ಬಳ್ಳಾರಿ (ವಿಜಯನಗರ) : ಅರಣ್ಯ ಇಲಾಖೆ, ಕರ್ನಾಟಕ ಪರಿಸರ ಪ್ರವಾಸೋದ್ಯಮ ಅಭಿವೃದ್ಧಿ ಮಂಡಳಿ ಹಾಗೂ ಗ್ರೀನ್ ಹೆಚ್‌ಬಿಹೆಚ್ ನೇತೃತ್ವದಲ್ಲಿ ಅಂಕಸಮುದ್ರದಲ್ಲಿ ಇಂದು ಮತ್ತು ನಾಳೆ ನಡೆಯುತ್ತಿರುವ 2 ದಿನಗಳ ಹಕ್ಕಿ ಹಬ್ಬಕ್ಕೆ ಶಾಸಕ ಎಸ್ ಭೀಮಾನಾಯ್ಕ್ ದೀಪ ಬೆಳಗುವ ಮೂಲಕ ಚಾಲನೆ ನೀಡಿದರು.
ಈ ವೇಳೆ ಮಾತನಾಡಿದ ಬಳ್ಳಾರಿ ಜಿಲ್ಲೆಯ ಉಪ ಅರಣ್ಯ ಸಂರಕ್ಷಣಾಧಿಕಾರಿ ಸಿದ್ರಾಮಪ್ಪ ಚಳಕಾಪುರೆ, ಅಂಕಸಮುದ್ರ ಪಕ್ಷಿ ಸಂರಕ್ಷಣೆ ಮಾಡಿಕೊಡಲು ಇಲಾಖೆಯಿಂದ ಕೆಲಸ ನಡೆಯುತ್ತಿದೆ. ಅಂಕ ಸಮುದ್ರವು ಪ್ರವಾಸೋದ್ಯಮವಾಗಿ ಹೊರಹೊಮ್ಮ ಬೇಕು ಎನ್ನುವ ಉದ್ದೇಶದಿಂದ ಪ್ರಥಮ ಬಾರಿಗೆ ಈ ಹಕ್ಕಿ ಹಬ್ಬವನ್ನು ಆಯೋಜಿಸಲಾಗಿದೆ.
ಎರಡು ದಿನಗಳಲ್ಲಿ ಪಕ್ಷಿಗಳ ಬಗ್ಗೆ ನುರಿತ ಸಂಪನ್ಮೂಲ ವ್ಯಕ್ತಿಗಳಿಂದ ಉಪನ್ಯಾಸ, ಪ್ರಾಯೋಗಿಕ ತಂತ್ರಾಂಶಗಳ ಬಗ್ಗೆ ಮಾಹಿತಿಯನ್ನು ನೀಡಲಾಗುತ್ತದೆ ಎಂದರು. ಮುಖ್ಯ ಅರಣ್ಯ ಸಂರಕ್ಷಣಾಧಿಕಾರಿ ಎಸ್.ಎಸ್ ಲಿಂಗರಾಜು ಮಾತನಾಡಿ, ಸ್ಥಳೀಯರು ಈ ಅಂಕಸಮುದ್ರಕ್ಕೆ ಹೆಚ್ಚಿನ ಮಹತ್ವ ನೀಡಿದ್ದಾರೆ.
ಇಲ್ಲಿಗೆ 30 ರಿಂದ 35 ಸಾವಿರ ಪಕ್ಷಿಗಳು ಆಗಮಿಸುತ್ತವೆ, ಶಾಸಕರಾದ ಭೀಮಾನಾಯ್ಕ್ ಅವರು ಈ ಕೆರೆಗೆ ತುಂಗಭದ್ರಾ ನದಿಯ ಹಿನ್ನಿರಿನಿಂದ ನೀರು ಬಿಡಿಸಿದ್ದು ಸಹ ಒಳ್ಳೆಯ ಕಾರ್ಯ ಎಂದ ಅವರು, ಸ್ಥಳೀಯರಿಗೆ ಮತ್ತು ಶಾಸಕರಿಗೆ ಧನ್ಯವಾದ ತಿಳಿಸಿದರು.
ಶಾಸಕ ಭೀಮಾನಾಯ್ಕ ಮಾತನಾಡಿ, ಅಂಕಸಮುದ್ರ ಕೆರೆ ಅಭಿವೃದ್ಧಿಗಾಗಿ ಕ್ರಿಯಾಯೋಜನೆ ತಯಾರಾಗಿದೆ. ಅಭಿವೃದ್ದಿಗಾಗಿ ಡಿಎಂಎಫ್ ಅನುದಾನದ ಅಡಿಯಲ್ಲಿ 8 ಕೋಟಿ 90 ಲಕ್ಷ ಹಣ ಬಿಡುಗಡೆ ಮಾಡಬೇಕು. ಶೇಕಡಾ 50ರಷ್ಟು ಹಣವನ್ನು ನಾನು ನೀಡುತ್ತೇನೆ. ಇನ್ನು, ಶೇ.50ರಷ್ಟು ಹಣವನ್ನು ಡಿಎಂಎಫ್‌ನಿಂದ ಬಿಡುಗಡೆ ಮಾಡಲು ಜಿಲ್ಲಾಧಿಕಾರಿಗೆ ಮನವಿ ಮಾಡಿದರು.
ಕಾರ್ಯಕ್ರಮದಲ್ಲಿ ತಹಶೀಲ್ದಾರ್ ಶರಣಮ್ಮ, ಬಳ್ಳಾರಿ ವೃತ್ತದ ಮುಖ್ಯ ಅರಣ್ಯ ಸಂರಕ್ಷಣಾಧಿಕಾರಿ ಎಸ್.ಎಸ್ ಲಿಂಗರಾಜು, ರಾಹುಲ್, ಜಿಲ್ಲಾ ಪಂಚಾಯತ್‌ನ ಆರ್. ಶಾರದಮ್ಮ ಇತರರು ಭಾಗವಹಿಸಿದ್ದರು.
