യുവതാരം ഷെയ്‌ൻ നിഗം നായകനാവുന്ന 'വെയിൽ' ചിത്രം വിവാദങ്ങൾക്കൊടുവിൽ ചിത്രീകരണം പൂർത്തിയാക്കി. ചിത്രത്തിന്‍റെ നിർമാണം പൂർണമായും അവസാനിച്ചതായി നിര്‍മാതാവ് ജോബി ജോര്‍ജ് ഫേസ്‌ബുക്കിലൂടെ അറിയിച്ചു. നവാഗതനായ ശരത് സംവിധാനം ചെയ്യുന്ന വെയിൽ ചിത്രത്തിന്‍റെ ഷൂട്ടിങ്ങുമായി ഷെയ്‌ൻ സഹകരിക്കുന്നില്ലെന്ന പ്രശ്‌നത്തിൽ വലിയ വിവാദങ്ങളാണ് മലയാള സിനിമാ മേഖലയിൽ ഉണ്ടായത്. ഇത് താരത്തിനെതിരെ വിലക്ക് ഏര്‍പ്പെടുത്തുന്നത് വരെ എത്തിച്ചിരുന്നു.
"ഇന്ന് വെയിൽ പൂർണമായും ചിത്രീകരണം തീർന്നു.. കാർമേഘങ്ങൾ ഒഴിഞ്ഞു പോയി.. ഈ വെയിൽ പൂർണ്ണ ശോഭയിൽ തെളിയും നിങ്ങൾക്കു മുൻപിൽ ഉടൻ," ഷെയ്‌നിനൊപ്പമുള്ള ഒരു ചിത്രം കൂടി പങ്കുവെച്ചുകൊണ്ടാണ് വെയിൽ ചിത്രീകരണം പൂർത്തിയാത്തിയതിന്‍റെ സന്തോഷം നിർമാതാവ് ജോബി പങ്കുവെച്ചത്. സുരാജ് വെഞ്ഞാറമൂട്, ഷൈന്‍ ടോം ചാക്കോ എന്നിവരാണ് വെയിലിലെ മറ്റു പ്രധാന താരങ്ങൾ. അങ്കമാലി ഡയറീസ് ചിത്രത്തിന്‍റെ സഹസംവിധായകനായിരുന്നു ശരത്.
