ಅಂತಾರಾಷ್ಟ್ರೀಯ ವಿಮಾನ ಪ್ರಯಾಣಿಕರಿಗೆ ಹೊಸ ಕೋವಿಡ್ ನಿಯಮ ರೂಪಿಸಿದ ಅಮೆರಿಕ

ಚೀನಾ, ಬ್ರಿಟನ್​ ಸೇರಿ ಹಲವು ದೇಶಗಳಲ್ಲಿ ಕೋವಿಡ್ ಏಕಾಏಕಿ ಸ್ಫೋಟಗೊಳ್ಳುತ್ತಿರುವುದರ ಪರಿಣಾಮ ಅಮೆರಿಕ ಎಚ್ಚೆತ್ತಿದೆ. ಕೋವಿಡ್ ಲಸಿಕೆ ಹಾಕಿಸಿಕೊಂಡಿದ್ದವರಿಗೆ ಮಾತ್ರ ವಿಮಾನ ಪ್ರಯಾಣಕ್ಕೆ ಅವಕಾಶ ನೀಡಿದೆ.

ವಾಷಿಂಗ್ಟನ್ (ಅಮೆರಿಕ): ಕೋವಿಡ್​​​ ಪ್ರಕರಣಗಳ ಸಂಖ್ಯೆ ಹೆಚ್ಚಾಗುತ್ತಿರುವ ಹಿನ್ನೆಲೆಯಲ್ಲಿ ಬೈಡನ್​ ಸರ್ಕಾರ ಅಂತಾರಾಷ್ಟ್ರೀಯ ವಿಮಾನ ಪ್ರಯಾಣಿಕರಿಗೆ ಕೆಲ ನಿರ್ಬಂಧಗಳನ್ನು ವಿಧಿಸಿದೆ. ಕೋವಿಡ್ ಲಸಿಕೆ ಹಾಕಿಸಿಕೊಂಡಿದ್ದವರಿಗೆ ಮಾತ್ರ ವಿಮಾನ ಪ್ರಯಾಣಕ್ಕೆ ಅವಕಾಶ ನೀಡಲಾಗಿದೆ.

ಅಲ್ಲದೇ, ಬೋರ್ಡಿಂಗ್​ಗೂ ಮುನ್ನ ಸಂಪೂರ್ಣ ವ್ಯಾಕ್ಸಿನೇಷನ್ ರಿಪೋರ್ಟ್ ​ತೋರಿಸಬೇಕಾಗುತ್ತದೆ. ಈ ನಿಯಮ ನವೆಂಬರ್ 8 ರಿಂದ ಜಾರಿಗೆ ಬರಲಿದೆ ಎಂದು ಯುಎಸ್​ ಡಿಪಾರ್ಟ್​ಮೆಂಟ್ ಆಫ್ ಸ್ಟೇಟ್ ತಿಳಿಸಿದೆ. ಸದ್ಯ ಅಮೆರಿಕದಲ್ಲಿ ಫೈಜರ್, ಮಾಡರ್ನಾ, ಜಾನ್ಸನ್ ಅಂಡ್ ಜಾನ್ಸನ್​, ಆಸ್ಟ್ರಜೆನೆಕಾ, ಸಿನೋಫಾರ್ಮ್ ಮತ್ತು ಸಿನೋವಾಕ್​ ಲಸಿಕೆಗಳನ್ನು ನೀಡಲಾಗುತ್ತಿದೆ. ಅಮೆರಿಕದಲ್ಲಿ 4.54 ಕೋಟಿ ಜನರಿಗೆ ಕೋವಿಡ್ ದೃಢಪಟ್ಟಿದ್ದು, ವೈರಸ್​ಗೆ 7.36 ಲಕ್ಷ ಮಂದಿ ಬಲಿಯಾಗಿದ್ದಾರೆ.

ಬ್ರಿಟನ್​, ಚೀನಾದಲ್ಲಿ ಏಕಾಏಕಿ ಕೋವಿಡ್​ ಸ್ಫೋಟಗೊಂಡಿದ್ದರಿಂದ ಇತರೆ ದೇಶಗಳಿಗೂ ವೈರಸ್ ಭೀತಿ ಹೆಚ್ಚಾಗಿದೆ. ಈ ಹಿನ್ನೆಲೆ ಬೈಡನ್ ಸರ್ಕಾರ ಈ ನಿರ್ಧಾರ ಕೈಗೊಂಡಿದೆ.