ನಕಲಿ ಸಿಮ್ ಕಾರ್ಡ್​ ಮಾರುವವರ ಮೇಲೆ ಬೆಂಗಳೂರು ಪೊಲೀಸರ ಕಣ್ಣು

ಇತ್ತೀಚಿನ ದಿನಗಳಲ್ಲಿ ಎಲ್ಲರೂ ಮೊಬೈಲ್ ಬಳಕೆ ಮಾಡುವ ಕಾರಣ ಪ್ರತಿಯೊಬ್ಬರೂ ಸಿಮ್ ಖರೀದಿ ಮಾಡಿಯೇ ‌ಮಾಡ್ತಾರೆ. ಕೆಲವರು ನೆಟ್​ವರ್ಕ್ ಆಧಾರದ ಮೇಲೆ ತಮಗೆ ಅನುಕೂಲಕರವಾಗುವ ರೀತಿ ಬೇಕಾದ ಸಿಮ್ ಖರೀದಿಸುತ್ತಾರೆ. ಆದ್ರೆ ಇತ್ತೀಚಿನ ದಿನಗಳಲ್ಲಿ ಬೇರೆಯವರ ಹೆಸರಿನಲ್ಲಿ ಸಿಮ್‌ ಖರೀದಿ ಮಾಡಿ, ಅದನ್ನ ಬೇರೆ ಬೇರೆ ಅಪರಾಧ ಕೃತ್ಯಗಳಿಗೆ ಬಳಕೆ ಮಾಡಿರುವ ವಿಚಾರ ಬೆಳಕಿಗೆ ಬಂದಿದೆ. ಈ ಬಗ್ಗೆ ಬೆಂಗಳೂರು ಪೊಲೀಸರು ಅಲರ್ಟ್​ ಆಗಿದ್ದಾರೆ.

ಬೆಂಗಳೂರು: ನಗರ ಪೊಲೀಸರು ಸಿಸಿಬಿ ಸಹಾಯದಿಂದ ತಂಡ ರಚನೆ ಮಾಡಿ, ನಕಲಿ​ ಸಿಮ್​ ಕಾರ್ಡ್​ ಮಾರಾಟ ಮಾಡುವವರ ಮೇಲೆ ನಿಗಾ ಇಡಲು ನಿರ್ಧರಿಸಿದ್ದಾರೆ.

ಬೇರೆ ವ್ಯಕ್ತಿಗಳ ಆಧಾರ್ ಸಂಖ್ಯೆ ಬಳಸಿ ಸಿಮ್ ಖರೀದಿ ಮಾಡಿ, ಆ ಸಿಮ್​ ಕಾರ್ಡ್​ಅನ್ನು ಹಲವಾರು ಅಪರಾಧ ಕೃತ್ಯವೆಸಗಲು ಬಳಕೆ ಮಾಡುತ್ತಿರುವ ವಿಚಾರ ಬೆಂಗಳೂರು ಪೊಲೀಸರಿಗೆ ತಿಳಿದು ಬಂದಿದೆ. ಹೀಗಾಗಿ ನಗರ ಪೊಲೀಸರು ಸಿಸಿಬಿ ಸಹಾಯದಿಂದ ತಂಡ ರಚನೆ ಮಾಡಿದ್ದು, ರಸ್ತೆಗಳಲ್ಲಿ ನಕಲಿ ಸಿಮ್ ವ್ಯಾಪಾರ ಮಾಡುವರ ಮೇಲೆ ನಿಗಾ ಇಡಲು ನಿರ್ಧಾರ‌ ಮಾಡಿದ್ದಾರೆ.

ಈ ಕುರಿತು ನಗರ ಪೊಲೀಸ್ ಆಯುಕ್ತ ಭಾಸ್ಕರ್ ರಾವ್ ಮಾತನಾಡಿ, ಇತ್ತೀಚಿನ ದಿನಗಳಲ್ಲಿ ಡಾಕ್ಯುಮೆಂಟ್ ಕೊಟ್ಟು ಕೆಲವರು ಸಿಮ್ ಖರೀದಿ ಮಾಡ್ತಾರೆ. ಆದ್ರೆ ಇದನ್ನು ಕೆಲವರು ದುರ್ಬಳಕೆ ಮಾಡಿಕೊಂಡು ಫೇಕ್​ ಸಿಮ್​ ಮಾರಾಟ ಮಾಡಿ, ಅಪರಾಧ ಪ್ರಕರಣದಲ್ಲಿ ಭಾಗಿಯಾಗುವಂತೆ ಮಾಡ್ತಾರೆ‌. ಹೀಗಾಗಿ ಸಿಮ್ ಮಾರಾಟ ಮಾಡುವ ಆರೋಪಿಗಳಿಗೆ ಟೆಲಿಗ್ರಾಂ ಆ್ಯಕ್ಟ್ ಹಾಗೂ ಚೀಟಿಂಗ್ ಕೇಸ್ ಹಾಕಿ ಅವರ ಮೇಲೆ ಕ್ರಮ ಕೈಗೊಳ್ಳಲಾಗುವುದು ಎಂದು ಖಡಕ್ ಎಚ್ಚರಿಕೆ ನೀಡಿದ್ದಾರೆ.