ಬಳ್ಳಾರಿ: ಜಿಲ್ಲೆಯ ಕೂಡ್ಲಿಗಿ ತಾಲೂಕಿನ ಕೈವಲ್ಯಾಪುರ ಗ್ರಾಮದಲ್ಲಿಂದು ಬೆಳ್ಳಂಬೆಳಗ್ಗೆ ಕರಡಿಯೊಂದು ವ್ಯಕ್ತಿಯ ಮೇಲೆರಗಿದೆ. ಈ ವೇಳೆ ವ್ಯಕ್ತಿಗೆ ಮುಖ, ಮೂತಿ ಪರಚಿ ತೀವ್ರವಾಗಿ ಗಾಯಗೊಳಿಸಿದೆ.
ಕೈವಲ್ಯಾಪುರ ಗ್ರಾಮದ ಉಪ್ಪಾರ ದುರುಗಪ್ಪ ಕರಡಿ ದಾಳಿಗೆ ಒಳಗಾದವರು. ಬೆಳ್ಳಂಬೆಳಗ್ಗೆ ಎಂದಿನಂತೆ ಎಲೆ ತೋಟಕ್ಕೆ ನೀರು ಬಿಡಲು ಹೋದಾಗ ಈ ಘಟನೆ ನಡೆದಿದೆ.
ಕರಡಿ ದಾಳಿಗೆ ಒಳಗಾದ ದುರುಗಪ್ಪ ಜೋರಾಗಿ ಕಿರುಚಿದಾಗ ಅಕ್ಕಪಕ್ಕದ ರೈತರು ಓಡಿಹೋಗಿ ಗದ್ದಲ ಮಾಡಿದಾಗ ಕರಡಿ ಬಿಟ್ಟು ಓಡಿದೆ. ಕೂಡ್ಲಿಗಿ ಸರ್ಕಾರಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಿ, ಹೆಚ್ಚಿನ ಚಿಕಿತ್ಸೆಗೆಂದು ಬಳ್ಳಾರಿ ವಿಮ್ಸ್ ಆಸ್ಪತ್ರೆಗೆ ದಾಖಲಿಸುವಂತೆ ಸೂಚಿಸಲಾಗಿದೆ ಎಂದು ವೈದ್ಯರು ತಿಳಿಸಿದ್ದಾರೆ.
