എറണാകുളം : മുഖ്യമന്ത്രിയുടെ ദുരിതാശ്വാസ നിധി ദുരുപയോഗം നടത്തിയെന്ന കേസ് ഫുൾ ബെഞ്ചിന് വിട്ട ലോകായുക്ത രണ്ടംഗ ബെഞ്ചിന്‍റെ ഉത്തരവിൽ ഇടപെടാൻ വിസമ്മതിച്ച് ഹൈക്കോടതി. ദുരിതാശ്വാസ നിധി ദുരുപയോഗം ചെയ്‌തെന്ന മുഖ്യമന്ത്രി പിണറായി വിജയനും 18 മന്ത്രിമാർക്കുമെതിരായ കേസ് ഫുൾ ബെഞ്ചിനു വിട്ട ലോകായുക്ത രണ്ടംഗ ബെഞ്ചിന്‍റെ നടപടി റദ്ദാക്കണമെന്നാവശ്യപ്പെട്ടുള്ള ഹർജിയിലാണ് ഹൈക്കോടതി ഡിവിഷൻ ബെഞ്ച് ഇടപെടാൻ വിസമ്മതിച്ചത്. ഹൈക്കോടതി ചീഫ് ജസ്റ്റിസ് എസ് വി ഭാട്ടി അധ്യക്ഷനായ ഡിവിഷൻ ബെഞ്ച് ഹർജി ജൂൺ ഏഴിലേക്ക് മാറ്റി.
ലോകായുക്ത തീരുമാനത്തിനെതിരെ പരാതിക്കാരനായ ആര്‍ എസ് ശശികുമാറാണ് ഹൈക്കോടതിയെ സമീപിച്ചത്. ജൂൺ ആറിനാണ് കേസ് ലോകായുക്ത ഫുൾ ബെഞ്ച് പരിഗണിക്കുന്നത്. ലോകായുക്തയും രണ്ട് ഉപലോകായുക്തമാരും ഉൾപ്പെട്ട മൂന്നംഗ ബെഞ്ചാണ് കേസ് പരിഗണിക്കുക.
പരേതനായ എൻ.സി.പി.നേതാവ് ഉഴവൂർ വിജയന്‍റെ മക്കളുടെ വിദ്യാഭ്യാസ ചെലവുകൾക്ക് 25 ലക്ഷവും പരേതനായ ചെങ്ങന്നൂർ എം.എൽ.എ. കെ.കെ. രാമചന്ദ്രൻ നായരുടെ മകന് അസിസ്റ്റന്‍റ് എൻജിനീയർ ജോലിക്ക് പുറമേ ഭാര്യയുടെ സ്വർണപ്പണയം തിരിച്ചെടുക്കുന്നതിനും കാർ വായ്‌പയ്ക്കുമായി എട്ടര ലക്ഷവും അനുവദിച്ചതിൽ അഴിമതി ആരോപിച്ചായിരുന്നു ലോകായുക്തയ്‌ക്ക് മുന്നിലെ പരാതി. കോടിയേരി ബാലകൃഷ്‌ണന്‍റെ പൈലറ്റ് വാഹനം അപകടത്തിൽപ്പെട്ട് മരിച്ച സിവിൽ പൊലീസ് ഓഫിസറുടെ ഭാര്യക്ക് സർക്കാർ ഉദ്യോഗത്തിനും മറ്റ് ആനുകൂല്യങ്ങൾക്കും പുറമേ 20 ലക്ഷം രൂപ അനുവദിച്ചതിനെതിരെയും പരാതിയിൽ അഴിമതി ആരോപണം ഉന്നയിച്ചിരുന്നു.
വിശദീകരണം നൽകി ലോകായുക്ത : ദുരിതാശ്വാസ നിധി കേസിൽ കഴിഞ്ഞ മാസം ലോകായുക്ത നാല് പേജുള്ള വിശദീകരണ കുറിപ്പ് നൽകിയിരുന്നു. മുഖ്യമന്ത്രി വിളിച്ച ഇഫ്‌താറിൽ പങ്കെടുത്തതിനുൾപ്പടെ ലോകായുക്ത വിശദീകരണം നൽകി. ലോകായുക്തയിലെ ജഡ്‌ജിമാരെ കുറിച്ച് തെറ്റിദ്ധാരണാജനകമായ വാർത്തകൾ ഉയരുന്നതിലാണ് ഇത്തരത്തിൽ ഒരു വിശദീകരണ കുറിപ്പെന്നും ലോകായുക്ത വ്യക്തമാക്കിയിരുന്നു.
മന്ത്രിസഭ തീരുമാനങ്ങൾ ലോകായുക്ത പരിധിയിൽ വരുമോ എന്നും അർഹതയില്ലാത്തവർക്ക് പണം അനുവദിച്ചോ എന്നുമാണ് വിഷയത്തിൽ ഉയർന്നുവന്ന ചോദ്യങ്ങൾ. എന്നാൽ ആദ്യം ഇത് പരിഗണിച്ച ലോകായുക്തയും ഉപലോകായുക്തയും തമ്മിൽ ഭിന്നാഭിപ്രായം ഉണ്ടായ സാഹചര്യത്തിൽ കേസ് ഫുൾ ബെഞ്ചിന് വിടുകയായിരുന്നു. അതേസമയം കേസിൽ രണ്ടംഗ ബെഞ്ച് വിധിന്യായം എഴുതിയില്ലെന്ന ആക്ഷേപം കഴമ്പില്ലാത്തതാണെന്നും കേസ് ഫുൾബെഞ്ചിന് വിടുമ്പോൾ വിധിന്യായം പ്രത്യേകം എഴുതണമെന്ന് നിയമത്തിൽ പറഞ്ഞിട്ടില്ലെന്നും ലോകായുക്ത വ്യക്തമാക്കി.
also read : ദുരിതാശ്വാസ നിധി വകമാറ്റിയെന്ന കേസ്: ഇഫ്‌താര്‍ ഉള്‍പ്പടെ ഉയരുന്ന വിമര്‍ശനങ്ങള്‍ക്ക് വിശദീകരണവുമായി ലോകായുക്ത
വിധിയിൽ ഏതെങ്കിലും തരത്തിലുള്ള എതിർപ്പുണ്ടെങ്കിൽ അത് കോടതിയിലാണ് ചോദ്യം ചെയ്യേണ്ടതെന്നും ജഡ്‌ജിമാരെ പൊതുമധ്യത്തിൽ ആക്ഷേപിക്കുന്നത് പ്രതിഷേധാർഹമാണെന്നും കുറിപ്പിൽ പറഞ്ഞിരുന്നു. കൂടാതെ പിണറായി വിജയൻ നടത്തിയ ഇഫ്‌താർ വിരുന്നിലല്ല, മറിച്ച് മുഖ്യമന്ത്രി ആതിഥ്യം നൽകിയ ഔദ്യോഗിക ഇഫ്‌താർ വിരുന്നിലാണ് പങ്കെടുത്തതെന്നും ലോകായുക്ത വിശദീകരണം നൽകി.
