पणजी (गोवा) - बाणावली बलात्कार घटनेबद्दल केलेल्या चुकीच्या विधानावरून मुख्यमंत्री डॉ. प्रमोद सावंत टीकेचे धनी ठरले आहेत. चहुबाजूंनी वाढलेला विरोध पाहून मुख्यमंत्र्यांनी आपल्या मुलीचा दाखला देत, आपण ते विधान राज्यातील मुलींच्या काळजीपोटी केलं असून या प्रकरणी दुखावलेल्या जनतेची आपण माफी मागत असल्याचे सावंत म्हणाले.
बाणावली समुद्रकिनारी 2 अल्पवयीन मुलींवर बलात्काराच्या प्रकरणावरून विधानसभेत मुख्यमंत्री डॉ प्रमोद सावंत यांनी अशा घटना घडू नये म्हणून पालकांनी आपल्या मुलांची योग्य ती काळजी घ्यावी. प्रत्येक वेळेस पोलिस किंवा सरकार यांवर अवलंबून राहू नये असे खेदजनक वक्तव्य केले होते. त्यावरून विधानसभेच्या पावसाळी अधिवेशनात राजकारण सुरू झाले. विरोधकांनी मुख्यमंत्री प्रमोद सावंत यांच्या राजीनाम्याची मागणी करत, महिला सुरक्षित नसल्याचा आरोपही केला.
काय आहे प्रकरण ?
२५ जुलैला गोव्याच्या बेनॉलिम बीचवर १४ वर्षांच्या दोन अल्पवयीन मुलींवर सामुहिक लैंगिक अत्याचाराची घटना घडल्याचा प्रकार उघडकीस आला आहे. या प्रकरणी गोव्याच्या विधानसभेत हा प्रश्न उपस्थित झाल्यानंतर मुख्यमंत्री प्रमोद सावंत यांनी या घटनेबद्दल मुलींच्या आईवडिलांनाही दोष दिला होता. 'रात्री अपरात्री मुलींना बाहेर सोडताना आईवडिलांनी विचार करायला हवा. केवळ सरकार आणि पोलिसांना दोष देऊन चालणार नाही. १४-१५ वर्षांच्या मुली रात्रभर बीचवर थांबत असतील तर पालकांनी विचार करण्याची गरज आहे. अल्पवयीन मुलांना बाहेर सोडताना पालकांनीही जबाबदारी घ्यावी,' असे त्यांनी म्हटले होते.
हेही वाचा - लैंगिक अत्याचार प्रकरण : 'गोव्याच्या मुख्यमंत्र्यांचं वक्तव्य महिलांच्या मानवी हक्कांचं उल्लंघन करणारं'
