ಹೈದರಾಬಾದ್: ವಿಮಾ ಪಾಲಿಸಿಗಳು ನಮ್ಮ ಇಡೀ ಕುಟುಂಬದ ಆರ್ಥಿಕ ಭದ್ರತೆಗೆ ಬಲವಾದ ಅಡಿಪಾಯವನ್ನು ಹಾಕುತ್ತವೆ. ಆದರೆ ತಕ್ಷಣದಲ್ಲಿ ಯಾವುದೇ ಹಣಕಾಸು ಲಾಭ ಸಿಗುವುದಿಲ್ಲ ಎಂ ಕಾರಣಕ್ಕೆ ಬಹುತೇಕರು ವಿಮಾ ಪಾಲಿಸಿ ಕೊಳ್ಳುವುದಕ್ಕೆ ಹಿಂಜರಿಯುತ್ತಾರೆ. ಪಾಲಿಸಿದಾರನು ಪಾಲಿಸಿಯ ಅವಧಿಯ ನಂತರವೂ ಬದುಕಿದಾಗ ಆತನಿಗೆ ಯಾವುದೇ ಹಣಕಾಸು ಲಾಭ ನೀಡದ ಜೀವವಿಮಾ ಪಾಲಿಸಿಗಳಿಗೆ ಯಾವುದೇ ಮಹತ್ವವಿಲ್ಲ. ಈ ಹಿನ್ನೆಲೆಯಲ್ಲಿ ನಾವು ಹಣಕಾಸು ಪರಿಣಾಮಗಳನ್ನು ಪರಿಗಣಿಸಬೇಕಾಗಿದೆ. ಆದಾಯ ಗಳಿಸುವವರಿಗೆ ಏನಾದರೂ ಸಂಭವಿಸಿದರೆ, ಆರ್ಥಿಕ ತೊಂದರೆಗಳು ಸಂಗಾತಿ, ಮಕ್ಕಳು, ಪೋಷಕರು ಮತ್ತು ಇತರ ಅವಲಂಬಿತರು ಸೇರಿದಂತೆ ಎಲ್ಲ ಅವಲಂಬಿತ ಕುಟುಂಬ ಸದಸ್ಯರನ್ನು ಸುತ್ತುವರೆದಿರುತ್ತವೆ.
ಹೀಗಾಗಿ ಮನೆಯ ಮುಖ್ಯ ಗಳಿಕೆದಾರನು ಕುಟುಂಬದ ಭವಿಷ್ಯದ ಸಂಪೂರ್ಣ ಜವಾಬ್ದಾರಿಯನ್ನು ತೆಗೆದುಕೊಳ್ಳಬೇಕು ಮತ್ತು ಅದಕ್ಕೆ ತಕ್ಕಂತೆ ಹೂಡಿಕೆಗಳನ್ನು ಮಾಡಬೇಕಾಗುತ್ತದೆ. ಒಂದು ವೇಳೆ ಜೀವ ವಿಮಾ ಪಾಲಿಸಿ ತೆಗೆದುಕೊಂಡಿದ್ದಲ್ಲಿ ಕುಟುಂಬದ ಪ್ರಮುಖ ಗಳಿಕೆದಾರನಿಗೆ ಏನಾದರೂ ಆದರೂ ಕುಟುಂಬವು ಸುರಕ್ಷಿತವಾಗಿರುತ್ತದೆ.
