ജീവിതഗന്ധിയായ നിരവധി ചിത്രങ്ങളിലൂടെ മലയാള സിനിമാലോകത്ത് ശക്തമായ സാന്നിധ്യം അറിയിച്ച സംവിധായകനാണ് ബ്ലെസി. മലയാളത്തിലെ എക്കാലത്തെയും കൾട്ട് ക്ലാസിക് ചിത്രങ്ങളുടെ തമ്പുരാക്കന്മാരായ പദ്‌മരാജന്‍റെയും ലോഹിതദാസിന്‍റെയും ഭരതന്‍റെയും ഒപ്പം സഹ സംവിധായകനായാണ് ബ്ലെസി തന്‍റെ ചലച്ചിത്ര ജീവിതം ആരംഭിക്കുന്നത്. 'കാഴ്‌ച' ആയിരുന്നു ബ്ലെസിയുടെ സംവിധാനത്തില്‍ പുറത്തിറങ്ങിയ ആദ്യ ചിത്രം (Blessy's directorial debut Kaazhcha).
മലയാളത്തിന്‍റെ മഹാനടൻ മമ്മൂട്ടി നായകനായ 'കാഴ്‌ച' മലയാള സിനിമയ്‌ക്ക് ഒരു പുത്തൻ സിനിമാനുഭവം തന്നെയാണ് സമ്മാനിച്ചത് (Blessy Mammootty Kaazhcha Movie). 2004ലെ ഓഗസ്റ്റ് മാസത്തിലായിരുന്നു ഈ ചിത്രത്തിന്‍റെ റിലീസ്. ഇപ്പോഴിതാ 'കാഴ്‌ച' 19 വർഷം പൂർത്തിയാക്കിയിരിക്കുകയാണ് (19 Years of Kaazhcha).
വൈവിധ്യമാർന്ന കഥകളും മനസിനെ ഉലയ്ക്കു‌ന്ന കഥാപാത്രങ്ങളും കഥാ മുഹൂർത്തങ്ങളുമെല്ലാം ബ്ലെസി ചിത്രങ്ങളുടെ പതിവ് ചേരുവകളാണ്. ആദ്യ ചിത്രമായ 'കാഴ്‌ച' മുതൽ സിനിമാസ്വാദകർ അത് നുണയാൻ തുടങ്ങിയതുമാണ്. കാഴ്‌ചക്കാരന് എളുപ്പം റിലേറ്റ് ചെയ്യാൻ കഴിയുന്ന, സാധാരണക്കാരായ മനുഷ്യരായിരുന്നു ബ്ലെസിയുടെ കഥാപാത്രങ്ങളെല്ലാം (Blessy Mammootty Kaazhcha Movie ).
'കാഴ്‌ച'യിലെ ഫിലിം ഓപ്പറേറ്ററായ മാധവന്‍ നമുക്ക് അപരിചിതനായിരുന്നില്ല. 'കാഴ്‌ച'യുടെ കഥാപരിസരത്തിലേക്ക് എളുപ്പം ഊളിയിടാൻ പ്രേക്ഷകന് സാധിച്ചതിലും ബ്ലെസിയുടെ ക്രാഫ്റ്റ് തന്നെയാണ് കയ്യടി അർഹിക്കുന്നത്.
കണ്ണിൽ നിന്നും മായാതെ ബ്ലെസിയുടെ 'കാഴ്‌ച' : മലയാളികളുടെ ഉള്ളുതൊട്ട ചിത്രമായിരുന്നു 'കാഴ്‌ച'. എന്നും കാഴ്‌ചക്കാരിൽ ഒരു നെടുവീർപ്പ് ബാക്കിയാക്കുന്ന ദൃശ്യഭാഷ്യം. ഇന്നും അതിന്‍റെ ആഴവും പരപ്പും സിനിമാസ്വാദകരുടെ ഉള്ളിൽ തെല്ലും കുറഞ്ഞിട്ടില്ല.
