मुंबई - पद्मविभूषण आणि प्रसिद्ध शास्त्रीय गायक उस्ताद गुलाम मुस्तफा खान यांच्या पार्थिवावर रविवारी रात्री सांताक्रुझमध्ये शासकीय इतमामात अंतिम संस्कार करण्यात आले. त्यांचे रविवारी राहत्या घरी निधन झाले. ते ८९ वर्षांचे होते.
वांद्र्यातील घरी उस्ताद गुलाम मुस्तफा खान यांनी रविवारी शेवटचा श्वास घेतल्याची माहिती त्यांच्या स्नुषा नम्रता गुप्ता-खान यांनी दिली. त्यांनी सांगितले की, उस्ताद गुलाम मुस्तफा खान यांची सकाळी तब्येत चांगली होती. घरात २४ तास परिचारिका असते. दुपारी मसाज करताना त्यांना उलटी झाली. ताबडतोब मी धाव घेतले, त्यांचे डोळे बंद होते. त्यांचा श्वास संथपणे चालू होता. डॉक्टरांशी संपर्क साधला. पण, ते येण्यापूर्वी त्यांचा मृत्यू झाल्याचे नम्रता यांनी सांगितले. तब्येत चांगली असताना त्यांचे अचानक निधन झाल्याने कुटुंबाला धक्का बसला आहे. ते ३ मार्चला वयाची नव्वदी पूर्ण करणार होते.
उस्ताद गुलाम मुस्तफा खान यांना २०१९ मध्ये ब्रेन स्ट्रोकचा त्रास झाला होता. त्यानंतर शरीराच्या डावा भागाला अर्धांगवायू झाला होता. खान यांच्यावर सांताक्रुझ येथील कब्रस्तानमध्ये अंतिम संस्कार करण्यात आले. प्रसिद्ध गायिका लता मंगेशकर आणि संगीतकार ए. आर. रहमान यांनीही समाज माध्यमात उस्ताद गुलाम मुस्तफा खान यांच्या निधनावर शोक व्यक्त केला आहे.