ಪ್ರಸ್ತುತ ಪರಿಸ್ಥಿತಿಯಲ್ಲಿ ಜೀವ ವಿಮಾ ಮಾರುಕಟ್ಟೆಯು ಹಲವು ವಿಧದ ಯೋಜನೆಗಳನ್ನು ಒದಗಿಸುತ್ತಿದೆ- ಟರ್ಮ್ ಇನ್ಶೂರೆನ್ಸ್, ಎಂಡೋಮೆಂಟ್, ಯುಲಿಪ್ಸ್ (ಯುನಿಟ್ ಲಿಂಕ್ಡ್ ಇನ್ಶೂರೆನ್ಸ್ ಪ್ಲಾನ್‌ಗಳು), ಮನಿ ಬ್ಯಾಕ್ ಪಾಲಿಸಿಗಳು, ಇತ್ಯಾದಿ. ಇವೆಲ್ಲವುಗಳಲ್ಲಿ, ಟರ್ಮ್ ಪಾಲಿಸಿಗಳು ಕನಿಷ್ಠ ಪ್ರೀಮಿಯಂನಲ್ಲಿ ಗರಿಷ್ಠ ವಿಮೆಯನ್ನು ನೀಡುತ್ತವೆ. ಆದಾಗ್ಯೂ, ವಿಮೆದಾರರು ಅವಧಿಯನ್ನು ಮೀರಿದರೆ ಟರ್ಮ್ ಯೋಜನೆಗಳು ಮೆಚುರಿಟಿ ಪ್ರಯೋಜನಗಳನ್ನು ನೀಡುವುದಿಲ್ಲ. ಇದರ ಪರಿಣಾಮವಾಗಿ, ಮೆಚ್ಯೂರಿಟಿ ಪಾವತಿಯ ಅನುಪಸ್ಥಿತಿಯಲ್ಲಿ ತಮ್ಮ ಹಣವು ವ್ಯರ್ಥವಾಗುತ್ತದೆ ಎಂಬ ಕಲ್ಪನೆಯ ಅಡಿಯಲ್ಲಿ ಕೆಲವರು ಟರ್ಮ್ ಪ್ಲಾನ್‌ಗಳಿಗೆ ಚಂದಾದಾರರಾಗುವುದಿಲ್ಲ.
ಪಾಲಿಸಿದಾರರ ಈ ಕಾಳಜಿಗಳನ್ನು ಪರಿಹರಿಸಲು, ಕೆಲವು ವಿಮಾ ಕಂಪನಿಗಳು ಟರ್ಮ್ ಪ್ಲಾನ್‌ಗಳಲ್ಲಿ 'ರಿಟರ್ನ್ ಆಫ್ ಪ್ರೀಮಿಯಂ' (return of premium) ಅನ್ನು ನೀಡುತ್ತಿವೆ. ಪಾಲಿಸಿದಾರರು ಪೂರ್ಣ ಅವಧಿಯನ್ನು ಮುಗಿಸಿದರೆ, ಕಂಪನಿಯು ಅಲ್ಲಿಯವರೆಗೆ ಪಾಲಿಸಿ ಹೊಂದಿರುವವರು ಪಾವತಿಸಿದ ಎಲ್ಲಾ ಪ್ರೀಮಿಯಂ ಅನ್ನು ಮರುಪಾವತಿ ಮಾಡುತ್ತದೆ. ಈಗ, ವಿಮಾ ಸಂಸ್ಥೆಗಳು ಶೂನ್ಯ ವೆಚ್ಚದ ಅವಧಿ ವಿಮೆ ಅಥವಾ ಜೀರೊ ಕಾಸ್ಟ್ ಟರ್ಮ್ ಇನ್ಸೂರೆನ್ಸ್ (zero cost term insurance) ಯೋಜನೆಗಳ ಹೆಸರಿನಲ್ಲಿ ಇಂತಹ ಪ್ರಯೋಜನಗಳನ್ನು ನೀಡುತ್ತಿವೆ. ಅವು ನಿಗದಿತ ಅವಧಿಯ ನಂತರ ಪಾಲಿಸಿಗಳನ್ನು ಹಿಂಪಡೆಯಲು ಇರುವ ಆಯ್ಕೆಗಳಾಗಿವೆ.
