ಅಜ್ಮೇರ್ (ರಾಜಸ್ಥಾನ): ಇಲ್ಲಿನ ಪುಷ್ಕರ್ ಅಂತಾರಾಷ್ಟ್ರೀಯ ಜಾನುವಾರು ಮೇಳದಲ್ಲಿ ಪ್ರದರ್ಶನಕ್ಕೆ ಇಡಲಾಗಿದ್ದ ಎಂಟು ವರ್ಷದ ಕೋಣ ಎಲ್ಲರ ಹುಬ್ಬೇರಿಸಿದೆ. ಈ ಕೊಬ್ಬಿದ ಕೋಣದ ಹೆಸರು ಅನ್ಮೋಲ್. ಇದು ಬರೋಬ್ಬರಿ 1500 ಕೆಜಿ ತೂಕವಿದೆ. ಮಾಂಸಖಂಡಗಳಿಂದ ತುಂಬಿಕೊಂಡಿರುವ ಇದನ್ನು ಖರೀದಿಸಲು ಜನರು ಮುಗಿಬಿದ್ದಿದ್ದಾರೆ.
ಹರಿಯಾಣದ ಸಿರ್ಸಾ ಜಿಲ್ಲೆಯ ಹಿಸ್ಸು ಗ್ರಾಮದ ನಿವಾಸಿ ಪಾಲ್ಮಿಂದ್ರ ಗಿಲ್ ಅವರು ಸಾಕಿರುವ ಈ ಕೋಣವು, ತನ್ನ ದೈತ್ಯಾಕಾರದಿಂದಲೇ ಸುತ್ತಲಿನ ಹಳ್ಳಿಗಳಲ್ಲಿ ಹೆಸರುವಾಸಿಯಾಗಿದೆ. ಒಂದೂವರೆ ಟನ್ಗಿಂತಲೂ ಹೆಚ್ಚು ತೂಗುವ ಈ ಕೋಣ, ಪುಷ್ಕರ ಮೇಳದಲ್ಲಿ ಗಮನ ಸೆಳೆದಿದೆ.
23 ಕೋಟಿ ರೂಪಾಯಿ ಬೆಲೆ: ಮೇಳದಲ್ಲಿ ಇದನ್ನು ಖರೀದಿಸಲು ಜನರು ನಾ ಮುಂದು ತಾ ಮುಂದು ಎಂದು ಪೈಪೋಟಿಗೆ ಇಳಿದಿದ್ದಾರೆ. 23 ಕೋಟಿ ರೂಪಾಯಿ ಬೆಲೆ ನಿಗದಿ ಮಾಡಲಾಗಿದೆ. ಆದರೆ, ಇದರ ಮಾಲೀಕರು ಮಾತ್ರ ಮಾರಾಟಕ್ಕೆ ಒಪ್ಪುತ್ತಿಲ್ಲ.
ದಿನಕ್ಕೆ ₹1,500 ಖರ್ಚು: ಈ ದೈತ್ಯ ಕೋಣವನ್ನು ಸಾಕುವುದು ಅಷ್ಟೇ ದುಬಾರಿಯಂತೆ. ಇದಕ್ಕೆ ಹಣ್ಣು, ಮೊಟ್ಟೆ, ಜೋಳ, ಸೋಯಾಬೀನ್, ದೇಸಿ ತುಪ್ಪ, ಹಾಲು, ಎಣ್ಣೆ ಕೇಕ್ ಮತ್ತು ಹಸಿರು ಮೇವನ್ನು ತಿನ್ನಿಸುತ್ತೇವೆ. ಇದರ ಆಹಾರಕ್ಕಾಗಿ ದಿನಕ್ಕೆ 1 ಸಾವಿರದಿಂದ 1,500 ರೂಪಾಯಿ ಖರ್ಚಾಗುತ್ತದೆ ಎನ್ನುತ್ತಾರೆ ಮಾಲೀಕರು.
ಖರ್ಚು ಭರಿಸಲಾಗದೆ ಈ ಕೋಣದ ತಾಯಿ, ಇನ್ನೊಂದು ಎಮ್ಮೆಯನ್ನು ಮಾರಾಟ ಮಾಡಿದ್ದೇವೆ. ಅನ್ಮೋಲ್ ಕೋಣದ ತಾಯಿ 25 ಲೀಟರ್ ಹಾಲು ನೀಡುತ್ತಿತ್ತು. ಅದರ ಕರುಗಳು 21 ಲೀಟರ್‌ಗಿಂತ ಕಡಿಮೆ ಹಾಲು ಕರೆಯುತ್ತಿರಲಿಲ್ಲ ಎಂದು ಅವರು ತಿಳಿಸಿದರು.
ಇದರ ವೀರ್ಯಕ್ಕಿದೆ ಭಾರೀ ಬೇಡಿಕೆ: ಅನ್ಮೋಲ್ ಕೋಣದ ವಿಶೇಷವೆಂದರೆ, ಅದರ ವೀರ್ಯ. ಈ ದೈತ್ಯನ ವೀರ್ಯವನ್ನು ತಮ್ಮ ಎಮ್ಮೆಗಳಿಗೆ ಇಂಜೆಕ್ಟ್ ಮಾಡಲು ರೈತರು ಬಯಸುತ್ತಾರೆ. ವಾರಕ್ಕೆ ಎರಡು ಬಾರಿ ಇದರ ವೀರ್ಯ ಸಂಗ್ರಹ ಮಾಡಲಾಗುವುದು. ಒಮ್ಮೆ ತೆಗೆದ ವೀರ್ಯದಿಂದ 300 ಕ್ಕೂ ಅಧಿಕ ಎಮ್ಮೆಗಳಿಗೆ ಉಪಯೋಗಿಸಬಹುದು. ಒಂದು ಎಮ್ಮೆಗೆ 250 ರೂಪಾಯಿಯಂತೆ ನೀಡಿ ರೈತರು ವೀರ್ಯ ಪಡೆಯುತ್ತಾರೆ ಎಂದು ಕೋಣದ ಮಾಲೀಕರು ಮಾಹಿತಿ ನೀಡಿದರು.
ಎಲ್ಲ ಮೇಳಗಳಿಗೆ ಈ ಕೋಣವನ್ನು ಕರೆದೊಯ್ಯುತ್ತೇವೆ. ಉತ್ತರಪ್ರದೇಶದಲ್ಲಿ ನಡೆದ ಜಾತ್ರೆಯಲ್ಲಿ ಉದ್ಯಮಿಯೊಬ್ಬರು 23 ಕೋಟಿ ರೂಪಾಯಿಗೆ ಇದರ ಖರೀದಿಗೆ ಪ್ರಸ್ತಾಪಿಸಿದ್ದರು. ಆದರೆ, ನಾವು ಮಾರಾಟಕ್ಕೆ ನೀಡಲಿಲ್ಲ. ಕಾರಣ, ಅದರ ವೀರ್ಯ ಮಾರಾಟದಿಂದಲೇ ಸಾವಿರಾರು ರೂಪಾಯಿ ಬರುತ್ತದೆ ಎಂದು ತಿಳಿಸಿದರು.
ಇದನ್ನೂ ಓದಿ: 'ಮಹಿಳೆಯರಿಗೆ ಮಾಸಿಕ ₹3 ಸಾವಿರ, ಜಾತಿಗಣತಿ': ಪಂಚ ಗ್ಯಾರಂಟಿ ಘೋಷಿಸಿದ ಮಹಾ ವಿಕಾಸ್ ಅಘಾಡಿ
