കൊല്ലം: സംസ്ഥാന ഗ്രാമവികസന വകുപ്പിൽ യോഗ്യത ഇല്ലാത്തവർക്ക് നിയമവിരുദ്ധമായി സ്ഥാനക്കയറ്റം നൽകിയതില്‍ അഴിമതിയെന്ന് ആരോപണം. വകുപ്പുതല പരീക്ഷ പാസാകാതെ ഉന്നത ഉദ്യോഗസ്ഥരെ സ്വാധീനിച്ച് ഒരു വിഭാഗം ജീവനക്കാർ വി ഇ ഒ ഗ്രേഡ് 1 സ്ഥാനക്കയറ്റം നേടിയതാണ് വിവാദമാകുന്നത്. വില്ലേജ് എക്സ്റ്റൻഷൻ ഓഫീസർ ഗ്രേഡ്- 2 ആയി നിയമനം ലഭിക്കുന്നവർ ആറുമാസത്തെ പ്രീ സർവീസ് ട്രെയിനിങ്ങില്‍ പങ്കെടുക്കണമെന്നും തുടര്‍ന്ന് നടക്കുന്ന പരീക്ഷകളിൽ വിജയിച്ചാൽ മാത്രമേ ഈ തസ്തികയിൽ പ്രൊബേഷൻ ഡിക്ലയർ ചെയ്യുകയുള്ളൂ എന്നുമാണ് ചട്ടം. രണ്ടുവർഷം മുമ്പുവരെ പ്രീ സർവീസ് ട്രെയിനിങ് ആയിരുന്നുവെങ്കിൽ ഇപ്പോൾ അത് ഇൻ സർവീസ് ട്രെയിനിങ് ആയാണ് നടത്തുന്നത്. പ്രൊബേഷൻ ഡിക്ലയർ ചെയ്താൽ മാത്രമേ ഇത്തരക്കാർക്ക് വി ഇ ഒ ഗ്രേഡ് 1 ആയി സ്ഥാനക്കയറ്റം ലഭിക്കുകയുള്ളൂ. പരീക്ഷ ജയിച്ച വിവരം സർവ്വീസ് ബുക്കിലും രേഖപ്പെടുത്തും. ഒരാൾ പരീക്ഷ തോറ്റാൽ അയാൾ വീണ്ടും പരീക്ഷ എഴുതി പാസാകുന്ന തീയതി വച്ച് പ്രൊബേഷൻ ഡിക്ലയർ ചെയ്യും.
അർഹതപ്പെട്ട മറ്റ് ഉദ്യോഗസ്ഥരുടെ സ്ഥാനക്കയറ്റം തടഞ്ഞു വച്ചപ്പോഴാണ് കള്ളക്കളി പുറത്തായത്. 14 ജില്ലകളിലായി 152 ബ്ലോക്കുകളിൽ എക്സ്റ്റൻഷൻ ഓഫീസർ, ജോയിൻ ബി ഡി ഒ തസ്തികകളിൽ നിലവിലുള്ള 650 ഉദ്യോഗസ്ഥരുടെ സർട്ടിഫിക്കറ്റ് പരിശോധിച്ചാൽ അഴിമതി വ്യക്തമാകുമെന്നും കഴിയുമെന്നും പരാതിക്കാർ പറയുന്നു.