കുട്ടനാട്ടുകാരനായ ഫിലിം ഓപ്പറേറ്റർ മാധവനിലൂടെയാണ് 'കാഴ്‌ച' മിഴി തുറക്കുന്നത്. പിന്നീട് ഗുജറാത്ത് ഭൂകമ്പത്തെ തുടർന്ന് ഉറ്റവരെ നഷ്‌ടമായ പവൻ എന്ന ബാ‍ലൻ മാധവനിലേക്ക് എത്തുന്നതിലൂടെ 'കാഴ്‌ച'യുടെ കഥ തുടങ്ങുകയായി. ദേശമോ ഭാഷയോ അതിവർവരമ്പുകൾ തീർക്കാത്ത ഇവരുടെ ഊഷ്‌മളമായ ബന്ധം കാണികളുടെ ഹൃദയത്തെ ആഴത്തിൽ സ്‌പർശിക്കുന്നതാണ്.
അവിചാരിതമായാണ് പവൻ മാധവന്‍റെ അരികിൽ എത്തിപ്പെടുന്നത്. ഭൂകമ്പത്തെ തുടർന്ന് അനാഥനായി, ഭിക്ഷാടക സംഘത്തിന്‍റെ കയ്യിലകപ്പെട്ട പവൻ അവിടെ നിന്നും രക്ഷപ്പെട്ടാണ് സിനിമാപ്രദർശനം നടത്തി ജീവിക്കുന്ന മാധവന്‍റെ അരികിൽ എത്തിച്ചേരുന്നത്. തുടർന്ന് അയാൾ അവനെ തന്‍റെ വീട്ടിലേക്ക് കൂട്ടിക്കൊണ്ടുപോവുകയാണ്.
പിന്നാലെ കഥാഗതിയിലും ബ്ലെസി മാറ്റം വരുത്തുന്നു. പൊലീസ് സ്റ്റേഷനും അനാഥാലയവും കോടതി മുറിയും ഒക്കെയായി പിന്നീടുള്ള രംഗങ്ങൾ. മാധവന്‍റെ കുടുംബത്തിനൊപ്പം പുതിയ ജീവിതം ആരംഭിക്കാൻ ഒരുങ്ങിയ പവനെ ഗുജറാത്തിലേക്ക് തിരിച്ചയക്കാൻ കോടതി ഉത്തരവ് വരുന്നു. ഇന്നുവരെ സ്വന്തം നാടുവിട്ട് പുറത്തുപോയിട്ടില്ലാത്ത മാധവനും അവനൊപ്പം ഗുജറാത്തിലേക്ക് യാത്ര തിരിക്കുകയായി.
എന്നാൽ പവന്‍റെ മാതാപിതാക്കളെ കണ്ടെത്താനാവുന്നില്ല. അവർ മരിച്ചോ അതോ ജീവനോടെയുണ്ടോ എന്ന് അധികാരികൾക്ക് ഉറപ്പില്ലാത്തത് പവനെ ദത്തെടുക്കുക എന്ന മാധവന്‍റെ പ്രത്യാശയ്‌ക്ക് കരിനിഴൽ വീഴ്‌ത്തുന്നു. ഒടുക്കം അവനെ അനാഥത്വത്തിന്‍റെ ലോകത്ത് തനിച്ചാക്കി മടങ്ങാൻ നിർബന്ധിതനാകുന്നു.
അവന്‍റെ വേണ്ടപ്പെട്ടവർ വന്നില്ലെങ്കിൽ തന്നെ അറിയിക്കണമെന്നും സ്വന്തം മകനെപ്പോലെ താൻ വളർത്തിക്കോളാമെന്നും അവസാന പ്രതീക്ഷയെന്നോണം അഭ്യർഥിച്ചുകൊണ്ടാണ് മാധവൻ മടങ്ങുന്നത്. ബന്ധപ്പെടാൻ തന്‍റെ വിലാസവും ഉദ്യോഗസ്ഥന് അയാൾ എഴുതി നൽകുന്നു. എന്നാൽ മാധവൻ തിരികെ നടക്കുമ്പോൾ ആ ഉദ്യോഗസ്ഥൻ കത്ത് ചവറ്റുകുട്ടയിലേക്ക് എറിയുകയാണ്. ഇതറിയാതെ നടന്നകലുന്ന മാധവനിലാണ് സിനിമ അവസാനിക്കുന്നത്.
പവനെ എന്നെങ്കിലും തിരികെ ലഭിക്കുമെന്ന പ്രത്യാശയിലാകും മാധവൻ. എന്നാൽ അങ്ങനെയൊന്ന് ഇനി ഉണ്ടാവില്ലെന്ന യാഥാർഥ്യം പ്രേക്ഷകന് കടുത്ത വ്യഥ നൽകുന്നു. കണ്ണീർ നനവ് ബാക്കിയാക്കുന്ന 'കാഴ്‌ച'യുടെ ലോകത്ത് നിന്നും അത്ര എളുപ്പം ഒരു വിടുതൽ പ്രേക്ഷകന് ലഭിക്കുന്നില്ല.