ಶೂನ್ಯ ವೆಚ್ಚದ ಅವಧಿಯ ಪಾಲಿಸಿಗಳನ್ನು ಹೊಂದಿರುವವರು ಪಾಲಿಸಿಯನ್ನು ಹಿಂಪಡೆದರೆ, ಕಂಪನಿಯು ಅವರಿಗೆ ಅಲ್ಲಿಯವರೆಗೆ ಪಾವತಿಸಿದ ಎಲ್ಲಾ ಪ್ರೀಮಿಯಂ ಅನ್ನು ಪಾವತಿಸುತ್ತದೆ. ಆದ್ದರಿಂದ, ಪಾಲಿಸಿದಾರರು ಈ ಅವಧಿಯಲ್ಲಿ ತಮ್ಮ ಕಡೆಯಿಂದ ಖರ್ಚು ಮಾಡದೆಯೇ ವಿಮಾ ರಕ್ಷಣೆಯ ಪ್ರಯೋಜನವನ್ನು ಆನಂದಿಸಬಹುದು. ಇದಕ್ಕಾಗಿಯೇ ವಿಮಾ ಕಂಪನಿಗಳು ಇದಕ್ಕೆ ‘ಶೂನ್ಯ ವೆಚ್ಚದ ಯೋಜನೆ’ ಎಂದು ಹೆಸರಿಟ್ಟಿವೆ. ಅನೇಕ ಜನ ತಮಗೆ 70 ರಿಂದ 80 ವರ್ಷಗಳಾಗುವವರೆಗೆ ದೀರ್ಘಾವಧಿಯನ್ನು ಗುರಿಯಾಗಿಟ್ಟುಕೊಂಡು ಪಾಲಿಸಿಗಳನ್ನು ತೆಗೆದುಕೊಳ್ಳುತ್ತಾರೆ. ಆದಾಗ್ಯೂ, ಅವರು ಸ್ವಲ್ಪ ಸಮಯದ ನಂತರ ಪಾಲಿಸಿಗಳಲ್ಲಿ ಆಸಕ್ತಿ ಕಳೆದುಕೊಳ್ಳುತ್ತಾರೆ. ಇದಲ್ಲದೆ, ಅವರಿಗೆ ಯಾವುದೇ ಅವಲಂಬಿತರು ಇಲ್ಲದಿದ್ದರೆ, ಅವರು ವಿಮಾ ಯೋಜನೆಗಳನ್ನು ನಿಲ್ಲಿಸುವ ಸಾಧ್ಯತೆಗಳಿರುತ್ತವೆ. ಇಂಥ ಸಂದರ್ಭಗಳಲ್ಲಿ ಅವರು ಅಲ್ಲಿಯವರೆಗೆ ಪಾವತಿಸಿದ ಎಲ್ಲ ಪ್ರೀಮಿಯಂ ಮೊತ್ತವನ್ನು ಮರಳಿ ಪಡೆಯುವುದರಿಂದ ಹೆಚ್ಚಿನ ಪ್ರಯೋಜನ ಪಡೆಯುತ್ತಾರೆ.
'ಶೂನ್ಯ ವೆಚ್ಚದ ಅವಧಿ ವಿಮೆ' ಯೋಜನೆಗಳು ತಮ್ಮ ನಿವೃತ್ತಿಯ ಬಗ್ಗೆ ಸ್ಪಷ್ಟತೆ ಹೊಂದಿರದವರಿಗೆ ಮತ್ತು ದೀರ್ಘಾವಧಿಯ ಹೂಡಿಕೆಗಳನ್ನು ಗುರಿಯಾಗಿಸಿಕೊಂಡವರಿಗೆ ತುಂಬಾ ಉಪಯುಕ್ತವಾಗಿದೆ. ಈ ಯೋಜನೆಗಳನ್ನು ಪ್ರಸ್ತುತ Max Life, Bajaj Allianz ಮತ್ತು HDFC Life ಒದಗಿಸುತ್ತಿವೆ.
