची टूम निघाली होती, याचे कारण म्हणजे काही 3D चित्रपटांना मिळालेला अमाप प्रतिसाद. या ‘थर्ड डायमेन्शन’, ‘तिसरा आयाम’ म्हणजेच 3D मुळे तरुण प्रेक्षकवर्ग, खासकरून लहान मुले, चित्रपटाकडे आकर्षित होतात असे मानले जाते. सध्याच्या कोरोना काळात चित्रपटगृहे कित्येक महिने बंद आहेत आणि ‘पिक्चर देखनेका असली मझा थेटरमेंही आता हैं’ यावर प्रेक्षक आणि बॉलिवूडकरांचे एकमत आहे. त्यामुळे संपूर्ण चित्रपटसृष्टी चित्रपटगृहे उघडण्याची वाट पहात आहे. गेल्यावर्षीच्या सुरुवातीपासूनच अनेक तयार चित्रपटांचे प्रदर्शन-वेळापत्रक कोलमडले आहे ज्यात, 83, सूर्यवंशी सारखे, मोठे चित्रपटही आहेत.
अक्षय कुमार एक असा अभिनेता, आणि आता निर्माताही, आहे जो चित्रपट बनविणे आणि प्रदर्शित करणे यावर जास्त वेळ खर्च करीत नाही. भले त्याची भूमिका असलेला ‘लक्ष्मी’ आणि त्याने निर्मिती केलेला भूमी पेडणेकर अभिनित ‘दुर्गामती’ ओटीटी वर रिलीज झालेले असो तोसुद्धा सिनेमाहॉल्स उघडण्याची वाट पाहतो आहे. एक तर तो त्याची प्रमुख भूमिका असलेला रोहित शेट्टी दिग्दर्शित ‘सूर्यवंशी’ प्रदर्शनाची वाट पाहतोय आणि लॉकडाऊन शिथिल झाल्याझाल्या त्याने पूर्ण केलेला पहिला चित्रपट ‘बेलबॉटम’ त्याला चित्रपटगृहांतच प्रदर्शित करायचा आहे. ‘बेलबॉटम’ ओटीटी वर जाणार अश्या वावड्या उठतात असताना त्याने तो २७ जुलैला प्रदर्शित होईल अशी घोषणा केली होती. परंतु कोरोनाच्या दुसऱ्या लाटेने ती तारीख पुढे ढकलली गेली आता आता हा चित्रपट १९ ऑगस्टला प्रदर्शित होणार आहे, चित्रपटगृहांत.
अक्षय कुमारने अजून एक खास घोषणा केलीय आणि ती म्हणजे ‘बेलबॉटम’ हा 3D फॉरमॅटमध्ये चित्रपटगृहांमध्ये दाखविला जाणार आहे. कोरोना जरी आटोक्यात येतोय असे वाटत असले तरी तो समूळ नष्ट झालेला नाहीये आणि त्याची लहान-मोठी ‘भावंडे’ जगात आणि भारतातही लोकांना जेरीस आणत आहेत. 3D सोबत हा चित्रपट 2D मध्येसुद्धा प्रदर्शित होणार आहे. या घोषणेने समस्त बॉलिवूडकरांमध्ये आनंदाची लहर जागली असून सर्वकाही नॉर्मल होण्याची ही नांदी आहे असे समजले जातेय.
अक्षयकुमारची मुख्य भूमिका असलेल्या ‘बेलबॉटम’ या चित्रपटात वाणी कपूर, लारा दत्ता आणि हुमा कुरेशी यांच्याही महत्वपूर्ण भूमिका आहेत. पूजा एंटरटेनमेंट व एम्मी एंटरटेनमेंटच्या संयुक्त विद्यमाने 'बेलबॉटम' ची निर्मिती करण्यात आली असून याचे दिग्दर्शन केलेय रणजीत एम तिवारी यांनी. असीम अरोरा आणि परवीज शेख लिखित 'बेलबॉटम' ची निर्मिती केली आहे वाशु भगनानी, जॅकी भगनानी, दीपशिखा देशमुख, मोनिशा अडवाणी, मधु भोजवानी आणि निखिल अडवाणी यांनी व तो प्रदर्शित होतोय 2D आणि 3D मध्ये १९ ऑगस्ट २०२१ रोजी.
अर्थातच पुढच्या काळात काय वाढून ठेवलंय ते काळ आणि कोरोनाच जाणे.
