नंदीग्राम (पश्चिम बंगाल) - पश्चिम बंगालच्या मुख्यमंत्री ममता बॅनर्जी जखमी झाल्या आहेत. त्या आज नंदीग्राममध्ये प्रचार दौरा करत होत्या. यात प्रचार दौऱ्यादरम्यान त्यांना दुखापत झाली. दरम्यान, ममता यांनी विरोधकांनी माझ्यावर हा हल्ला घडवून आणल्याचा आरोप केला आहे.
पश्चिम बंगालमध्ये विधानसभा निवडणुकीचे पडघम वाजले आहे. तृणमूल काँग्रेस आणि भाजप या दोन पक्षामध्ये सरळ लढत पाहायला मिळत आहे. भाजपच्या वरिष्ठ नेत्यांनी बंगालमध्ये प्रचाराचा धुराडा उडवला आहे. तर दुसरीकडे ममता यांनी देखील जोरात प्रचार दौरा सुरू केला आहे.
ममता बॅनर्जी आज नंदीग्राम येथे प्रचारासाठी आल्या होत्या. या प्रचारादरम्यान, त्यांना दुखापत झाली. ममता यांनी सांगितलं की, 'त्या जेव्हा आपल्या गाडीकडे निघाल्या होत्या. तेव्हा काही लोकांनी त्यांना धक्का देत खाली पाडलं.'