ಮಾಳಿಗೆ ಮೇಲೆ ನಿಂತಿದ್ದ ಮಹಿಳೆಗೆ ಅಪ್ಪಳಿಸಿದ ಉಲ್ಕಾಶಿಲೆ; ಫ್ರಾನ್ಸ್​ನಲ್ಲೊಂದು ಅಪರೂಪದ ಖಗೋಳ ವಿದ್ಯಮಾನ

ಮನೆಯ ಮಾಳಿಗೆಯ ಮೇಲೆ ಕಾಫಿ ಕುಡಿಯುತ್ತ ನಿಂತಿದ್ದ ಮಹಿಳೆಯೊಬ್ಬರಿಗೆ ಉಲ್ಕಾಶಿಲೆ ಬಂದು ಅಪ್ಪಳಿಸಿರುವ ಘಟನೆ ಫ್ರಾನ್ಸ್​ನಲ್ಲಿ ನಡೆದಿದೆ.

ನವದೆಹಲಿ : ಅತ್ಯಂತ ಅಪರೂಪದ ಖಗೋಳ ಘಟನೆಯೊಂದರಲ್ಲಿ, ಫ್ರೆಂಚ್ ಮಹಿಳೆಯೊಬ್ಬರು ತನ್ನ ಸ್ನೇಹಿತನೊಂದಿಗೆ ಟೆರೇಸ್‌ನಲ್ಲಿ ಕಾಫಿ ಸೇವಿಸುತ್ತಿದ್ದಾಗ ಉಲ್ಕಾಶಿಲೆ ಹಾರಿಬಂದು ಅಪ್ಪಳಿಸಿದೆ ಎಂದು ಮಾಧ್ಯಮಗಳು ವರದಿ ಮಾಡಿವೆ. ಆಕಾಶದಿಂದ ಬಂದ ನಿಗೂಢ ಬೆಣಚುಕಲ್ಲು ಮಹಿಳೆಯ ಪಕ್ಕೆಲುಬಿಗೆ ತಾಗಿದೆ.

"ನಮ್ಮ ಪಕ್ಕದ ಮೇಲ್ಛಾವಣಿಯ ಕಡೆಯಿಂದ ದೊಡ್ಡ ಬೆಳಕಿನ ಕಣ (ಪೂಮ್) ಬರುತ್ತಿರುವುದು ನನಗೆ ಕಾಣಿಸಿತು. ನಂತರದ ಸೆಕೆಂಡಿನಲ್ಲಿ ನನ್ನ ಪಕ್ಕೆಲುಬುಗಳಿಗೆ ಏನೋ ಅಪ್ಪಳಿಸಿದ ಅನುಭವವಾಯಿತು. ಅದು ಪ್ರಾಣಿ ಅಥವಾ ಬಾವಲಿ ಇರಬಹುದು ಎಂದು ಭಾವಿಸಿದೆ!" ಎಂದು ಮಹಿಳೆ ಹೇಳಿದ್ದಾರೆ. "ನಂತರ ಅದು ಸಿಮೆಂಟ್ ತುಂಡು ಇರಬಹುದು ಎಂದು ನೋಡಿದೆವು. ಆದರೆ ಅದು ಯಾವುದೇ ಬಣ್ಣವಿಲ್ಲ ಹೊಂದಿಲ್ಲ." ಎಂದು ಅವರು ತಿಳಿಸಿದ್ದಾರೆ.

ಕೊನೆಗೆ ತನಗೆ ಅಪ್ಪಳಿಸಿದ ವಸ್ತು ಎಲ್ಲಿಂದ ಬಂತು ಎಂಬುದರ ಪರೀಕ್ಷೆಗೆ ಮಹಿಳೆ ಮುಂದಾಗಿದ್ದಾಳೆ. ಈ ಸಮಯದಲ್ಲಿ ನೆರೆಹೊರೆಯ ವ್ಯಕ್ತಿಯೊಬ್ಬ, ಅದು ಬಾಹ್ಯಾಕಾಶದಿಂದ ಬಂದಿದ್ದಾಗಿರಬಹುದು ಎಂದು ಸಂಶಯ ಪಟ್ಟು ಅದನ್ನು ಬಾಹ್ಯಾಕಾಶ ತಜ್ಞರಿಂದ ಪರೀಕ್ಷಿಸುವಂತೆ ಸಲಹೆ ನೀಡಿದ್ದಾರೆ. ವಸ್ತುವನ್ನು ಪರೀಕ್ಷೆ ಮಾಡಿದ ತಜ್ಞ ಭೂವಿಜ್ಞಾನಿ ಡಾ. ಥಿಯೆರಿ ರೆಬ್ಮನ್ ಅದನ್ನು ಉಲ್ಕಾಶಿಲೆ ಎಂದು ದೃಢಪಡಿಸಿದ್ದಾರೆ. ಅಲ್ಲದೆ ಆ ವಸ್ತು ಭೂಮಿಯ ಹೊರಗಿನಿಂದ ಬಂದಿದ್ದಾಗಿದೆ ಎಂದು ತಿಳಿಸಿದ್ದಾರೆ.

