ನವದೆಹಲಿ: ಓದಲು ಅಥವಾ ನೋಡಲು ಆಗದಷ್ಟು ಮಿತಿಮೀರಿದ ಮಾಹಿತಿ ಕಾಣಿಸುವುದರಿಂದ ಹಾಗೂ ಪದೇ ಪದೆ ಜಾಹೀರಾತುಗಳು ಕಾಣಿಸಿಕೊಳ್ಳುವ ಕಾರಣದಿಂದ ಶೇ 88ರಷ್ಟು ಭಾರತೀಯ ಗ್ರಾಹಕರು ಆನ್ಲೈನ್ ಶಾಪಿಂಗ್ ತ್ಯಜಿಸಿದ್ದಾರೆ ಎಂದು ಹೊಸ ವರದಿಯೊಂದು ಸೋಮವಾರ ತಿಳಿಸಿದೆ.
ಆನ್ಲೈನ್ ಶಾಪಿಂಗ್ನ ರೀತಿಯಲ್ಲಿ ಯಾವುದೇ ಸುಧಾರಣೆ ಆಗುತ್ತಿಲ್ಲ. ಅಲ್ಲದೆ ಆನ್ಲೈನ್ನಲ್ಲಿ ಯಾವುದಾದರೂ ವಸ್ತುಗಳನ್ನು ಖರೀದಿಸುವ ನಿರ್ಧಾರ ಕೈಗೊಳ್ಳುವ ಸಮಯ ಮತ್ತು ಶ್ರಮ ಎರಡೂ ಹೆಚ್ಚಾಗುತ್ತಿವೆ ಎಂಬುದು ಶೇ 67ರಷ್ಟು ಭಾರತೀಯ ಗ್ರಾಹಕರ ಅಭಿಪ್ರಾಯ ಎಂದು ಜಾಗತಿಕ ಐಟಿ ಸೇವಾ ಸಂಸ್ಥೆ ಅಕ್ಸೆಂಚರ್‌ನ ವರದಿ ಹೇಳಿದೆ. ಭಾರತ ಸೇರಿದಂತೆ 12 ದೇಶಗಳ 19,000 ಗ್ರಾಹಕರನ್ನು ಈ ಸಮೀಕ್ಷೆಯಲ್ಲಿ ಒಳಪಡಿಸಲಾಗಿದೆ.
"ಗ್ರಾಹಕ ಕೇಂದ್ರೀಕೃತ ಕಂಪನಿಗಳು ಉತ್ಪನ್ನಗಳು ಮತ್ತು ಸೇವೆಗಳನ್ನು ಹೇಗೆ ಬ್ರ್ಯಾಂಡ್ ಮಾಡಲಾಗುತ್ತದೆ ಮತ್ತು ಮಾರಾಟ ಮಾಡಲಾಗುತ್ತದೆ ಎಂಬುದನ್ನು ಮರುಪರಿಶೀಲಿಸಬೇಕಾಗಿದೆ. ಗ್ರಾಹಕರು ವಿಪರೀತ ಮಾಹಿತಿಯ ಹೊರೆಯನ್ನು ದಾಟಿ ಸುಲಭವಾಗಿ ಹಾಗೂ ಆತ್ಮವಿಶ್ವಾಸದಿಂದ ಖರೀದಿ ನಿರ್ಧಾರಗಳನ್ನು ತೆಗೆದುಕೊಳ್ಳುವಂತೆ ಮಾರಾಟ ಮತ್ತು ಬ್ರ್ಯಾಂಡಿಂಗ್ ವಿಧಾನಗಳನ್ನು ಬದಲಿಸಬೇಕಿದೆ" ಎಂದು ಅಕ್ಸೆಂಚರ್ ಇನ್ ಇಂಡಿಯಾದ ಸ್ಟ್ರಾಟಜಿ & ಕನ್ಸಲ್ಟಿಂಗ್‌ ಎಂಡಿ ಮತ್ತು ಮುಖ್ಯಸ್ಥ ವಿನೀತ್ ಆರ್.ಅಹುಜಾ ಹೇಳಿದರು.
ಇದಲ್ಲದೆ ಜನರೇಟಿವ್ ಎಐ, ಇತರ ತಂತ್ರಜ್ಞಾನಗಳು ಮತ್ತು ಹೊಸ ಕೆಲಸದ ವಿಧಾನಗಳ ಮೂಲಕ ಗ್ರಾಹಕರ ಸಬಲೀಕರಣವು ಬ್ರ್ಯಾಂಡ್‌ಗಳ ಬಗ್ಗೆ ಜನರ ಯೋಚನೆಯನ್ನು ಬದಲಾಯಿಸುತ್ತದೆ ಎಂದು ವರದಿ ಹೇಳಿದೆ.
