ಸ್ಯಾಂಟ್ನರ್ ಐಪಿಎಲ್​ ಅನುಭವ ಧರ್ಮಶಾಲಾದಲ್ಲಿ ತಂಡಕ್ಕೆ ನೆರವಾಗಲಿದೆ: ಟಾಮ್​ ಲ್ಯಾಥಮ್

ಹಿಮಾಚಲ ಪ್ರದೇಶದ ಧರ್ಮಶಾಲಾ ಮೈದಾನದಲ್ಲಿ ಭಾನುವಾರ ಭಾರತ ಮತ್ತು ನ್ಯೂಜಿಲೆಂಡ್​ ಸೆಣಸಲಿದ್ದು, ಉಭಯ ತಂಡಗಳು ಸಿದ್ಧತೆಯಲ್ಲಿದೆ.

ಧರ್ಮಶಾಲಾ (ಹಿಮಾಚಲ ಪ್ರದೇಶ): ಚೊಚ್ಚಲ ಪ್ರಶಸ್ತಿಯನ್ನು ಮುಡಿಗೇರಿಸಿಕೊಳ್ಳಲು ಹವಣಿಸುತ್ತಿರುವ ನ್ಯೂಜಿಲೆಂಡ್​ ತಂಡ 2023 ರಲ್ಲಿ ಉತ್ತಮ ಪ್ರದರ್ಶನ ನೀಡುತ್ತಿದೆ. ಆಡಿದ ನಾಲ್ಕು ಪಂದ್ಯಗಳನ್ನು ಗೆದ್ದುಕೊಂಡಿದೆ. ಭಾನುವಾರ ಧರ್ಮಶಾಲಾ ಮೈದಾನದಲ್ಲಿ ಆತಿಥೇಯ ಟೀಮ್​ ಇಂಡಿಯಾದ ವಿರುದ್ಧ ಕಿವೀಸ್​ ಪಡೆ ಸೆಣಸಬೇಕಿದೆ. ಇದಕ್ಕೂ ಮುನ್ನದಿನ ಮಾತನಾಡಿದ ನ್ಯೂಜಿಲೆಂಡ್​ ನಾಯಕ ಟಾಮ್​ ಲ್ಯಾಥಮ್​, ವೇಗದ ಬೌಲರ್ ಟಿಮ್ ಸೌಥಿ ಆಯ್ಕೆಗೆ ಲಭ್ಯರಿದ್ದಾರೆ, ಕೇನ್ ವಿಲಿಯಮ್ಸನ್ ಹೆಬ್ಬೆರಳು ಮುರಿತಕ್ಕೆ ಒಳಗಾಗಿದ್ದಾರೆ ಅವರ ಅಲಭ್ಯತೆ ಇರಲಿದೆ ಎಂದು ಮಾಹಿತಿ ನೀಡಿದ್ದಾರೆ.

• " class="align-text-top noRightClick twitterSection" data="">

ನ್ಯೂಜಿಲೆಂಡ್‌ನ ಸ್ಥಿರ ಪ್ರದರ್ಶನಕ್ಕೆ ವಿವಿಧ ಪರಿಸ್ಥಿತಿಗಳಿಗೆ ಹೊಂದಿಕೊಳ್ಳುವ ಸಾಮರ್ಥ್ಯವೆ ಕಾರಣ ಎಂದು ನಾಯಕ ಲ್ಯಾಥಮ್​ ಹೇಳಿದ್ದಾರೆ. "ಒಂದು ತಂಡವಾಗಿ ವಾತಾವರಣಕ್ಕೆ ವೇಗವಾಗಿ ಹೊಂದಿಕೊಳ್ಳುವ ಸಾಮರ್ಥ್ಯ ಇರುವುದು ನಮ್ಮ ಸ್ಥಿರ ಪ್ರದರ್ಶನಕ್ಕೆ ಕಾರಣವಾಗಿದೆ. ಕಳೆದ ಎರಡು ವಿಶ್ವಕಪ್​ ಪಂದ್ಯಗಳು ಇಂಗ್ಲೆಂಡ್​ ಮತ್ತು ಆಸ್ಟ್ರೇಲಿಯಾದಲ್ಲಿ ನಡೆದಿತ್ತು. ಅಲ್ಲಿ ಹೆಚ್ಚು ಕಡಿಮೆ ನ್ಯೂಜಿಲೆಂಡ್​ ವಾತಾವರಣ ಮತ್ತು ಪಿಚ್​ ಗುಣ ಹೊಂದಿತ್ತು. ಆದರೆ, ಭಾರತ ಪಿಚ್​ ಮತ್ತು ಇಲ್ಲಿನ ಪರಿಸ್ಥಿತಿ ಭಿನ್ನವಾಗಿದೆ. ಇದಕ್ಕೆ ನಾವು ಹೊಂದಾಣಿಕೆ ಮಾಡಿಕೊಳ್ಳುವುದು ಮುಖ್ಯವಾಗುತ್ತದೆ. ತಂಡ ಸಮರ್ಥವಾಗಿ ಹೊಂದಿಕೊಂಡಿದೆ" ಎಂದಿದ್ದಾರೆ.

