ಒಂದೇ ಕ್ಷೇತ್ರದಲ್ಲಿ ಕೆಲಸ ಮಾಡುವ ಅದೆಷ್ಟೋ ಮಂದಿ ಪ್ರೀತಿಸಿ, ದಾಂಪತ್ಯ ಜೀವನ ಆರಂಭಿಸಿ ಹಲವರಿಗೆ ಮಾದರಿಯಾಗಿರೋ ಅದೆಷ್ಟೋ ಉದಾಹರಣೆಗಳು ನಮ್ಮ ಕಣ್ಣ ಮುಂದಿವೆ. ಸಿನಿಮಾ ವಲಯ ಕೂಡಾ ಇದರಿಂದ ಹೊರತಲ್ಲ. ಮೇಡ್ ಫರ್ ಈಚ್ ಅದರ್ ಅನ್ನೋವಂತಹ ಮಾದರಿ ದಂಪತಿ ನಮ್ಮ ಚಂದನವನದಲ್ಲಿವೆ. ವಸಿಷ್ಠ ಸಿಂಹ ಹಾಗೂ ಹರಿಪ್ರಿಯಾ ಅಪಾರ ಸಂಖ್ಯೆಯ ಅಭಿಮಾನಿಗಳನ್ನು ಸಂಪಾದಿಸಿರುವ ಕನ್ನಡ ಚಿತ್ರರಂಗದ ಅತ್ಯಂತ ಜನಪ್ರಿಯ ತಾರಾ ದಂಪತಿ.
ಒಂದು ತಿಂಗಳ ಹಿಂದೆಯೇ ಪೋಷಕರಾಗಿ ಬಡ್ತಿ: ಈ ಸ್ಯಾಂಡಲ್ವುಡ್ ಸೆಲೆಬ್ರಿಟಿ ಕಪಲ್ ಒಂದು ತಿಂಗಳ ಹಿಂದಷ್ಟೇ ಪೋಷಕರಾಗಿ ಬಡ್ತಿ ಪಡೆದಿದ್ದಾರೆ. ತಮ್ಮ ಮದುವೆ ವಾರ್ಷಿಕೋತ್ಸವದ ಸಂದರ್ಭವೇ ತಮ್ಮ ಮೊದಲ ಮಗುವನ್ನು ಬರಮಾಡಿಕೊಂಡಿದ್ದಾರೆ. ಹೌದು, 2025ರ ಜನವರಿ ಕೊನೆಗೆ ನಟಿ ಹರಿಪ್ರಿಯಾ ಗಂಡು ಮಗುವಿಗೆ ಜನ್ಮ ನೀಡಿದ್ದಾರೆ. ಜನವರಿ 27ರ ಸಂಜೆ ಸೆಲೆಬ್ರಿಟಿ ಜೋಡಿ ಈ ಶುಭ ಸುದ್ದಿಯನ್ನು ಹಂಚಿಕೊಂಡಿತ್ತು. ಮೊದಲ ಮಗುವನ್ನು ಬರಮಾಡಿಕೊಂಡ ದಂಪತಿಗೆ ಅಭಿನಂದನೆಗಳ ಮಹಾಪೂರವೇ ಹರಿದುಬಂದಿತ್ತು.
ಶಿವರಾತ್ರಿಯೆಂದು ಆಕರ್ಷಕ ವಿಡಿಯೋ: ಮಹಾ ಶಿವರಾತ್ರಿಯಂದು ತಾರಾ ದಂಪತಿ ತಮ್ಮ ಅಧಿಕೃತ ಇನ್ಸ್ಟಾಗ್ರಾಮ್ನಲ್ಲಿ ವಿಡಿಯೋ ಒಂದನ್ನು ಹಂಚಿಕೊಂಡಿದ್ದಾರೆ. ಇದು ಮನೆಗೆ ಮರಿಸಿಂಹನ ಆಗಮನ ಹೇಗಿತ್ತು? ಎಂಬುದನ್ನು ಒಳಗೊಂಡಿದೆ. ಕೆಲ ದಿನಗಳ ಹಿಂದೆಯೇ ಮನೆಗೆ ಮಗನ ಪ್ರವೇಶ ಆಗಿದ್ದು, ಮಹಾಶಿವರಾತ್ರಿಯ ಶುಭ ದಿನದಂದು ಆಕರ್ಷಕ ವಿಡಿಯೋ ಹಂಚಿಕೊಂಡಿದ್ದಾರೆ. ಸಿಂಹನ ತೋಳಲ್ಲಿ ಮರಿಸಿಂಹನ ದೃಶ್ಯವನ್ನು ನೋಡೋದೇ ಚೆಂದ ಅನ್ನುತ್ತಿದ್ದಾರೆ ಅಭಿಮಾನಿಗಳು.
