ದುಬೈ: ಬಹು ನಿರೀಕ್ಷಿತ 13ನೇ ಆವೃತ್ತಿಯ ಐಪಿಎಲ್ ವೇಳಾಪಟ್ಟಿಯನ್ನು ಬಿಸಿಸಿಐ ಭಾನುವಾರ ಬಿಡುಗಡೆ ಮಾಡಿದೆ. ಉದ್ಘಾಟನಾ ಪಂದ್ಯದಲ್ಲಿ ಹಾಲಿ ಚಾಂಪಿಯನ್ ಮುಂಬೈ ಇಂಡಿಯನ್ಸ್ ರನ್ನರ್ ಆಪ್ ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ ಸೆಣಸಾಡಲಿದೆ.
ಉದ್ಘಾಟನಾ ಪಂದ್ಯ ಮುಂಬೈಗೆ ಶಾಪವಾಗಿದೆ ಏಕೆಂದರೆ ನಾಲ್ಕು ಬಾರಿ ಚಾಂಪಿಯನ್ ಆಗಿರುವ ಮುಂಬೈ ಇಂಡಿಯನ್ಸ್ ಈ ಹಿಂದೆ 6 ಬಾರಿ ಉದ್ಘಾಟನಾ ಪಂದ್ಯವನ್ನಾಡಿದೆ. ಇದರಲ್ಲಿ ಒಂದು ಬಾರಿ ಚಾಂಪಿಯನ್ ಆಗಿದ್ದರೆ ಎರಡು ಕ್ವಾಲಿಫೈಯರ್ ಹಂತದಕ್ಕೇರಿದೆ. 3 ಬಾರಿ ಲೀಗ್ ಹಂತದಲ್ಲೇ ಹೊರಬಿದ್ದಿದೆ.
6 ಬಾರಿ ಆರಂಭಿಕ ಪಂದ್ಯವನ್ನಾಡಿರುವ ಮುಂಬೈ ಇಂಡಿಯನ್ಸ್ 2009ರಲ್ಲಿ 7ನೇ ಸ್ಥಾನ, 2012ರಲ್ಲಿ 3ನೇ ಸ್ಥಾನ, 2014ರಲ್ಲಿ 4ನೇ ಸ್ಥಾನ, 2016ರಲ್ಲಿ 5ನೇ ಸ್ಥಾನ, 2018ರಲ್ಲಿ 5ನೇ ಸ್ಥಾನಕ್ಕೆ ಸೀಮಿತವಾಗಿದೆ. 2015ರಲ್ಲಿ ಮುಂಬೈ ಇಂಡಿಯನ್ಸ್ ಸಿಎಸ್ಕೆ ತಂಡವನ್ನು ಮಣಿಸಿ 2ನೇ ಬಾರಿ ಐಪಿಎಲ್ ಕಿರೀಟ ಧರಿಸಿತ್ತು.
ಆದರೆ ಉದ್ಘಾಟನಾ ಪಂದ್ಯ ಚೆನ್ನೈಗೆ ಬಹಳ ಅದೃಷ್ಟವಾಗಿದೆ. ಏಕೆಂದರೆ ಚೆನ್ನೈ 5 ಬಾರಿ ಮೊದಲ ಪಂದ್ಯವನ್ನಾಡಿರುವ ಲೀಗ್ನಲ್ಲಿ 4 ಬಾರಿ ಫೈನಲ್ ಪ್ರವೇಶಿಸಿದೆ. ಇದರಲ್ಲಿ ಎರಡು ಬಾರಿ ಚಾಂಪಿಯನ್ ಆಗಿದ್ದರೆ, ಮತ್ತೆರಡು ಬಾರಿ ರನ್ನರ್ ಅಪ್ಗೆ ತೃಪ್ತಿಪಟ್ಟು ಕೊಂಡಿದೆ. 2009, 2011, 2012, 2018 ಮತ್ತು 2019ರಲ್ಲಿ ಸಿಎಸ್ಕೆ ಮೊದಲ ಪಂದ್ಯವನ್ನಾಡಿದ್ದು, 2011 ಮತ್ತು 2018ರಲ್ಲಿ ಚಾಂಪಿಯನ್, 2012 ಮತ್ತು 2019ರಲ್ಲಿ ರನ್ನರ್ ಅಪ್ ಹಾಗೂ 2009ರಲ್ಲಿ 3ನೇ ಸ್ಥಾನ ಪಡೆದಿದೆ.
ಒಟ್ಟಿನಲ್ಲಿ ಮುಂಬೈ ಇಂಡಿಯನ್ಸ್ ಹಾಗೂ ಚೆನ್ನೈ ಸೂಪರ್ ಕಿಂಗ್ಸ್ ಆರಂಭಿಕ ಪಂದ್ಯಗಳನ್ನಾಡಿದ ಟೂರ್ನಿಯಲ್ಲಿ ಸಿಎಸ್ಕೆ ಮೇಲುಗೈ ಸಾಧಿಸಿದೆ. ಆದರೆ ಬಲಿಷ್ಠ ಪಡೆಯನ್ನು ಹೊಂದಿರುವ ಮುಂಬೈ ತಂಡ ಈ ಬಾರಿ ಯಾವ ರೀತಿ ಪ್ರದರ್ಶನ ತೋರಲಿದೆ ಎಂದು ಕಾದು ನೋಡಬೇಕಿದೆ.