ಅಪ್ಪಳಿಸಿದ ಕಲ್ಲು ಕಬ್ಬಿಣ ಮತ್ತು ಸಿಲಿಕಾನ್ ಮಿಶ್ರಣವನ್ನು ಹೊಂದಿರುವಂತೆ ಕಂಡುಬಂದಿದೆ ಮತ್ತು ಇದು ಉಲ್ಕಾಶಿಲೆಯಾಗಿರಬಹುದು ಎಂದು ರೆಬ್ಮನ್ ಉಲ್ಲೇಖಿಸಿದ್ದಾರೆ. ಪತ್ತೆಯಾದ ಉಲ್ಕಾಶಿಲೆಯ ಎಲ್ಲಾ ತುಣುಕುಗಳು 100 ಗ್ರಾಂಗಿಂತ ಹೆಚ್ಚು ತೂಕವಿವೆ ಎಂದು ವರದಿ ತಿಳಿಸಿದೆ. ಇಂಥ ವಸ್ತುಗಳು ಜನರಿಗೆ ಅಪ್ಪಳಿಸುವುದು ಬಹಳ ಅಪರೂಪ ಎಂದು ಭೂವಿಜ್ಞಾನಿ ಹೇಳಿದ್ದಾರೆ. ಉಲ್ಕಾಶಿಲೆಗಳು ಬಾಹ್ಯಾಕಾಶ ಶಿಲೆಗಳಾಗಿದ್ದು, ಅವು ಭೂಮಿಯ ವಾತಾವರಣವನ್ನು ಪ್ರವೇಶಿಸುವವರೆಗೂ ಗಟ್ಟಿಯಾಗಿರುತ್ತವೆ ಮತ್ತು ನೆಲಕ್ಕೆ ಅಪ್ಪಳಿಸುತ್ತವೆ ಎಂದು ವಿಜ್ಞಾನಿ ತಿಳಿಸಿದ್ದಾರೆ.

ಈ ವಸ್ತುಗಳು ಬಾಹ್ಯಾಕಾಶದಲ್ಲಿರುವಾಗ ಉಲ್ಕೆಗಳು ಎಂದು ಕರೆಯಲ್ಪಡುತ್ತವೆ. ಇವು ಧೂಳಿನ ಕಣಗಳಿಂದ ಹಿಡಿದು ಸಣ್ಣ ಕ್ಷುದ್ರಗ್ರಹಗಳವರೆಗಿನ ಗಾತ್ರದಲ್ಲಿರುತ್ತವೆ. ನಾಸಾ ಪ್ರಕಾರ, ಪ್ರತಿದಿನ ಸುಮಾರು 50 ಟನ್ ಉಲ್ಕಾಶಿಲೆಗಳು ಭೂಮಿಗೆ ಬೀಳುತ್ತವೆ ಎಂದು ಅಂದಾಜಿಸಲಾಗಿದೆ. "ನಮ್ಮ ಸಮಶೀತೋಷ್ಣ ಪರಿಸರದಲ್ಲಿ ಅವುಗಳನ್ನು ಕಂಡುಹಿಡಿಯುವುದು ಬಹಳ ಅಪರೂಪ" ಎಂದು ರೆಬ್ಮನ್ ಹೇಳಿದ್ದಾರೆ.

"ಅವು ವಾತಾವರಣದಲ್ಲಿರುವ ಇತರ ಅಂಶಗಳೊಂದಿಗೆ ವಿಲೀನಗೊಳ್ಳುತ್ತವೆ. ಮರುಭೂಮಿಯ ಪರಿಸರದಲ್ಲಿ ನಾವು ಅವುಗಳನ್ನು ಸುಲಭವಾಗಿ ಕಂಡುಹಿಡಿಯಬಹುದು." ಉಲ್ಕಾಶಿಲೆಯು ಒಬ್ಬ ವ್ಯಕ್ತಿಗೆ ನೇರವಾಗಿ ಬಡಿದ ಮೊದಲ ದೃಢಪಡಿಸಿದ ಪ್ರಕರಣ 1954 ರಲ್ಲಿ ಅಮೆರಿಕದಲ್ಲಿ ಕಂಡು ಬಂದಿತ್ತು. ಅಲ್ಲಿ ಮಹಿಳೆಯೊಬ್ಬಳಿಗೆ 3.6 ಕೆಜಿ ತೂಕದ ಉಲ್ಕಾಶಿಲೆ ಅಪ್ಪಳಿಸಿತ್ತು. ಉಲ್ಕಾಶಿಲೆ ಬಡಿದಿದ್ದರಿಂದ ಮಹಿಳೆಗೆ ತೀವ್ರ ಗಾಯಗಳಾಗಿದ್ದವು.

ಉಲ್ಕಾಶಿಲೆಗಳು ಭೂಮಿಯ ಮೇಲ್ಮೈಗೆ ಬೀಳುವ ಬಾಹ್ಯಾಕಾಶ ಬಂಡೆಗಳಾಗಿವೆ. ಈ ರೀತಿಯ ಬಾಹ್ಯಾಕಾಶ ಶಿಲೆಗಳ ಅಸ್ತಿತ್ವದಲ್ಲಿ ಉಲ್ಕೆಗಳು ಕೊನೆಯ ಹಂತವಾಗಿದೆ.

ಇದನ್ನೂ ಓದಿ : Global Warming: ಜೂನ್ 2023 ಭೂಮಿ ಕಂಡ ಅತ್ಯಧಿಕ ಬಿಸಿಯಾದ ತಿಂಗಳು