ವಿಯೆಟ್ನಾಂನಲ್ಲಿ ಭಾರತ-ಯುಕೆ ತಳಿಗಳ ಹೈಬ್ರಿಡ್ ಕೊರೊನಾ ವೈರಸ್ ಪತ್ತೆ

ವಿಯೆಟ್ನಾಂನಲ್ಲಿ ಭಾರತ ಮತ್ತು ಯುಕೆಗಳಲ್ಲಿ ಕಂಡುಬರುವ ತಳಿಗಳಿಂದ ಹೊಸ ಹೈಬ್ರಿಡ್ ರೂಪಾಂತರ ಕೊರೊನಾ ವೈರಸ್​ ಪತ್ತೆಯಾಗಿದ್ದು, ಇದು ಗಾಳಿಯ ಮೂಲಕ ವೇಗವಾಗಿ ಹರಡುತ್ತದೆ ಎಂದು ಆರೋಗ್ಯ ಅಧಿಕಾರಿಗಳು ಹೇಳಿದ್ದಾರೆ.

ಹನೋಯಿ (ವಿಯೆಟ್ನಾಂ): ವಿಯೆಟ್ನಾಂನಲ್ಲಿ ಹೊಸ ಕೋವಿಡ್​-19 ರೂಪಾಂತರ ಪತ್ತೆಯಾಗಿದೆ. ಇದು ಗಾಳಿಯ ಮೂಲಕ ವೇಗವಾಗಿ ಹರಡುತ್ತದೆ ಮತ್ತು ಇದು ಭಾರತ ಮತ್ತು ಬ್ರಿಟನ್‌ನಲ್ಲಿ ಮೊದಲು ಕಂಡುಬಂದ ತಳಿಗಳ ಸಂಯೋಜನೆಯಾಗಿದೆ ಎಂದು ಅಲ್ಲಿನ ಆರೋಗ್ಯ ಅಧಿಕಾರಿಗಳು ಶನಿವಾರ ದೃಢಪಡಿಸಿದ್ದಾರೆ.

ಕೈಗಾರಿಕಾ ವಲಯಗಳು, ಹನೋಯಿ ಮತ್ತು ಹೊ ಚಿ ಮಿನ್ಹ್ ಸಿಟಿಯಂತಹ ದೊಡ್ಡ ನಗರಗಳನ್ನು ಒಳಗೊಂಡಂತೆ ದೇಶವು ತನ್ನ ಅರ್ಧದಷ್ಟು ಪ್ರದೇಶಗಳಲ್ಲಿ ಹೊಸ ರೂಪಾಂತರವನ್ನು ಎದುರಿಸಲು ಹೆಣಗಾಡುತ್ತಿದೆ.

ವಿಯೆಟ್ನಾಂನಲ್ಲಿ 47 ಸಾವುಗಳು ಸೇರಿದಂತೆ 6,800 ಕ್ಕೂ ಹೆಚ್ಚು ಪ್ರಕರಣಗಳು ವರದಿಯಾಗಿವೆ. ಭಾರತ ಮತ್ತು ಯುಕೆಗಳಲ್ಲಿ ಕಂಡುಬರುವ ತಳಿಗಳಿಂದ ಹೊಸ ಹೈಬ್ರಿಡ್ ರೂಪಾಂತರವನ್ನು ನಾವು ಕಂಡುಹಿಡಿದಿದ್ದೇವೆ ಎಂದು ಆರೋಗ್ಯ ಸಚಿವ ನ್ಗುಯೆನ್ ತನ್ಹ್ ಲಾಂಗ್ ಅವರು ಸಾಂಕ್ರಾಮಿಕ ರೋಗದ ಶನಿವಾರದ ರಾಷ್ಟ್ರೀಯ ಸಭೆಯಲ್ಲಿ ಹೇಳಿದರು.

