ಅಲ್ವಾಕ್ರಾ (ಕತಾರ್): ಕಳೆದ ಬಾರಿಯ ರನ್ನರ್ಅಪ್ ಕ್ರೊವೇಷಿಯಾ ಶೂಟೌಟ್ನಲ್ಲಿ ಗೆಲುವು ಸಾಧಿಸಿ ಕ್ವಾರ್ಟರ್ಫೈನಲ್ಗೆ ಎಂಟ್ರಿ ನೀಡಿತು. ಗುಂಪು ಹಂತದಲ್ಲಿ ಎರಡು ಮಾಜಿ ಚಾಂಪಿಯನ್ ತಂಡಗಳಿಗೆ ಸೋಲುಣಿಸಿ ಗುಂಪಿನಲ್ಲಿ ಅಗ್ರಸ್ಥಾನಿಯಾಗಿದ್ದ ಏಷ್ಯಾ ತಂಡ ಜಪಾನ್ ಆಘಾತ ಅನುಭವಿಸಿ ವಿಶ್ವಕಪ್ಗೆ ವಿದಾಯ ಹೇಳಿತು.
ಕ್ರೊವೇಷಿಯಾ ಗೋಲ್ಕೀಪರ್ ಡೊಮಿನಿಕ್ ಲಿವಾಕೋವಿಕ್ ಜಪಾನ್ನ ಆಟಗಾರರಿಗೆ ಭದ್ರ ತಡೆಗೋಡೆ ನಿರ್ಮಿಸುವ ಮೂಲಕ ಸೋಲಿಗೆ ಕಾರಣರಾದರು. ಮೂರು ಪೆನಾಲ್ಟಿ ಕಿಕ್ಗಳನ್ನು ಉಳಿಸಿದ ಡೊಮಿನಿಕ್ ಜಪಾನ್ ವಿರುದ್ಧ 3-1 ರಿಂದ ಗೆಲುವು ಧಕ್ಕುವಂತೆ ಮಾಡಿದರು.
ನಿಗದಿತ 90 ನಿಮಿಷಗಳ ಅವಧಿಯಲ್ಲಿ ಜಪಾನ್ ಮತ್ತು ಕ್ರೊಯೇಷಿಯಾ ತಲಾ 1-1 ಗೋಲು ಗಳಿಸಿದ್ದವು. ಪಂದ್ಯದ ಫಲಿತಾಂಶಕ್ಕಾಗಿ 30 ನಿಮಿಷ ಹೆಚ್ಚುವರಿಯಾಗಿ ಆಡಿಸಲಾಯಿತು. ಆಗಲೂ ಯಾರೂ ಗೋಲು ಗಳಿಸದಿದ್ದಾಗ, ಪೆನಾಲ್ಟಿ ಕಿಕ್ ಮೊರೆ ಹೋಗಲಾಯಿತು.
ಹೀಗಿತ್ತು ಪೆನಾಲ್ಟಿ ಶೂಟೌಟ್: ಶೂಟೌಟ್ನ ಮೊದಲೆರಡು ಪ್ರಯತ್ನದಲ್ಲಿ ಕಿಕ್ ಬಾರಿಸಿದ ಜಪಾನ್ನ ಮಿನಮಿನೊ, ಮಿಟೊಮಾ ಗೋಲು ಗಳಿಸುವಲ್ಲಿ ವಿಫಲವಾದರು. ಕ್ರೊವೇಷಿಯಾದ ವ್ಲಾಸಿಚ್, ಬ್ರೊಜೊವಿಚ್ ಜಪಾನ್ ತಡೆಯನ್ನು ಮೀರಿ ಗೋಲು ಬಾರಿಸಿದರು. ಇದರಿಂದ 2-0 ಯಲ್ಲಿ ಮುನ್ನಡೆ ಪಡೆಯಿತು. ಮೂರನೇ ಯತ್ನದಲ್ಲಿ ಜಪಾನ್ನ ಅಸಾನೊ ಗೋಲು ಗಳಿಸಿದರು. ಇದರಿಂದ ಪಂದ್ಯ ಮರುಜೀವ ಪಡೆಯಿತು. ಕ್ರೊವೇಷಿಯಾದ ಲಿವಾಜ ವಿಫಲರಾದರು.
4ನೇ ಯತ್ನದಲ್ಲಿ ಜಪಾನ್ನ ಯೋಶಿದಾ ವಿಫಲರಾಗಿ, ಫಸಾಲಿಚ್ ಗೋಲು ಬಾರಿಸುತ್ತಿದ್ದಂತೆ ಕ್ರೊವೇಷಿಯಾ ಮೈದಾನದ ತುಂಬೆಲ್ಲಾ ಗೆಲುವಿನ ಸಂಭ್ರಮದಲ್ಲಿ ಕುಣಿದಾಡಿತು. ಕ್ರೊವೇಷಿಯಾ ವಿಶ್ವಕಪ್ನಲ್ಲಿ ಮೂರು ಬಾರಿ ಶೂಟೌಟ್ನಲ್ಲಿ ಗೆಲುವು ಸಾಧಿಸಿತು. 2018 ರಲ್ಲಿ ಪ್ರಿಕ್ವಾರ್ಟರ್ಫೈನಲ್ ಮತ್ತು ಕ್ವಾರ್ಟರ್ಫೈನಲ್ನಲ್ಲಿ ನಡೆದ ಶೂಟೌಟ್ನಲ್ಲಿ ಗೆಲುವು ಕಂಡಿತ್ತು. ಜಪಾನ್ ಈ ಹಿಂದೆಯೂ ಪೆರುಗ್ವೆ ವಿರುದ್ಧದ ಶೂಟೌಟ್ನಲ್ಲಿ ಸೋಲು ಕಂಡಿತ್ತು.
ಓದಿ: 36 ನಿಮಿಷದಲ್ಲಿ 4 ಗೋಲು ಬಾರಿಸಿದ ಬ್ರೆಜಿಲ್ ಕ್ವಾರ್ಟರ್ಗೆ.. ದಕ್ಷಿಣ ಕೊರಿಯಾ ವಿಶ್ವಕಪ್ನಿಂದ ಔಟ್
