പാലക്കാട്: അയ്യപ്പനും കോശിയും എന്ന ചിത്രത്തിന് ശേഷം ദേശീയ പുരസ്‌കാര ജേതാവ് നഞ്ചിയമ്മ പാടുകയും അഭിനയിക്കുകയും ചെയ്‌ത 'സിഗ്നേച്ചര്' എന്ന ചിത്രത്തിന്‍റെ പോസ്റ്റര്‍ പുറത്തുവിട്ടു. മനോജ്‌ പാലോടൻ സംവിധാനം ചെയ്‌ത അട്ടപ്പാടിയുടെ പശ്ചാത്തലത്തിലൊരുങ്ങുന്ന ചിത്രത്തിന്‍റെ പോസ്റ്റർ നടി മഞ്ജു വാര്യരാണ് ഫേസ്ബുക്ക് പേജിലൂടെ പുറത്തുവിട്ടത്. അട്ടപ്പാടിയുടെ തനിമ അതേപടി പകർത്തി വ്യത്യസ്‌തമായൊരു ചലച്ചിത്ര അനുഭവം പ്രേക്ഷകർക്ക് പകർന്ന് നല്‍കുകയാണ് അണിയറ പ്രവർത്തകരുടെ ലക്ഷ്യം.
ടിനി ടോം, കാർത്തിക് രാമകൃഷ്‌ണൻ, ആൽഫി പഞ്ഞിക്കാരൻ, ബാലചന്ദ്രൻ ചുള്ളിക്കാട്, ചെമ്പിൽ അശോകൻ, ഷാജു ശ്രീധർ എന്നിങ്ങനെ 30 ഓളം താരങ്ങള്‍ ചിത്രത്തില്‍ വേഷമിടുന്നുണ്ട്. ഇതിന് പുറമേ ഗോത്ര വിഭാഗത്തിലുള്ളവരും ചിത്രത്തില്‍ അഭിനയിക്കുന്നുണ്ട്. നായകന്‍റെ അച്ഛനായി അഭിനയിക്കുന്നത് കട്ടേക്കാട് ഊര് മൂപ്പൻ തങ്കരാജാണ്.
തങ്കരാജ് എഴുതിയ മുഡുക ഭാഷയിലെ ഒരു പാട്ടും ചിത്രത്തിലുണ്ട്. സാഞ്ചോസ് ക്രിയേഷൻസിന്‍റെ ബാനറിൽ ലിബിൻ പോൾ അക്കര, ജെസ്സി ജോർജ്ജ്, അരുൺ വർഗീസ് തട്ടിൽ എന്നിവർ നിർമിച്ച ചിത്രത്തിന്‍റെ കഥയും തിരക്കഥയും സംഭാഷണവും രചിച്ചിരിക്കുന്നത് ഫാദർ ബാബു തട്ടിലാണ്.
