ಪಾರ್ಶ್ವವಾಯುವಿಗೆ ಕಾರಣವಾಗಬಹುದೇ ನಿರ್ಜಲೀಕರಣ?

ನಿರ್ಜಲೀಕರಣವು ರಕ್ತವನ್ನು ದಪ್ಪವಾಗಿಸುತ್ತದೆ. ಇದರಿಂದ ಮಿದುಳು ಸೇರಿದಂತೆ ಅಂಗಾಂಗಗಳಿಗೆ ರಕ್ತದ ಹರಿವು ನಿಧಾನಗೊಳ್ಳುತ್ತದೆ. ಈ ಮೂಲಕ ರಕ್ತ ಹೆಪ್ಪುಗಟ್ಟುವಿಕೆ ಮತ್ತು ಪಾರ್ಶ್ವವಾಯು ಉಂಟಾಗುವ ಸಾಧ್ಯತೆ ಹೆಚ್ಚು ಎನ್ನುತ್ತದೆ ಸಂಶೋಧನೆ.

ನವದೆಹಲಿ: ಅಪಾಯಕಾರಿ ಮಟ್ಟದಲ್ಲಿ ದೇಹದಲ್ಲಿ ದ್ರವ ನಷ್ಟ ಉಂಟಾಗುವ ಪ್ರಕ್ರಿಯೆಯೇ ನಿರ್ಜಲೀಕರಣ. ಇದು ಮುಂದೆ ಪಾರ್ಶ್ವವಾಯುವಿಗೆ ಕಾರಣವಾಗುವ ಸಾಧ್ಯತೆ ಇದೆ ಎಂದು ವೈದ್ಯರು ಎಚ್ಚರಿಸಿದ್ದಾರೆ.

ಇತ್ತೀಚಿಗಷ್ಟೇ ಜೀರೊಧಾ (Zerodha) ಸಹಸಂಸ್ಥಾಪಕ ಮತ್ತು ಸಿಇಒ ನಿತಿನ್​ ಕಾಮತ್​ ಅವರು ಸೌಮ್ಯ ಪಾರ್ಶ್ವವಾಯುವಿಗೆ ತುತ್ತಾಗಿದ್ದು, ಇದೀಗ ಚೇತರಿಕೆ ಕಾಣುತ್ತಿದ್ದಾರೆ. ಈ ಕುರಿತು ಸಾಮಾಜಿಕ ಜಾಲತಾಣ 'ಎಕ್ಸ್'​​ನಲ್ಲಿ ಪೋಸ್ಟ್​​ ಮಾಡಿರುವ ಅವರು, ಕಳಪೆ ನಿದ್ರೆ, ಬಳಲಿಕೆಯ ಹೊರತಾಗಿ ನಿರ್ಜಲೀಕರಣ ಕೂಡ ಇದಕ್ಕೆ ಕಾರಣವಾಗಿದೆ ಎಂದು ಹೇಳಿದ್ದರು.

ನಿರ್ಜಲೀಕರಣ ನೇರವಾಗಿ ಪಾರ್ಶ್ವವಾಯುಗೆ ಕಾರಣವಾಗುವುದಿಲ್ಲ. ಅಪಧಮನಿ ಪಾರ್ಶ್ವವಾಯುವಿಗಿಂತ ಸೆರೆಬ್ರಲ್​ ನಾಳದ ಪಾರ್ಶ್ವವಾಯುಗೆ ಕೊಡುಗೆ ನೀಡುತ್ತದೆ ಎಂದು ಬೆಂಗಳೂರಿನ ಬನ್ನೇರುಘಟ್ಟದಲ್ಲಿರುವ ಫೋರ್ಟಿಸ್​​ ಆಸ್ಪತ್ರೆಯ ನರಶಾಸ್ತ್ರಜ್ಞ ಗುರುಪ್ರಸಾದ್​​ ಹೊಸುರ್ಕರ್​ ಹೇಳುತ್ತಾರೆ.

ನಿರ್ಜಲೀಕರಣದಿಂದ ದೇಹದಲ್ಲಿ ದ್ರವ ನಷ್ಟವಾಗಿ ಎಲೆಕ್ಟ್ರೊಲೈಟ್​​​ ಅಸಮತೋಲನ ಉಂಟಾಗುತ್ತದೆ. ಇದರಿಂದ ವಿವಿಧ ಕಾರ್ಯಾಚರಣೆಗೆ ತೊಂದರೆಯಾಗುತ್ತದೆ. ಈ ಮುಖೇನ ನಿರ್ಜಲೀಕರಣವು ಪಾರ್ಶ್ವವಾಯು ಹೆಚ್ಚಳಕ್ಕೆ ದಾರಿ ಮಾಡಿಕೊಡುತ್ತದೆ ಎಂಬ ಬಗ್ಗೆ ಹೆಚ್ಚಾಗಿ ತಿಳಿದಿಲ್ಲ ಎಂದು ಮುಂಬೈನ ಬಾಂದ್ರಾದ ಹೋಲಿ ಫ್ಯಾಮಿಲಿ ಆಸ್ಪತ್ರೆಯ ಕನ್ಸಲ್ಟೆಂಟ್​​ ಕೌಸುಮ್​​ ಹುಸೇನ್​ ತಿಳಿಸಿದರು.