"ಒಟ್ಟಾರೆಯಾಗಿ ರಿಟೇಲ್ ಮತ್ತು ಗ್ರಾಹಕ ಸರಕುಗಳಲ್ಲಿ ಉತ್ಪಾದನಾ ಎಐ ಮತ್ತು ಎಐ-ಚಾಲಿತ ಅಡ್ವೈಸರ್ ಸಾಧನಗಳ ಬಳಕೆಯು ಕಂಪನಿಗಳಿಗೆ ತಮ್ಮ ಗ್ರಾಹಕರನ್ನು ಚೆನ್ನಾಗಿ ಅರ್ಥಮಾಡಿಕೊಳ್ಳಲು, ಸಂಬಂಧಿತ ಮತ್ತು ಆಕರ್ಷಕ ಅನುಭವಗಳನ್ನು ನೀಡಲು ಮತ್ತು ವ್ಯವಹಾರದ ಬೆಳವಣಿಗೆಯನ್ನು ಹೆಚ್ಚಿಸಲು ಅನುವು ಮಾಡಿಕೊಡುತ್ತದೆ" ಎಂದು ಅಕ್ಸೆಂಚರ್ ಇನ್ ಇಂಡಿಯಾದ ಉತ್ಪನ್ನಗಳ ಎಂಡಿ ಮತ್ತು ಪ್ರಮುಖ ನಿರ್ದೇಶಕ ಅಮ್ನೀತ್ ಸಿಂಗ್ ಹೇಳಿದರು.
ಇದಲ್ಲದೆ ಪ್ರತಿ 10ರಲ್ಲಿ 8 (79 ಪ್ರತಿಶತ) ಭಾರತೀಯ ಗ್ರಾಹಕರು ತಮ್ಮ ಆನ್ಲೈನ್ ಶಾಪಿಂಗ್ ಖುಷಿಯಿಂದ ಕೂಡಿತ್ತು ಎಂದು ಹೇಳಿದರೆ, 74 ಪ್ರತಿಶತದಷ್ಟು ಜನರು ತಾವು ಖರೀದಿಸ ಬಯಸುವ ವಸ್ತುವಿನ ಸ್ಟಾಕ್ ಇಲ್ಲದ್ದರಿಂದ ನಿರಾಶೆ ವ್ಯಕ್ತಪಡಿಸಿದ್ದಾರೆ.
ಆನ್ಲೈನ್ ಶಾಪಿಂಗ್ ಎಂದರೇನು?: ಆನ್ಲೈನ್ ಶಾಪಿಂಗ್ ಎಂದರೆ ಇಂಟರ್ ನೆಟ್ ಮೂಲಕ ಉತ್ಪನ್ನಗಳು ಅಥವಾ ಸೇವೆಗಳನ್ನು ಖರೀದಿಸುವ ಚಟುವಟಿಕೆ ಅಥವಾ ಕ್ರಿಯೆ. ಆನ್ಲೈನ್ ಶಾಪಿಂಗ್ ಇ-ಕಾಮರ್ಸ್ ಭಾಗವಾಗಿದೆ. ಇ-ಕಾಮರ್ಸ್ ಎಂಬುದು ಎಲೆಕ್ಟ್ರಾನಿಕ್ ಕಾಮರ್ಸ್ನ ಸಂಕ್ಷಿಪ್ತ ರೂಪವಾಗಿದೆ. ಗ್ರಾಹಕರು ಡಿಜಿಟಲ್ ಪ್ಲಾಟ್ ಫಾರ್ಮ್ ಮೂಲಕ ವಸ್ತುಗಳನ್ನು ಖರೀದಿಸಿದರೆ ಅದನ್ನು ಆನ್ಲೈನ್ ಶಾಪಿಂಗ್ ಎಂದು ಕರೆಯಲಾಗುತ್ತದೆ.
ಇದನ್ನೂ ಓದಿ: 2027ರ ವೇಳೆಗೆ ಸೆಮಿಕಂಡಕ್ಟರ್ ಉದ್ಯಮಕ್ಕೆ 3 ಲಕ್ಷ ನುರಿತ ಉದ್ಯೋಗಿಗಳ ಅಗತ್ಯ: ವರದಿ - Semiconductor Industry