ಈ ರೂಪಾಂತರದ ಲಕ್ಷಣವೆಂದರೆ ಅದು ಗಾಳಿಯಲ್ಲಿ ಬೇಗನೆ ಹರಡುತ್ತದೆ. ಗಂಟಲಿನ ದ್ರವದಲ್ಲಿ ವೈರಸ್ ಸಾಂದ್ರತೆಯು ವೇಗವಾಗಿ ಹೆಚ್ಚಾಗುತ್ತದೆ ಮತ್ತು ಸುತ್ತಮುತ್ತಲಿನ ಪರಿಸರಕ್ಕೆ ಬಹಳ ಬಲವಾಗಿ ಹರಡುತ್ತದೆ. ಈ ಹೊಸ ರೂಪಾಂತರದೊಂದಿಗೆ ದಾಖಲಾದ ಪ್ರಕರಣಗಳ ಸಂಖ್ಯೆಯನ್ನು ಅವರು ನಿರ್ದಿಷ್ಟವಾಗಿ ತಿಳಿಸಿಲ್ಲ.

ವಿಯೆಟ್ನಾಂನ ಸೆಂಟ್ರಲ್ ಇನ್​ಸ್ಟಿಟ್ಯೂಟ್ ಆಫ್ ಹೈಜೀನ್ ಅಂಡ್ ಎಪಿಡೆಮಿಯಾಲಜಿ ಶನಿವಾರ ಹೇಳಿಕೆಯಲ್ಲಿ ತನ್ನ ವಿಜ್ಞಾನಿಗಳು ಜೀನ್ ಅನುಕ್ರಮದ ಮೂಲಕ 32 ರೋಗಿಗಳ ಮಾದರಿಗಳಲ್ಲಿ ನಾಲ್ವರಲ್ಲಿ ಜೀನ್ ರೂಪಾಂತರಗಳನ್ನು ಪತ್ತೆ ಮಾಡಿದ್ದಾರೆ ಎಂದು ಹೇಳಿದೆ.

ಆರೋಗ್ಯ ಸಚಿವಾಲಯದ ಪ್ರಕಾರ, ಈ ಮೊದಲು ವಿಯೆಟ್ನಾಂನಲ್ಲಿ ಏಳು ಪರಿಚಿತ ಕೊರೊನಾ ವೈರಸ್ ರೂಪಾಂತರಗಳಿವೆ. B.1.222, B.1.619, D614G, B.1.1.7 (ಬ್ರಿಟನ್ ಮಾದರಿ), B.1.351, A.23.1 and B.1.617.2 (ಭಾರತೀಯ ಮಾದರಿ) ಎಂಬ ಏಳು ಮಾದರಿಗಳು ಕಂಡುಬಂದಿದ್ದವು.

ಹೊಸ ಸುತ್ತಿನ ಸೋಂಕುಗಳು ಸಾರ್ವಜನಿಕರನ್ನು ಮತ್ತು ಸರ್ಕಾರವನ್ನು ಭಯಭೀತರನ್ನಾಗಿ ಮಾಡಿದೆ. ಸಂಚಾರ ಮತ್ತು ವ್ಯವಹಾರ ಚಟುವಟಿಕೆಯ ಮೇಲೆ ಕಟ್ಟುನಿಟ್ಟಾದ ಮಿತಿಗಳನ್ನು ಹೇರಲು ಅಧಿಕಾರಿಗಳು ಮುಂದಾಗಿದ್ದಾರೆ.

ಕೆಫೆಗಳು, ರೆಸ್ಟೋರೆಂಟ್‌ಗಳು, ಹೇರ್ ಸಲೂನ್‌ಗಳು ಮತ್ತು ಮಸಾಜ್ ಪಾರ್ಲರ್‌ಗಳು ಹಾಗೂ ಪ್ರವಾಸೋದ್ಯಮ ಮತ್ತು ಧಾರ್ಮಿಕ ತಾಣಗಳನ್ನು ದೇಶದ ವಿವಿಧ ಪ್ರದೇಶಗಳಲ್ಲಿ ಮುಚ್ಚಲು ಆದೇಶಿಸಲಾಗಿದೆ.

ವಿಯೆಟ್ನಾಂ 97 ದಶಲಕ್ಷ ಜನರಿರುವ ದೇಶ. ಒಂದು ದಶಲಕ್ಷಕ್ಕೂ ಹೆಚ್ಚು ನಾಗರಿಕರಿಗೆ ಲಸಿಕೆ ಹಾಕಿದೆ.