ಡುರ್ಹಮ್ (ಇಂಗ್ಲೆಂಡ್): ಇಂಗ್ಲೆಂಡ್ ವಿರುದ್ಧದ ಟೆಸ್ಟ್ ಸರಣಿ ಹಿನ್ನೆಲೆ ಮೂರು ದಿನಗಳ ಅಭ್ಯಾಸ ಪಂದ್ಯ ಆಡುತ್ತಿರುವ ಭಾರತ ತಂಡ ಮೇಲುಗೈ ಸಾಧಿಸಿದೆ. ಕೌಂಟಿ ಸೆಲೆಕ್ಟ್ ಇಲೆವೆನ್ ವಿರುದ್ಧದ 2ನೇ ದಿನದಾಟದಂದು ಬೌಲರ್ ಉಮೇಶ್ ಯಾದವ್ ದಾಳಿಗೆ ಇಲೆವನ್ ತಂಡ 220ಕ್ಕೆ 9 ವಿಕೆಟ್ ಕಳೆದುಕೊಂಡಿದೆ. ಕೌಂಟಿ ಪರವಾಗಿ ಓಪನರ್ ಹಸೀಬ್ ಹಮೀದ್ 112ರನ್ ಗಳಿಸಿದ್ದು ಬಿಟ್ಟರೆ ಮತ್ಯಾರು ಆಕರ್ಷಕ ಬ್ಯಾಟಿಂಗ್ ಪ್ರದರ್ಶನ ನೀಡಲಿಲ್ಲ.
ಮೊದಲ 56 ರನ್ಗಳಿಗೆ 4 ವಿಕೆಟ್ ಕಳೆದುಕೊಂಡು ಅಪಾಯಕ್ಕೆ ಸಿಲುಕಿದ್ದ ತಂಡವನ್ನು ಹಮೀದ್ ದಡಸೇರಿಸಿದರು. ಮುಂಬರುವ ಭಾರತ ವಿರುದ್ಧದ 2 ಟೆಸ್ಟ್ ಪಂದ್ಯಗಳಿಗೂ ಹಮೀದ್ ಆಯ್ಕೆಯಾಗಿದ್ದು, ಅವರ ಒಟ್ಟಾರೆ ಇನ್ನಿಂಗ್ಸ್ನಲ್ಲಿ 13 ಬೌಂಡರಿ ಸಿಡಿಸಿ ಮಿಂಚಿದ್ದಾರೆ.
ಇತ್ತ ಬೌಲಿಂಗ್ ನಲ್ಲಿ ಮಾರಕ ದಾಳಿ ನಡೆಸಿದ ಉಮೇಶ್ ಯಾದವ್ 3 ವಿಕೆಟ್ ಪಡೆದರೆ, ಸಿರಾಜ್ 2 ವಿಕೆಟ್ ಪಡೆದರೆ ಬುಮ್ರಾ, ಜಡೇಜಾ, ಅಕ್ಸರ್ ಪಟೇಲ್, ಶಾರ್ದುಲ್ ಠಾಕೂರ್ ತಲಾ ಒಂದೊಂದು ವಿಕೆಟ್ ಪಡೆದಿದ್ದಾರೆ. ಇದಕ್ಕೂ ಮೊದಲು ಭಾರತ ತಂಡ 311 ರನ್ಗಳಿಗೆ ಆಲ್ಔಟ್ ಆಗಿತ್ತು. ಸದ್ಯ ಇದೀಗ ಕೌಂಟಿ ತಂಡ 220ಕ್ಕೆ 9 ವಿಕೆಟ್ ಕಳೆದುಕೊಂಡು 91 ರನ್ಗಳಿಂದ ಹಿನ್ನಡೆ ಸಾಧಿಸಿದೆ.
ಕೊಹ್ಲಿ ಮತ್ತು ರಹಾನೆ ಅನುಪಸ್ಥಿತಿಯಲ್ಲಿ ರೋಹಿತ್ ನೇತೃತ್ವದಲ್ಲಿ ಕಣಕ್ಕಿಳಿದಿರುವ ಭಾರತ ತಂಡ ಕೇವಲ 67 ರನ್ಗಳಾಗುವಷ್ಟರಲ್ಲಿ ರೋಹಿತ್(9), ಮಯಾಂಕ್ ಅಗರ್ವಾಲ್(28), ಚೇತೇಶ್ವರ್ ಪೂಜಾರ(21) ವಿಕೆಟ್ ಕಳೆದುಕೊಂಡಿತು. 5ನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ರಾಹುಲ್ ಹನುಮ ವಿಹಾರಿ ಜೊತೆಗೂಡಿ 4ನೇ ವಿಕೆಟ್ಗೆ 40 ರನ್ ಸೇರಿಸಿದರು. 24 ರನ್ಗಳಿಸಿದ್ದ ವಿಹಾರಿ ಪ್ಯಾಟರ್ಸನ್ ವೇಟ್ಗೆ ವಿಕೆಟ್ ಒಪ್ಪಿಸಿದರು.
150 ಎಸೆತಗಳನ್ನು ಎದುರಿಸಿದ ರಾಹುಲ್ 11 ಬೌಂಡರಿ ಮತ್ತು 1 ಸಿಕ್ಸರ್ ಸಹಿತ 101 ರನ್ಗಳಿಸಿ ಬೇರೆ ಆಟಗಾರರಿಗೆ ಬ್ಯಾಟಿಂಗ್ ಮಾಡಲು ಅವಕಾಶ ಮಾಡಿಕೊಡುವ ಸಲುವಾಗಿ ನಿವೃತ್ತಿ ತೆಗೆದುಕೊಂಡಿದ್ದರು, ಅಂತಿಮವಾಗಿ ಭಾರತ 311 ಗಳಿಸಿತ್ತು.
