ಕುಟ್ರುಪ್ಪಾಡಿ: ಹಲವಾರು ವರ್ಷಗಳಿಂದ ಖಾಸಗಿ ವ್ಯಕ್ತಿಯೊಬ್ಬರಿಂದ ಒತ್ತುವರಿಯಾಗಿದ್ದ ಗ್ರಾಮ ಪಂಚಾಯತ್ ಜಾಗವನ್ನ ಗ್ರಾಮ ಪಂಚಾಯತ್‌ನಿಂದ ತೆರವುಗೊಳಿಸಲಾಗಿದೆ. ಜಾಗವನ್ನು ಕುಟ್ರುಪಾಡಿ ಗ್ರಾಪಂ ದೃಢ ನಿರ್ಧಾರದಿಂದ ತನ್ನ ವಶಕ್ಕೆ ಪಡೆದಿದೆ.
ಕಡಬ ತಾಲೂಕಿನ ಕುಟ್ರುಪ್ಪಾಡಿ ಗ್ರಾಮ ಪಂಚಾಯತ್ ಕಟ್ಟಡಕ್ಕೆ ತಾಗಿಕೊಂಡೇ ಇದ್ದ (ಸರ್ವೇ ನಂಬರ್ 122 ರಲ್ಲಿ 2(A)1 ರ ಸುಮಾರು 5.5 ಸೆಂಟ್ಸ್ ಜಾಗ) 2,500 ಚದರ ಅಡಿ ಜಾಗದಲ್ಲಿ ಖಾಸಗಿ ವ್ಯಕ್ತಿಯೊಬ್ಬರು ದಾರಿ ಮಾಡಿಕೊಂಡಿದ್ದಲ್ಲದೇ ಗೇಟು ಅಳವಡಿಸಿ ತಡೆಗೋಡೆ ನಿರ್ಮಿಸಿದ್ದರು.
ಕೆಲ ವರ್ಷಗಳ ಹಿಂದೆ ಜಾಗವನ್ನು ಗ್ರಾಪಂ ಸ್ವಾಧೀನಪಡಿಸಿಕೊಳ್ಳಲು ಮುಂದಾಗಿತ್ತು. ಆದರೆ, ಆಗ ರಾಜಕೀಯ ಒತ್ತಡ ತಂದು ತಡೆ ನೀಡಲಾಗಿತ್ತು. ಬಳಿಕ ಹಲವು ಬಾರಿ ತಡೆಗೋಡೆ ತೆರವುಗೊಳಿಸಲು ನೋಟಿಸು ನೀಡಿದರೂ ಒತ್ತುವರಿದಾರ ಕ್ಯಾರೇ ಎಂದಿರಲಿಲ್ಲ. ಆದರ, ಗ್ರಾಮ ಪಂಚಾಯತ್ ಸಭೆಯಲ್ಲಿ ಜಾಗ ಒತ್ತುವರಿ ತೆರವುಗೊಳಿಸೋದಕ್ಕೆ ಗಟ್ಟಿ ನಿರ್ಣಯ ಕೈಗೊಳ್ಳಲಾಗಿತ್ತು. ಅದರಂತೆ ಜನವರಿ 13ರಂದು ಜಿಲ್ಲಾ ಪಂಚಾಯತ್ ಕಾರ್ಯನಿರ್ವಹಣಾಧಿಕಾರಿ ಅವರ ಅನುಮತಿ ಪಡೆದು ಕಡಬ ಪೊಲೀಸರ ನೆರವಿನೊಂದಿಗೆ ತೆರವು ಕಾರ್ಯ ನಡೆಸಲಾಗಿದೆ.
ಸ್ವಾಧಿನ ಪಡಿಸಿಕೊಂಡ ಸ್ಥಳದಲ್ಲಿ ತಂತಿಬೇಲಿ ಅಳವಡಿಸಲಾಗಿದೆ. ಕೆಲವೇ ದಿನಗಳಲ್ಲಿ ಉದ್ಯೋಗ ಖಾತರಿ ಯೋಜನೆಯಡಿ ಸುಮಾರು 18 ಲಕ್ಷ ರೂ. ವೆಚ್ಚದಲ್ಲಿ ಕಟ್ಟಡ ನಿರ್ಮಾಣವಾಗಲಿದೆ ಎಂದು ಗ್ರಾಪಂ ಪಿಡಿಒ ವಿಲ್ಪ್ರೆಡ್ ರೋಡ್ರಿಗಸ್ ತಿಳಿಸಿದ್ದಾರೆ.