"ಭಾರತ ಅದ್ಭುತ ತಂಡವಾಗಿದೆ. ಅನೇಕ ವರ್ಷಗಳಿಂದ, ವಿಶೇಷವಾಗಿ ಈ ವಿಶ್ವಕಪ್‌ನಲ್ಲಿ ಉತ್ತಮ ಪ್ರದರ್ಶನ ನೀಡುತ್ತಿರುವುದನ್ನು ನೋಡಿದ್ದೇವೆ. ಬ್ಯಾಟಿಂಗ್​ ಮತ್ತು ಬೌಲಿಂಗ್​ನಲ್ಲಿ ಭಾರತ ತಂಡ ಸಮರ್ಥವಾಗಿದೆ. ಹೀಗಾಗ ಪಂದ್ಯವನ್ನು ನಾವು ಸಂಪೂರ್ಣ 100 ಓವರ್ ಆಡಬೇಕಿದೆ. ಉಭಯ ತಂಡಗಳು ಫಾರ್ಮ್​ನಲ್ಲಿರುವುದರಿಂದ ಕೆಲವು ಉತ್ತಮ ಕ್ರಿಕೆಟ್ ಆಡುತ್ತಿರುವುದನ್ನು ನೋಡಬಹುದು, ನಾಳೆ ಉತ್ತಮ ಸ್ಪರ್ಧೆಯಾಗಲಿದೆ,"ಎಂದು ಕಿವೀಸ್ ನಾಯಕ ಹೇಳಿದರು.

ಚೆನ್ನೈ ಸೂಪರ್​ ಕಿಂಗ್ಸ್​ಗೆ ಇಂಡಿಯನ್​ ಪ್ರೀಮಿಯರ್​ ಲೀಗ್​ನಲ್ಲಿ ಆಡುತ್ತಿರುವ ಮಿಚೆಲ್ ಸ್ಯಾಂಟ್ನರ್ ತಂಡಕ್ಕೆ ಆಸರೆ ಆಗುತ್ತಾರೆ ಎಂಬ ಭರವಸೆಯನ್ನು ನಾಯಕ ವ್ಯಕ್ತ ಪಡಿಸಿದ್ದಾರೆ. "ಸ್ಯಾಂಟ್ನರ್ ಅವರ ಸಿಎಸ್​ಕೆ (ಚೆನ್ನೈ ಸೂಪರ್ ಕಿಂಗ್ಸ್) ಅನುಭವವು ಭಾರತೀಯ ಪಿಚ್​ಗಳಲ್ಲಿ ಸಹಾಯಕಾರಿಯಾಗಿದೆ. ಧರ್ಮಶಾಲಾ ಮೈದಾನದಲ್ಲಿ ಅವರ ಬೌಲಿಂಗ್​ ಎಷ್ಟು ಸಹಾಯ ಮಾಡುತ್ತದೆ ಎಂಬುದನ್ನು ಕಾದು ನೋಡಬೇಕಿದೆ. ಕಳೆದ ಪಂದ್ಯಗಳಲ್ಲಿ ಧರ್ಮಶಾಲಾ ಪಿಚ್​​ ಸ್ಪಿನ್​ ಸ್ನೇಹಿಯಾಗಿ ವರ್ತಿಸಿತ್ತು" ಎಂದು ಟಾಮ್ ಲ್ಯಾಥಮ್ ಹೇಳಿದರು.

ನ್ಯೂಜಿಲೆಂಡ್ ಏಕದಿನ ವಿಶ್ವಕಪ್‌ನಲ್ಲಿ ಸ್ಥಿರ ಪ್ರದರ್ಶನ ನೀಡುತ್ತಾ ಬಂದಿದೆ. 2015 ಮತ್ತು 2019 ಆವೃತ್ತಿಗಳಲ್ಲಿ ರನ್ನರ್ ಅಪ್ ಆಗಿತ್ತು. 2011 ರಲ್ಲಿ ಸೆಮಿಫೈನಲ್​ನಲ್ಲಿ ಸೋಲನುಭವಿಸಿತ್ತು. ಟಿ20 ವಿಶ್ವಕಪ್​ನಲ್ಲಿ ದಕ್ಷಿಣ ಆಫ್ರಿಕಾ 2021 ರಲ್ಲಿ ರನ್ನರ್​ ಅಪ್​ ಆದರೆ, 2022ರಲ್ಲಿ ಸೆಮಿಫೈನಲ್​ನಿಂದ ಹೊರಬಿದ್ದಿತ್ತು. ​ನ್ಯೂಜಿಲೆಂಡ್ 2021 ರಲ್ಲಿ ಉದ್ಘಾಟನಾ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್ ಗೆದ್ದುಕೊಂಡಿತ್ತು.

ಇದನ್ನೂ ಓದಿ: ವಿಶ್ವಕಪ್​ನಲ್ಲಿ ಚೊಚ್ಚಲ ಗೆಲುವು ದಾಖಲಿಸಿದ ಶ್ರೀಲಂಕಾ: ನೆದರ್ಲೆಂಡ್​ಗೆ 5 ವಿಕೆಟ್​ಗಳ ಸೋಲು