ಹರ ಹರ ಮಹಾದೇವ.. ಜೂನಿಯರ್ ಸಿಂಹನಿಗೆ ಒಂದು ತಿಂಗಳು: ಪೋಸ್ಟ್ಗೆ, ''ಮಹಾ ಶಿವರಾತ್ರಿ ಹಬ್ಬದ ಶುಭಾಶಯಗಳು, ಹರ ಹರ ಮಹಾದೇವ, ನಮ್ಮ ಪುಟ್ಟ ಮಗುವಿಗೀಗ ಒಂದು ತಿಂಗಳು. ಹೌದು, ಸಮಯ ಬೇಗನೆ ಕಳೆದು ಹೋಗುತ್ತದೆ. ಜೂನಿಯರ್ ಸಿಂಹನನ್ನು ಮನೆಗೆ ಸ್ವಾಗತಿಸಿದ್ದು ಹೀಗೆ'' ಎಂದು ಬರೆದುಕೊಂಡಿದ್ದಾರೆ.
ಇದನ್ನೂ ಓದಿ: 'ನೀ ಯಾರು ನನಗೆ? ಉತ್ತರ ಬೇಕಾಗಿದೆ ಜನರಿಗೆ': ದಿವ್ಯಾ ಉರುಡುಗ ಅರವಿಂದ್ ಜೋಡಿಯದ್ದು ಸ್ನೇಹವೋ, ಪ್ರೀತಿಯೋ
ಅಭಿಮಾನಿಗಳಿಂದ ಮೆಚ್ಚುಗೆ: ಮಗುವನ್ನು ಎತ್ತಿ ಮುದ್ದಾಡಿರುವ ಕ್ಷಣಗಳು ಇವೆಯಾದರೂ ಮುಖ ಗೋಚರಿಸಿಲ್ಲ. ಹಾಗಾಗಿ, ಮಗನ ಫೋಟೋ ರಿವೀಲ್ ಮಾಡುವಂತೆ ಅಭಿಮಾನಿಗಳು ಬೇಡಿಕೆ ಇಡುತ್ತಿದ್ದಾರೆ. ಉಳಿದಂತೆ, ಫೋಟೋ ವಿಡಿಯೋಗಳಿಗೆ ಕ್ಯೂಟ್, ಬ್ಯೂಟಿಫುಲ್ ಎಂದೆಲ್ಲಾ ಮೆಚ್ಚುಗೆ ವ್ಯಕ್ತವಾಗಿದೆ.
ಇದನ್ನೂ ಓದಿ: ಎಂಟೇ ನಿಮಿಷದ ಅಭಿನಯ, ಆಸ್ಕರ್ಗೆ ಎಂಟ್ರಿ! ಇದಕ್ಕೂ ಕಡಿಮೆ ಅವಧಿಯಲ್ಲಿ ನಟಿಸಿದವರಾರು?
ಬಹುಸಮಯದಿಂದ ಪ್ರೀತಿಯಲ್ಲಿದ್ದ ಜೋಡಿ ತಮ್ಮ ಪ್ರೀತಿಯನ್ನು ಎಲ್ಲೂ ಬಿಟ್ಟುಕೊಟ್ಟಿರಲಿಲ್ಲ. 2023ರ ಜನವರಿ 26ರಂದು ಮೈಸೂರಿನ ಗಣಪತಿ ಸಚ್ಚಿದಾನಂದ ಆಶ್ರಮದಲ್ಲಿ ಹಸೆಮಣೆ ಏರಿದರು. 2024ರ ನವೆಂಬರ್ 1ರಂದು ತಾವು ಶೀಘ್ರದಲ್ಲೇ ಪೋಷಕರಾಗುತ್ತಿದ್ದೇವೆಂದು ಘೋಷಿಸಿದರು. ತಮ್ಮ ವಿಡಿಯೋ ಹಂಚಿಕೊಂಡ ಜೋಡಿ, ''ಪ್ರೀತಿಯ ಕನ್ನಡ ಮನಸ್ಸುಗಳಿಗೆ ಕರ್ನಾಟಕ ರಾಜ್ಯೋತ್ಸವದ ಹಾಗೂ ದೀಪಾವಳಿಯ ಶುಭಾಶಯಗಳು. ಈ ಶುಭ ದಿನದಂದು, ನಿಮ್ಮೆಲ್ಲರೊಡನೆ ಶುಭಸುದ್ದಿಯೊಂದನ್ನು ಹಂಚಿಕೊಳ್ಳುವಾಸೆ. ನಿಮ್ಮಲ್ಲಿ ಬಹುತೇಕರು ಊಹಿಸಿದ್ದು ಸರಿ. ಹೌದು, ನಾವು ನಮ್ಮ ಕುಡಿಗಾಗಿ ಎದುರು ನೋಡುತ್ತಿದ್ದೇವೆ. ನಿಮ್ಮೆಲ್ಲರ ಹಾರೈಕೆ-ಆಶೀರ್ವಾದಗಳ ನಿರೀಕ್ಷೆಯಲ್ಲಿ. ನಿಮ್ಮ ಸಿಂಹಪ್ರಿಯ'' ಎಂದು ಬರೆದುಕೊಂಡಿದ್ದರು.
