ಪಾಟ್ನಾ: ಬೆಂಗಾಲ್ ವಾರಿಯರ್ಸ್ ಬಲಿಷ್ಠ ಯು ಮುಂಬಾ ತಂಡವನ್ನು 32-30 ಅಂತರದಿಂದ ಮಣಿಸಿದರೆ, ಪಾಟ್ನಾ ಪೈರೇಟ್ಸ್ 41-20 ರಿಂದ ಯುಪಿ ಯೋದ ತಂಡವನ್ನು ಸೋಲಿಸಿದೆ.
ಪಾಟ್ನಾದ ಪಾಟಲೀಪುತ್ರ ಸ್ಪೋರ್ಟ್ಸ್ ಕಾಂಪ್ಲೆಕ್ಷ್ನಲ್ಲಿ ನಡೆದ ಮೊದಲ ಪಂದ್ಯದಲ್ಲಿ ಬೆಂಗಾಲ್ ವಾರಿಯರ್ಸ್ ಯು ಮುಂಬಾಗೆ ಶಾಕ್ ನೀಡಿತು. ಮೊದಲಾರ್ಧದಲ್ಲಿ 11-16ರಲ್ಲಿ ಹಿನ್ನಡೆ ಅನುಭವಿಸಿದ್ದ ವಾರಿಯರ್ಸ್ ದ್ವಿತೀಯಾರ್ಧದಲ್ಲಿ ಭರ್ಜರಿ ಪ್ರದರ್ಶನ ನೀಡಿದ ಮುಂಬೈ ತಂಡವನ್ನು 31-30 ಅಂಕಗಳಿಂದ ಸೋಲುಣಿಸಿತು.
ವಾರಿಯರ್ಸ್ ಕೆ ಪ್ರಪಂಜನ್ 6, ಮಣಿಂದರ್ ಸಿಂಗ್ 5, ಬಲ್ದೇವ್ ಸಿಂಗ್ 5, ಜೀವ ಕುಮಾರ್ 4, ನಬೀಬಕ್ಷ್ 3, ರಾಕೇಶ್ ನರ್ವಾಲ್ 3 ಅಂಕ ಪಡೆದರು. ಮುಂಬೈ ಪರ ಅರ್ಜುನ್ ದೇಶ್ವಲ್ 10, ಸುರಿಂದರ್ ಸಿಂಗ್ 4, ಸಂದೀಪ್ ನರ್ವಾಲ್ 3 ಅಂಕ ಪಡೆದು ವಾರಿಯರ್ಸ್ಗೆ ತೀವ್ರ ಪೈಪೋಟಿ ನೀಡಿದರು.
ಮತ್ತೊಂದು ಪಂದ್ಯದಲ್ಲಿ ಪಾಟ್ನಾ ಪೈರೇಟ್ಸ್ ತಂಡ 41-20 ಅಂಕಗಳ ಬೃಹತ್ ಅಂತರದಿಂದ ಯುಪಿ ಯೋಧ ತಂಡವನ್ನು ಸೋಲಿಸಿತು. ಪರ್ದೀಪ್ ನರ್ವಾಲ್ 12 ಅಂಕಗಳಿಸಿ ಮತ್ತೊಂದು ಸೂಪರ್ 10 ಸಂಪಾದಿಸಿದರು. ಡಿಫೆಂಡರ್ ನೀರಜ್ ಕುಮಾರ್ 8 ಅಂಕ ಪಡೆದು ಯೋಧ ತಂಡವನ್ನು 3 ಬಾರಿ ಆಲೌಟ್ ಮಾಡುವಲ್ಲಿ ಪ್ರಮುಖ ಪಾತ್ರವಹಿಸಿದರು. ಜಾನ್ ಕುಂಗ್ ಲಿ 5, ವಿಕಾಶ್ ಜಗ್ಲನ್ 3 ಅಂಕ ಪಡೆದರು.
ಯುಪಿ ಪರ ಸುಮಿತ್ 5, ಮೋನು ಗೋಯಟ್ 4 ಸುರಿಂದರ್ ಗಿಲ್ 3, ಅಜಾದ್ ಸಿಂಗ್ 3 ಅಂಕ ಪಡೆದರು.
