अमरावती - 'मेरे खाबो मे खायलो मे हो तुम' या अमरावतीकर कलावंतांच्या गाण्याची सोशल मीडियावर सध्या धूम पाहायला मिळत आहे. गाण्याचे गीतकार, संगीतकार, गायक, दिग्दर्शक आणि कलावंत ( Amravatis Artistes ) अशी संपूर्ण टीम ही अमरावतीची असून या गाण्याचे संपूर्ण चित्रीकरण देखील अमरावती शहरात झाले आहे. ( Amravatis Artistes Songs Are Popular On Social Media )
कलावंतांच्या प्रयत्नाने साकारली कलाकृती - अमरावती शहरातील कापड व्यवसायी आणि हौशी कलावंत असणारे रितेश मेहता यांना एक कथानक असल्याचे गाणे निर्माण व्हावे अशी कल्पना सुचली. त्यांनी ही कल्पना अमरावती शहरातील जय बाबा स्टुडिओचे संचालक ऋषी दारा यांच्याकडे मांडली. आजवर अनेक भजन रचणारे आणि त्याला संगीतबद्ध करणारे ऋषी दारा यांनी रितेश मेहता यांची कल्पना समजून घेतली आणि त्या कल्पनेवर आधारित गीत रचले.यानंतर संविधान मनोहरे या गायकाकडून हे गीत गाऊन घेतले.आजवर अनेक भजन गाणारे संविधान मनोहरे यांनी पहिल्यांदाच रोमॅण्टिक पद्धतीचे गाणे गायले.गाणे तयार झाल्यावर आता या गाण्याच्या आधारावर रोमांटीक कथानक रितेश मेहता यांनी रचले आणि सागर उदासी या दिग्दर्शकाकडून सहा ,मिनिटांचा खास अशा म्युझिक व्हिडिओची निर्मिती करण्यात आली.यामध्ये कलावंत म्हणून स्वतः रितेश मेहता आणि मॉडेल खुशबू पटारीया प्रमुख भूमिकेत असून यांच्यासह गिरीश नारायण आणि बेबी रचना यांचा छोटासा अभिनय देखील या संगीत व्हिडिओ पाहायला मिळतो.
