സിഹാന്‍ വസുധയുടെ കുഞ്ഞുങ്ങള്‍ ആദ്യമായി സന്ദര്‍ശകര്‍ക്കു മുന്നില്‍, സൂറത്ത് മൃഗശാലയില്‍ നിന്നുള്ള കാഴ്‌ച

സൂറത്ത് (ഗുജറാത്ത്): മാസങ്ങള്‍ക്ക് ശേഷം ഇന്ന് (01.09.22) സൂറത്തിലെ മൃഗശാലയില്‍ സന്ദര്‍ശകരെ സ്വീകരിക്കാന്‍ സിഹാന്‍ വസുധയുമുണ്ട്. എന്നാല്‍ ഇത്തവണ അവള്‍ ഒറ്റക്കല്ല സന്ദര്‍ശകര്‍ക്ക് മുന്നിലെത്തിയത്. ഒപ്പം അവളുടെ മൂന്ന് പൊന്നോമനകളും. സിഹാന്‍ വസുധ എന്ന പെണ്‍ സിംഹത്തിന്‍റെ മൂന്നു കുഞ്ഞുങ്ങളും ആദ്യമായാണ് പുറം ലോകം കാണുന്നത്. ജനിച്ചിട്ട് 90 ദിവസം കഴിഞ്ഞെങ്കിലും ഇന്നാണ് അമ്മ സിംഹത്തിനൊപ്പം മൂന്ന് കുട്ടികളും പുറത്തിറങ്ങിയത്. മൂന്നു മാസത്തോളം അമ്മയും കുഞ്ഞുങ്ങളും ഡോക്‌ടര്‍മാരുടെ പ്രത്യേക നിരീക്ഷണത്തില്‍ കഴിയുകയായിരുന്നു. ഓഗസ്റ്റ് 31നാണ് നാലു പേര്‍ക്കും വാക്‌സിനേഷന്‍ നല്‍കിയത്. മറ്റു ആരോഗ്യ പ്രശ്‌നങ്ങള്‍ ഒന്നും ഇല്ലാത്ത അമ്മയെയും കുഞ്ഞുങ്ങളെയും ഇന്ന് മൃഗശാലയില്‍ സന്ദര്‍ശകര്‍ക്കു മുന്നില്‍ പ്രദര്‍ശിപ്പിച്ചു.