ಬೆಂಗಳೂರು: ಲೋಕಸಭಾ ಚುನಾವಣೆ ಹಿನ್ನೆಲೆಯಲ್ಲಿ ರಾಜ್ಯದ ಮೊದಲ ಹಂತದ ಚುನಾವಣೆಗೆ ಒಂದೇ ದಿನ ಬಾಕಿ ಉಳಿದಿದೆ. ಮಂಗಳವಾರ ಸಂಜೆಯಿಂದ ಗುರುವಾರ ರಾತ್ರಿವರೆಗೂ ಮದ್ಯದಂಗಡಿಗಳು ಮುಚ್ಚಲ್ಪಟ್ಟಿವೆ. ಹೀಗಾಗಿ ರಾಜ್ಯ ಸರ್ಕಾರಕ್ಕೆ ಸುಮಾರು 110 ಕೋಟಿ ರೂ. ನಷ್ಟವಾಗಲಿದೆ.
ಮುಕ್ತ ಹಾಗೂ ನ್ಯಾಯಸಮ್ಮತದಿಂದ ಚುನಾವಣೆ ನಡೆಸುವ ಹಿನ್ನೆಲೆಯಲ್ಲಿ ಚುನಾವಣೆಗೆ 48 ಗಂಟೆಗಳ ಮುನ್ನ ಅಬಕಾರಿ ಇಲಾಖೆಯಿಂದ ಪರವಾನಗಿ ಪಡೆದುಕೊಂಡಿರುವ ಎಲ್ಲಾ ಬಾರ್ಗಳು ತೆರೆಯಬಾರದು ಎಂದು ಚುನಾವಣಾ ಆಯೋಗ ಆದೇಶ ಹೊರಡಿಸಿದೆ. ಈ ಹಿನ್ನಲೆ ಮಂಗಳವಾರ ಸಂಜೆಯಿಂದಲೇ ಬೆಂಗಳೂರು ಸೇರಿದಂತೆ ಚುನಾವಣೆ ನಡೆಯುವ 14 ಕ್ಷೇತ್ರಗಳಲ್ಲಿನ ಎಲ್ಲಾ ಬಾರ್, ವೈನ್ ಶಾಪ್ಗಳು ಮುಚ್ಚಿವೆ. ಇದರಿಂದ ಬಿಯರ್ ಹಾಗೂ ಮದ್ಯ ಸರಬರಾಜಿನಲ್ಲಿ ವ್ಯತ್ಯಯ ಉಂಟಾಗಿದ್ದು, ಸುಮಾರು 110 ಕೋಟಿ ರೂ. ಬೊಕ್ಕಸಕ್ಕೆ ಕತ್ತರಿ ಬೀಳಲಿದೆ ಎಂದು ಅಂದಾಜಿಸಲಾಗಿದೆ.
ರಾಜ್ಯದಲ್ಲಿ ಬಿಯರ್ ತಯಾರಿಸುವ 8 ಬ್ಲೂವರಿಗಳು, ಹಾರ್ಡ್ ಡ್ರಿಂಕ್ಸ್ ತಯಾರಿಸುವ 30 ಡಿಸ್ಟಲರಿಗಳು, 20 ವೈನರಿಗಳಿದ್ದು, ಇವುಗಳ ಮೂಲಕ ಮದ್ಯ ತಯಾರಿಸಿ 70 ಡಿಪೋಗಳ ಮೂಲಕ ಸರಬರಾಜರಾಜು ಮಾಡಲಾಗುತ್ತದೆ. ಕರ್ನಾಟಕ ರಾಜ್ಯ ಪಾನಿಯ ನಿಗಮದಿಂದ ಅನುಮತಿ ಮೇರೆಗೆ ರಾಜ್ಯ ಎಲ್ಲಾ ಬಾರ್ ಹಾಗೂ ವೈನ್ ಶಾಪ್ಗಳಿಗೆ ಮದ್ಯ ಸರಬರಾಜು ಆಗುತ್ತದೆ. ಆದ್ರೆ ಮತದಾನ ಇರುವುದರಿಂದ ಮೂರು ದಿನ ಬಂದ್ ಮಾಡಲಾಗಿದೆ.
ಪ್ರತಿದಿನ ರಾಜ್ಯದಲ್ಲಿ 1.70 ಲಕ್ಷ ಬಾಕ್ಸ್ ಮದ್ಯ, 80 ಸಾವಿರ ಬಾಕ್ಸ್ ಬಿಯರ್ಗಳು ಪೂರೈಕೆ ಆಗಲಿದ್ದು, ಎರಡು ದಿನಕ್ಕೆ 3.50 ಲಕ್ಷ ಬಾಕ್ಸ್ ಮದ್ಯ ಹಾಗೂ 1.80 ಲಕ್ಷ ಬಾಕ್ಸ್ ಬಿಯರ್ಗಳಾಗಿದ್ದು ಇವುಗಳ ಮೊತ್ತ 110 ಕೋಟಿ ರೂ. ದಾಟಲಿದೆ ಎಂದು ಅಬಕಾರಿ ಇಲಾಖೆಯ ಅಧಿಕಾರಿಗಳು ತಿಳಿಸಿದ್ದಾರೆ.
