ಕೊರೊನಾ ವೈರಸ್​ಗೆ ಲಸಿಕೆ ಕಂಡು ಹಿಡಿಯಲು ಮುಂದಾದ ಜಾನ್ಸನ್​ ಅಂಡ್​ ಜಾನ್ಸನ್

ಮಾರಣಾಂತಿಕ ಕೊರೊನಾ ವೈರಸ್​ಗೆ ಲಸಿಕೆ ಕಂಡು ಹಿಡಿಯಲು ಜಗತ್ತಿನಾದ್ಯಂತ ಪ್ರಯತ್ನಗಳು ನಡೆಯುತ್ತಿರುವ ಮಧ್ಯೆಯೇ ಪ್ರಖ್ಯಾತ ಸಂಸ್ಥೆ ಜಾನ್ಸನ್​ ಅಂಡ್​ ಜಾನ್ಸನ್ ಕೂಡ ಈ ಪ್ರಯತ್ನಕ್ಕೆ ಕೈ ಹಾಕಿದ್ದು, ಎಲ್ಲವೂ ಅಂದುಕೊಂಡಂತೆ ಆದರೆ ಮುಂದಿನ ವರ್ಷಾರಂಭದಲ್ಲಿ ಲಸಿಕೆಯು ಬಳಕೆಗೆ ಲಭ್ಯವಾಗಲಿದೆ.

ವಾಷಿಂಗ್ಟನ್ ( ಯುಎಸ್​) : ಕೊರೊನಾ ವೈರಸ್​ಗೆ ಲಸಿಕೆ ಕಂಡು ಹಿಡಿಯಲು ಪ್ರಸಿದ್ದ ಸಂಸ್ಥೆ ಜಾನ್ಸನ್ ಅಂಡ್​ ಜಾನ್ಸನ್ ಸಿದ್ದತೆ ನಡೆಸಿದ್ದು, ಸೆಪ್ಟೆಂಬರ್ ವೇಳೆಗೆ ಮಾನವನ ಮೇಲೆ ಪ್ರಯೋಗ ಮಾಡಲು ಚಿಂತನೆ ನಡೆಸಲಾಗಿದೆ. ಮುಂದಿನ ವರ್ಷದ ಆರಂಭದ ವೇಳೆ ಬಳಕೆಗೆ ಸಿದ್ಧವಾಗಲಿದೆ.

ಈ ಹೊಸ ಪ್ರಯೋಗಕ್ಕೆ ಯುಎಸ್ ಸರ್ಕಾರದ ಬಯೋಮೆಡಿಕಲ್ ಅಡ್ವಾನ್ಸ್ಡ್ ರಿಸರ್ಚ್ ಅಂಡ್ ಡೆವಲಪ್​ಮೆಂಟ್​​​ ಅಥಾರಿಟಿಯೊಂದಿಗೆ ಸಂಸ್ಥೆಯು 1 ಬಿಲಿಯನ್ ಯುಎಸ್ ಡಾಲರ್ ಹೂಡಿಕೆ ಮಾಡಲು ಒಪ್ಪಂದಕ್ಕೆ ಸಹಿ ಹಾಕಿದೆ ಎಂದು ಪ್ರಕಟಣೆಯಲ್ಲಿ ತಿಳಿಸಿದೆ.

ಜಾನ್ಸನ್​ ಅಂಡ್​ ಜಾನ್ಸನ್​ ಸಂಸ್ಥೆಯು Ad26 SARS-CoV-2 ಲಸಿಕೆಯನ್ನು ಕಂಡು ಹಿಡಿಯಲು ತಯಾರಿ ನಡೆಸಿದ್ದು, ಎಬೋಲಾ ಸೋಂಕಿಗೆ ಲಸಿಕೆ ಕಂಡು ಹಿಡಿಯಲು ಬಳಸಿದ ತಂತ್ರಜ್ಞಾವನ್ನೇ ಇಲ್ಲೂ ಬಳಸಲು ತೀರ್ಮಾನಿಸಿದೆ.