ഭോപ്പാല്‍: ഉത്തർപ്രദേശിന് പിന്നാലെ ലൗ ജിഹാദ് നിയമം കൊണ്ടുവരാൻ തീരുമാനിച്ച് മധ്യപ്രദേശ് സര്‍ക്കാരും. മതപരിവർത്തനം സംബന്ധിച്ച നിയമം ഓർഡിനൻസിലൂടെ മധ്യപ്രദേശിലെ ബിജെപി സർക്കാർ പാസാക്കി. സമ്മതത്തിനായി ഗവർണർക്ക് അയച്ചിട്ടുണ്ട്. കൊവിഡ് -19 സാഹചര്യം മൂലം സംസ്ഥാന നിയമസഭയുടെ ശീതകാല സമ്മേളനം മാറ്റിവച്ച സാഹചര്യത്തിലാണ് തീരുമാനം. 10 വർഷം വരെ തടവും,വിവാഹത്തിലൂടെയോ മറ്റേതെങ്കിലും ബലപ്രയോഗത്തിലൂടെയോ പരിവർത്തനം ചെയ്തതിന് ഒരു ലക്ഷം രൂപ പിഴയും നൽകുന്ന മധ്യപ്രദേശ് മതസ്വാതന്ത്ര്യ ബിൽ 2020 മന്ത്രിസഭ ശനിയാഴ്ചയാണ് അംഗീകരിച്ചത്. ഡിസംബർ 28 മുതൽ ആരംഭിക്കാനിരുന്ന മൂന്ന് ദിവസത്തെ ശീതകാല സമ്മേളനത്തിലായിരുന്നു ബിൽ നിയമസഭയിൽ അവതരിപ്പിക്കാൻ തീരുമാനിച്ചിരുന്നത്.
നിർദ്ദിഷ്ട നിയമം ലംഘിച്ച് നടത്തുന്ന വിവാഹങ്ങള്‍ അസാധുവായി കണക്കാക്കപ്പെടും. മതപരിവർത്തനം നടത്താൻ ആഗ്രഹിക്കുന്നവർ നിയമനിർമ്മാണത്തിലെ വ്യവസ്ഥകൾ അനുസരിച്ച് 60 ദിവസം മുമ്പേ ജില്ലാ ഭരണകൂടത്തിന് അപേക്ഷിക്കേണ്ടതുണ്ട്. മതപരിവർത്തനത്തിന് സൗകര്യമൊരുക്കുന്ന മതനേതാക്കളും മന്ത്രിസഭയുടെ അനുമതി പ്രകാരം 60 ദിവസം മുമ്പുതന്നെ ഇതിനെക്കുറിച്ച് അറിയിക്കേണ്ടതാണ്. ഈ വ്യവസ്ഥകൾ ലംഘിച്ചാൽ മൂന്ന് മുതൽ അഞ്ച് വർഷം വരെ തടവും 50,000 രൂപ പിഴയും ലഭിക്കും. പട്ടികജാതി, പട്ടികവർഗ, പ്രായപൂർത്തിയാകാത്തവരുടെ അംഗങ്ങളെ മതപരിവർത്തനം ചെയ്യുന്ന കേസുകളിൽ, രണ്ട് മുതൽ 10 വർഷം വരെ തടവും നിയമലംഘകർക്ക് 50,000 രൂപ പിഴയും നൽകുന്നതിന് വ്യവസ്ഥ ചെയ്തിട്ടുണ്ട്. മതം മറച്ചുവെക്കുക, തെറ്റായി ചിത്രീകരിക്കുക, അല്ലെങ്കിൽ ആൾമാറാട്ടം നടത്തുക എന്നിവയിലൂടെ നടത്തുന്ന വിവാഹ കേസുകളിൽ മൂന്ന് മുതൽ 10 വർഷം വരെ തടവും 50,000 രൂപ പിഴയും നൽകാമെന്നും ബില്ലിൽ പറയുന്നു.