'ಶೂನ್ಯ ವೆಚ್ಚದ ಅವಧಿಯ ಯೋಜನೆಗಳ' ಆಕರ್ಷಕ ವೈಶಿಷ್ಟ್ಯಗಳು, ನಿಗದಿತ ಆರಂಭಿಕ ಅವಧಿಯ ನಂತರ ಯಾವಾಗ ಬೇಕಾದರೂ ಪಾಲಿಸಿದಾರರು ಪಾಲಿಸಿ ಹಿಂದಿರುಗಿಸುವ ಸೌಲಭ್ಯವನ್ನು ಒಳಗೊಂಡಿವೆ. ಇಂಥ ಸಂದರ್ಭದಲ್ಲಿ ಪಾಲಿಸಿದಾರನು ಅಲ್ಲಿಯವರೆಗೆ ಪಾವತಿಸಿದ ಎಲ್ಲ ಪ್ರೀಮಿಯಂ ಮೊತ್ತವನ್ನು ಹಿಂತಿರುಗಿಸಲಾಗುತ್ತದೆ. ಆದಾಗ್ಯೂ, 35 ರಿಂದ 40 ವರ್ಷಗಳವರೆಗಿನ ಅವಧಿಯ ಯೋಜನೆಗಳಿಗೆ ಸಂಬಂಧಿಸಿದಂತೆ ಮಾತ್ರ ಈ ಪ್ರಯೋಜನ ನೀಡಲಾಗುತ್ತದೆ. ಲಭ್ಯವಿರುವ ಮಾಹಿತಿಯ ಪ್ರಕಾರ, 60 ಪ್ರತಿಶತದಷ್ಟು ಪಾಲಿಸಿದಾರರು ತಮ್ಮ ಕುಟುಂಬದ ದೀರ್ಘಾವಧಿಯ ಸುರಕ್ಷತೆಯನ್ನು ಗಮನದಲ್ಲಿಟ್ಟುಕೊಂಡು 70 ರಿಂದ 80 ವರ್ಷಗಳವರೆಗೆ ಟರ್ಮ್ ಯೋಜನೆಗಳನ್ನು ಮುಂದುವರಿಸಲು ಆಯ್ಕೆ ಮಾಡುತ್ತಾರೆ. ಅಂತಹ ವ್ಯಕ್ತಿಗಳು ಯಾವುದೇ ಅವಲಂಬಿತರನ್ನು ಹೊಂದಿಲ್ಲದಿದ್ದರೆ ಈ ಪಾಲಿಸಿಗಳನ್ನು ಸುಲಭವಾಗಿ ಹಿಂಪಡೆಯಬಹುದು.
ವಿಮಾ ಕಂಪನಿಗಳು ಪಾಲಿಸಿದಾರನು ತನ್ನ ಪಾಲಿಸಿಯನ್ನು ಹಿಂತೆಗೆದುಕೊಂಡ ನಂತರ ಜಿಎಸ್‌ಟಿಯನ್ನು ಕಡಿತಗೊಳಿಸಿ ಉಳಿದ ಎಲ್ಲ ಪ್ರೀಮಿಯಂ ಅನ್ನು ಪಾವತಿಸುತ್ತವೆ. ಶೂನ್ಯ ವೆಚ್ಚದ ಯೋಜನೆಗಳ ಅಡಿಯಲ್ಲಿ ಪ್ರೀಮಿಯಂ ಇತರ ನಿಯಮಿತ ಅವಧಿಯ ಯೋಜನೆಗಳಂತೆಯೇ ಇರುತ್ತದೆ ಮತ್ತು ಪ್ರೀಮಿಯಂ ಪ್ಲಾನ್ ಅಥವಾ TROP (ಪ್ರೀಮಿಯಂ ಹಿಂತಿರುಗಿಸುವ ಅವಧಿಯ ವಿಮೆ) ನಷ್ಟು ದುಬಾರಿಯಲ್ಲ. ಶೂನ್ಯ ವೆಚ್ಚದ ಯೋಜನೆಗಳನ್ನು ಪಡೆಯಲು 45 ವರ್ಷಕ್ಕಿಂತ ಕಡಿಮೆ ವಯಸ್ಸಿನವರು ಮಾತ್ರ ಅರ್ಹರಾಗಿರುತ್ತಾರೆ.
ಇದನ್ನೂ ಓದಿ: ದುಬಾರಿ ಆಸ್ಪತ್ರೆ ವೆಚ್ಚ ಭರಿಸಲು ಬೇಕೇ ಬೇಕು ಆರೋಗ್ಯ ವಿಮೆ