ನಿರ್ಜಲೀಕರಣವು ರಕ್ತ ದಪ್ಪ ಮಾಡುತ್ತದೆ. ಇದರಿಂದ ಮಿದುಳು ಸೇರಿದಂತೆ ಅಂಗಾಂಗಗಳಿಗೆ ರಕ್ತದ ಹರಿವು ನಿಧಾನಗೊಳ್ಳುತ್ತದೆ. ಇದು ರಕ್ತ ಹೆಪ್ಪುಗಟ್ಟುವಿಕೆ ಮತ್ತು ಪಾರ್ಶ್ವವಾಯು ಅಪಾಯ ಉಂಟುಮಾಡುತ್ತದೆ.

ನಿರ್ಜಲೀಕರಣದಿಂದಾಗಿ ರಕ್ತ ದಪ್ಪಗಾಗುವುದರಿಂದ ಹೃದಯ ರಕ್ತವನ್ನು ಅಪಧಮನಿಗೆ ಹರಿವನ್ನು ಪರಿಣಾಮಕಾರಿಯಾಗಿ ಪಂಪ್​ ಮಾಡುವ ಸಾಮರ್ಥ್ಯ ತಗ್ಗಿಸುತ್ತದೆ. ಇದರೊಂದಿಗೆ ಆಮ್ಲಜನಕದ ಪೂರೈಕೆ ಕೂಡ ಕಡಿಮೆಯಾಗುತ್ತದೆ. ಅಸಮರ್ಪಕ ನಿರ್ಜಲೀಕರಣ ದೇಹದ ತಾಪಮಾನದ ಮೇಲೆ ಪರಿಣಾಮ ಬೀರಿ ಹೃದಯದ ವ್ಯವಸ್ಥೆ ಮೇಲೆ ಅನಾರೋಗ್ಯಕರ ಒತ್ತಡ ಉಂಟುಮಾಡುತ್ತದೆ ಎಂದು ಅವರು ವಿವರಿಸಿದರು.

ಈ ಕುರಿತು ಲ್ಯಾನ್ಸೆಟ್​​ ಜರ್ನಲ್​ ಇ-ಬಯೋಮೆಡಿಸಿನ್​​ನಲ್ಲಿ ಸಂಶೋಧನಾತ್ಮಕ ಪ್ರಕಟಿಸಲಾಗಿದೆ. ಜನರು ಹೈಡ್ರೇಟ್​ ಆಗಿರದೇ ಇದ್ದರೆ ಬೇಗ ವಯಸ್ಸಾಗುವಿಕೆಯೊಂದಿಗೆ ಅಕಾಲಿಕ ಸಾವು ಸೇರಿದಂತೆ ದೀರ್ಘಾವಧಿ ಕಾಯಿಲೆಯ ಹೆಚ್ಚಿನ ಅಪಾಯ ಎದುರಾಗುತ್ತದೆ. ದೇಹಕ್ಕೆ ಸಾಕಷ್ಟು ಪ್ರಮಾಣದಲ್ಲಿ ನೀರು ಕುಡಿಯದೇ ಹೋದಲ್ಲಿ ಸಾವಿನ ಅಪಾಯವು ಶೇ.20ರಷ್ಟು ಹೆಚ್ಚಾಗುತ್ತದೆ ಎಂದು ಅಧ್ಯಯನ ಎಚ್ಚರಿಸಿದೆ.

ಹೈಡ್ರೇಟ್​​ ಆಗಿರುವುದೂ ಕೂಡ ಒಟ್ಟಾರೆ ಆರೋಗ್ಯದ ಮೇಲೆ ನಿರ್ಣಾಯಕ ಪರಿಣಾಮ ಬೀರುತ್ತದೆ. ಇದು ಪಾರ್ಶ್ವವಾಯು ಅಪಾಯವನ್ನು ಕಡಿಮೆ ಮಾಡುತ್ತದೆ. ಈ ಹಿನ್ನೆಲೆಯಲ್ಲಿ ದಿನದಲ್ಲಿ ಹೆಚ್ಚು ಪ್ರಮಾಣದಲ್ಲಿ ನೀರು ಕುಡಿಯುವುದು ಅಗತ್ಯ. ವಿಶೇಷವಾಗಿ ದೈಹಿಕ ಚಟುವಟಿಕೆಯ ಸಂದರ್ಭ ಅಥವಾ ಹೆಚ್ಚುತ್ತಿರುವ ಬಿಸಿಲ ತಾಪಮಾನದ ವೇಳೆ ನೀರು ಕುಡಿಯುವುದು ಆರೋಗ್ಯಕ್ಕೆ ಒಳ್ಳೆಯದು ಎಂದು ತಜ್ಞ ವೈದ್ಯರು ಸಲಹೆ ನೀಡುತ್ತಾರೆ.(ಐಎಎನ್​ಎಸ್​​)

ಇದನ್ನೂ ಓದಿ: ವ್ಯಾಯಾಮದಿಂದ ಪುರುಷರಿಗಿಂತ ಮಹಿಳೆಯರಿಗೆ ಹೆಚ್ಚು ಪ್ರಯೋಜನ