കയ്യടി നേടി അഭിനേതാക്കൾ: 'കാഴ്‌ച'യിലെ ഓരോ കഥാപാത്രങ്ങളെയും അത്രമേൽ പ്രേക്ഷകന് പ്രിയപ്പെട്ടതാക്കിയത് അവർക്ക് ജീവൻ പകർന്ന അഭിനേതാക്കളുടെ പകരംവയ്‌ക്കാനില്ലാത്ത പ്രകടനം തന്നെയാണ്. ചിത്രത്തിലെ കേന്ദ്ര കഥാപാത്രമായ ഫിലിം ഓപ്പറേറ്റർ മാധവനെ മമ്മൂട്ടി അവിസ്‌മരണീയമാക്കിയപ്പോൾ പവനായി യഷും തന്‍റെ ഭാഗം ഗംഭീരമാക്കി. മാധവന്‍റെ ഭാര്യയായി വേഷമിട്ടത് പത്മപ്രിയയാണ്. മകളുടെ വേഷത്തിൽ സനുഷയും തിളങ്ങി.
പത്മപ്രിയയുടെ ആദ്യ മലയാള ചിത്രം കൂടിയായിരുന്നു 'കാഴ്‌ച'. ഇന്നസെന്‍റ്, മനോജ് കെ ജയൻ, വേണു നാഗവള്ളി തുടങ്ങിയ താരങ്ങളും ശ്രദ്ധേയമായ പ്രകടനമാണ് കാഴ്‌ചവച്ചത്.
അവാർഡുകളുടെ പെരുമഴ : 2004ലെ സംസ്ഥാന ചലച്ചിത്ര പുരസ്‌കാരത്തിൽ അഞ്ച് അവാർഡുകളാണ് 'കാഴ്‌ച' സ്വന്തമാക്കിയത്. ആദ്യ ചിത്രത്തിലൂടെ തന്നെ സംസ്ഥാനത്തെ മികച്ച പുതുമുഖ സംവിധായകനായി മാറാൻ ബ്ലെസിക്കായി. മികച്ച നടന്‍ (മമ്മൂട്ടി), മികച്ച ബാലതാരങ്ങൾ (യഷ്, സനുഷ), ജനകീയ സിനിമ എന്നീ വിഭാഗങ്ങളിലും കാഴ്‌ച പുരസ്‌കാരം നേടി.
കുറഞ്ഞ ചിലവിൽ നിർമിക്കപ്പെട്ട ഈ സിനിമ സാമ്പത്തികമായി വലിയ വിജയമാണ് സ്വന്തമാക്കിയത്. വാണിജ്യ സിനിമകൾക്ക് കൽപ്പിക്കപ്പെടുന്ന ഘടകങ്ങളൊന്നും തന്നെ ഇല്ലാതിരുന്നിട്ടും 'കാഴ്‌ച' തിയേറ്ററുകൾ കീഴടക്കി.
മലയാള സിനിമാസ്വാദകരുടെ ഇഷ്‌ട ചിത്രങ്ങളുടെ പട്ടികയില്‍ 'കാഴ്‌ച'യ്‌ക്ക് പ്രഥമമായ സ്ഥാനം ഉണ്ടായിരിക്കും. വർഷങ്ങൾ പിന്നിട്ടിട്ടും ഈ സിനിമ പ്രേക്ഷകനെ തെല്ലും മടുപ്പിക്കുന്നില്ല. മാധവന്‍റെ ആത്മസംഘർഷങ്ങൾക്കൊപ്പം തേങ്ങലോടെ നമ്മളും നീങ്ങുന്നു. തുടക്കക്കാരന്‍റെ യാതൊരു പകർച്ചയുമില്ലാതെ പദ്‌മരാജന്‍റെയും ഭരതന്‍റെയും പ്രിയ ശിഷ്യൻ ബ്ലെസി ഒരുക്കിയ സിനിമാ 'കാഴ്‌ചകൾ അവസാനിക്കാതെ' പ്രയാണം തുടരുകയാണ്.
